AKP ភ្នំពេញ ថ្ងៃទី១៦ ខែកក្កដា ឆ្នាំ២០២៥ -- កន្លែងវិបស្សនានៅឧទ្យានជាតិព្រះសុរាម្រិតកុសុមៈគិរីរម្យ ដែលស្ថិតក្នុងបរិវេណមជ្ឈមណ្ឌលវប្បធម៌ព្រះពុទ្ធសាសនាកម្ពុជា គឺជាគោលដៅទេសចរណ៍លំហែបៃតង និងក៏ជាទីកន្លែងសម្រាប់អ្នកប្រតិបត្តិសាសនា និងកន្លែងអ្នកទេសចរ ដែលត្រូវបានធ្វើឱ្យចិត្តស្អាត ស្អាតទាំងគំនិត និង ស្អាតទាំងបរិស្ថានខាងក្រៅ ជាមួយធម្មជាតិស្រស់បំព្រង ជាទីរីករាយសប្បាយចិត្ត។ 

គួរបញ្ជាក់ថា ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន គឺជាអ្នកផ្តូចផ្តើមគំនិតសាងសង់ទីកន្លែងសមាធិមួយកន្លែងនេះ គឺដើម្បីផ្សព្វផ្សាយ ពីមាគ៌ាព្រះពុទ្ធសាសនា វប្បធម៌ និងបង្ហាញអំពីធនធានធម្មជាតិ ផ្សារភ្ជាប់នឹងជីវិតប្រចាំថ្ងៃ ដែលប្រកបដោយធម៌សន្តោស កសាងសន្តិភាពផ្លូវចិត្តឱ្យរឹងមាំ តាមរយៈការសិក្សាធម៌វិន័យរបស់ព្រះពុទ្ធ ដែលផ្តោតសំខាន់លើភាពល្អបរិសុទ្ធ ភាពស្អាតក្នុងចិត្ត។

វិបស្សនាដែលមានន័យថាឃើញរបស់ផងទាំងពួងតាមភាពពិត គឺជាបច្ចេកទេសធ្វើចិត្តឱ្យបរិសុទ្ធផូរផង់ដោយខ្លួនឯង ដោយការពិនិត្យមើលខ្លួនឯង។ ក្នុងន័យមួយទៀត វិបស្សនាគឺជាបច្ចេកទេសមួយដើម្បីគាស់រំលើងនូវសេចក្តីទុក្ខឱ្យដាច់ឫសគល់។ វិបស្សនាជាបច្ចេកទេសធ្វើចិត្តឱ្យបរិសុទ្ធផូរផង់ ដែលនាំមនុស្សឱ្យចេះប្រឈមមុខចំពោះភាពតានតឹង និងបញ្ហាជីវិតទាំងឡាយប្រកបដោយចិត្តស្ងប់ស្ងៀម និងមានលំនឹង។

លោក ច័ន្ទថេត ថានរៈ ប្រធានមន្ទីរបរិស្ថានខេត្តកំពង់ស្ពឺ បានបញ្ជាក់ប្រាប់ថាមកដល់ពេលនេះមន្ទីរបរិស្ថានបានរៀបចំភាពស្អាតនៅលើដីដោយបានរៀបចំដាំកូនឈើដែលមានផ្កាលម្អក្នុងនេះដូចជាផ្កាក្ងោក ហើយដាំបានចំនួនជាង១ឆ្នាំហើយ និងរំពឹងថាការដាំរយៈពេល២ឆ្នាំកន្លះ នឹងផ្តល់ជាផ្កាយ៉ាងស្រស់ស្អាតពុំខាន។ជាមួយគ្នានេះក៏បានរៀបចំឆ្លាកអប់រំទាក់ទិននឹងកិច្ចការពារបរិស្ថានផងដែរ។ ដោយឡែកចំពោះការអនុវត្តភាពស្អាតនៅលើមេឃវិញ យើងបានដាក់អំពូលភ្លើងដោយមិនបានប្រើប្រាស់អគ្គិសនី ដោយជំនួសមកវិញជាអំពូលសូឡា។

លោកបានបញ្ជាក់ថា តាមរយៈការដាំដើមឈើ កិច្ចការពារបរិស្ថានទាំងនេះគឺមិនត្រឹមតែផ្តល់បរិស្ថានស្អាតល្អទេ តែក៏បានជួយដល់ម្លប់ត្រជាក់ជាទីមនោរម្យដល់អ្នកចូលមកកម្សាន្ត ពិសេសអ្នកមកវិបស្សនា នៅឧទ្យានជាតិព្រះសុរាម្រិតកុសុមៈគិរីរម្យនេះតែម្តង។ អ្នកមកលេងគិរីរម្យនេះមិនត្រឹមតែបានកម្សាន្តរមណីយដ្ឋានទេ តែពួកគាត់មួយចំនួនក៏បានជ្រើសរើសលើភ្នំនេះសម្រាប់ធ្វើវិបស្សនាដែលការធ្វើចិត្តឱ្យបរិសុទ្ធផូរផង់ និងចិត្តស្ងប់នោះជារឿងសំខាន់មួយសម្រាប់អ្នកស្វែងរកសេចក្តីសុខផ្លូវចិត្ត។ ដោយសារតែទីកន្លែងនេះត្រូវការស្អាតបរិសុទ្ធទាំងបរិស្ថាន និងផ្លូវចិត្តនោះ មន្ទីរបរិស្ថានខេត្តកំពង់ស្ពឺមិនត្រឹមតែដាំដើមឈើបន្ថែមលម្អទេ ថែមទាំងបានដាំដើមផ្កាជាច្រើនដើម្បីលម្អបន្ថែមភាពស្រស់ស្អាត ញ៉ាំងឱ្យកន្លែងនេះក្លាយជាទីប៉ងប្រាថ្នាអ្នកទេសចរចូលមកកម្សាន្តឥតចេះនឿយណាយ។

គួរបញ្ជាក់ថាកន្លែងវិបស្សនា នៅឧទ្យានជាតិព្រះសុរាម្រិតកុសុមៈគិរីរម្យ ដែលស្ថិតក្នុងបរិវេណមជ្ឈមណ្ឌលវប្បធម៌ព្រះពុទ្ធសាសនាកម្ពុជា បានបញ្ចប់ការសាងសង់ជាស្ថាពរ កាលពីថ្ងៃទី១៩ ខែឧសភា ឆ្នាំ២០២៤។ កន្លែងនេះក្នុងមួយថ្ងៃៗយ៉ាងហោចណាស់មនុស្ស១០០នាក់ជាងចូលមកកម្សាន្ត និងក៏ដូចជាវិបស្សនាស្វែងរកភាពបរិសុទ្ធផ្លូវចិត្ត និងអារម្មណ៍ស្ងប់ស្ងាត់របស់អ្នកទេសចរ ក៏ដូចជាពលរដ្ឋកម្ពុជាទាំងចាស់ក្មេង៕

ដោយ៖ មករា