AKP ភ្នំពេញ ថ្ងៃទី១៥ ខែកក្កដា ឆ្នាំ២០២៥ -- ក្រសួងបរិស្ថានបានលើកឡើងថា ចំពោះក្រុមហ៊ុនមួយមានឈ្មោះថា CAMBODIAN NOBLE TASTE FOOD CO., LTD. ប្រភេទកែច្នៃស្បែកគោ ស្ថិតនៅឃុំទឹកថ្លា ស្រុកព្រៃនប់ ខេត្តព្រះសីហនុ មិនទាន់អាចបើកដំណើរការបានឡើយ ដោយចាំបាច់ត្រូវតែបំពេញតាមលក្ខខណ្ឌតាមផ្លូវច្បាប់ឱ្យបានត្រឹមត្រូវជាមុនសិនទើបអាចអនុញ្ញាតិឱ្យបើកដំណើរការឡើងវិញ។

គួរបញ្ជាក់ថា កាលពីអំឡុងចុងខែមិថុនា ឆ្នាំ២០២៥ ឯកឧត្តម ខ្វៃ អាទិត្យា អនុរដ្ឋលេខាធិការក្រសួងបរិស្ថាន បានដឹកនាំក្រុមការងារសុក្រឹត្យកម្មបរិស្ថានកិច្ចលើភាពស្អាតនៃអគ្គនាយកដ្ឋានគាំពារបរិស្ថាន មន្រ្តីប៉ុស្ដិ៍នគរបាលរដ្ឋបាលឃុំទឹកថ្លា ស្រុកព្រៃនប់ ខេត្តព្រះសីហនុ និងមេធាវីរបស់ក្រុមហ៊ុន បានចុះត្រួតពិនិត្យការអនុវត្តវិធានការច្បាប់ដែលក្រសួងបរិស្ថានបានដាក់ចេញ ចំពោះក្រុមហ៊ុន CAMBODIAN NOBLE TASTE FOOD CO., LTD. ប្រភេទកែច្នៃស្បែកគោ ដែលមានទីតាំងស្ថិតនៅឃុំទឹកថ្លា ស្រុកព្រៃនប់ ខេត្តព្រះសីហនុ។ កាលនោះក្រុមការងារជំនាញបានរកឃើញអំពី ស្ថានភាពទឹកព្រែកសង្កែត្រូវបានបំពុលដោយចាំបាច់ត្រូវតែផ្អាកឱ្យដំណើរការ ហើយដោះស្រាយបញ្ហាឱ្យបានត្រឹមត្រូវជាមុនសិន។

ក្រសួងបរិស្ថានបញ្ជាក់ឱ្យដឹងនៅថ្ងៃទី១៥ ខែកក្កដា ឆ្នាំ២០២៥ ថា ក្រុមហ៊ុនមួយនេះបានកំពុងអនុវត្តវិធានការច្បាប់ហេតុនេះការបើកដំណើរការត្រូវរង់ចាំការដោះស្រាយបានត្រឹមត្រូវដោយធានាបាននូវបរិស្ថានល្អ និងគ្មានការបំពុលទឹកស្អាតបន្តទៀត។

ទាក់ទិនទៅនឹងរឿងនេះដែរ ក្រុមមន្រ្តីជំនាញបានឱ្យក្រុមហ៊ុនអនុវត្តវិធានការដូចជា៖ ១. ក្រុមហ៊ុនត្រូវពន្លឿនការដំឡើងបរិក្ខារ នៅក្នុងអាងប្រព្រឹត្តកម្មសម្អាតសំណល់រាវឱ្យបានឆាប់រួចរាល់ និងរាយការណ៍ជូនក្រសួងបរិស្ថាន ដើម្បីក្រសួងបរិស្ថានចុះត្រួតពិនិត្យ និងវាយតម្លៃ មុននឹងក្រុមហ៊ុនដាក់ឱ្យ អាងប្រព្រឹត្តកម្មដំណើរការឡើងវិញ។ ២. ត្រូវទុកដាក់ និងគ្រប់គ្រងសំរាម សំណល់រឹងឱ្យបានត្រឹមត្រូវតាមលក្ខណៈបច្ចេកទេស និងសហការជាមួយក្រុមហ៊ុនផ្ដល់សេវាប្រមូល និងដឹកជញ្ជូន ដោយមានការទទួលស្គាល់ពីអាជ្ញាធរមានសមត្ថកិច្ច៕

ដោយ៖ មករា