AKP ភ្នំពេញ ថ្ងៃទី១៥ ខែកក្កដា ឆ្នាំ២០២៥ -- ឯកឧត្តម ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ នៅទីស្តីការក្រសួងការពារជាតិ នាថ្ងៃទី១៥ ខែកក្កដា ឆ្នាំ២០២៥ បានបំពាក់មេដាយជូនដល់កងកម្លាំងវិស្វកម្មពហុជំនាញចំនួន២៤៤នាក់ ក្រោយបញ្ចប់បេសកកម្មអង្គការសហប្រជាជាតិ នៅសាធារណរដ្ឋអាហ្វ្រិកកណ្តាល ដែលបានធ្វើមាតុភូមិនិវត្តន៍ កាលពីថ្ងៃទី១០ ខែកក្កដា ឆ្នាំ២០២៥។

ឯកឧត្តម សែម រតនា អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានថ្លែងថា កងវិស្វកម្មលេខ៤៦៨បានអនុវត្តភារកិច្ចប្រកបដោយផ្លែផ្កា និងភាពជោគជ័យដ៏ត្រចះត្រចង់ជាមួយលទ្ធផលគួរជាទីមោទនៈ ដូចបណ្តាកងមុនៗដែរ ដោយបានសាងសង់សំណង់បញ្ឈរ សំណង់ផ្តេក ជីកអណ្តូងទឹកស្អាត ថែទាំព្រលានយន្តហោះនិងឧទ្ធម្ភាគចក ជម្រកការពារសុវត្ថិភាព (HESCO WALL) ពន្លត់អគ្គិភ័យ រៀបចំទីតាំងឈរ ជើងថ្មីៗ ចូលរួមជួយសម្រួលនូវការចល័តកម្លាំង ព្រមទាំងការងារគាំទ្រ វិស្វកម្មផ្សេងៗទៀត ក្នុងតំបន់ប្រតិបត្តិការភាគខាងកើត និងទីតាំងមួយ ចំនួនទៀតក្នុងតំបន់បេសកកម្មទាំងមូល និងអន្តរាគមន៍លើការប្រឆាំង គ្រឿងផ្ទុះកែច្នៃ ការកម្ទេចយុទ្ធភ័ណ្ឌមិនទាន់ផ្ទុះ តាមតម្រូវការចាំបាច់នៃ បេសកកម្ម MINUSCA ។ លើសពីនេះ កងវិស្វកម្មពហុជំនាញយើង មាន តួនាទីផ្តល់សេវាកម្ម ក្នុងការស្ថាបនាជំរុំបន្ទាយជូនទីបញ្ហាការបណ្ដាកម្លាំង នានារបស់ MINUSCA ព្រមទាំងមន្ត្រីស៊ីវិលរបស់ អ.ស.ប.។

ឯកឧត្តម ចូសិហ្វ ស៊ូអ៊ី (Joseph Scheuer) អ្នកសម្របសម្រួល អង្គការសហប្រជាជាតិប្រចាំកម្ពុជា បានលើកឡើងថា ទ័ពមួកខៀវកម្ពុជា បានបំពេញភារកិច្ចដោយភាពក្លាហាន សេចក្តីថ្លៃថ្នូរ និងវិជ្ជាជីវៈក្នុងបរិយាកាសដ៏លំបាក។ ក្នុងគ្រាលំបាកទាំងនោះ ភាពក្លាហានរបស់អ្នកត្រូវបានបង្ហាញចេញយ៉ាងពិតប្រាកដ  អ្នកបានក្លាយជាអ្នករក្សាសន្តិភាពដ៏អង់អាច ដែលបានបមើ សហគមន៍នៃប្រជាជាតិនានា ដើម្បីស្វែងរកអនាគតដ៏ល្អប្រសើរ។

ក្នុងឱកាសនោះ ឯកឧត្តម ឧបនាយករដ្ឋមន្ត្រី ទៀ សីហា បានមានប្រសាសន៍ថា  រាជរដ្ឋាភិបាលបាន និងកំពុងខិតខំអភិវឌ្ឍមធ្យោបាយ សម្រាប់បំពាក់ជូនកងកម្លាំង ចូលរួមបេសកកម្មរក្សាសន្តិភាព អង្គការសហប្រជាជាតិ ពង្រឹងសមត្ថភាពដឹកនាំផ្នែកគោលនយោបាយ និងលើកកម្ពស់ការហ្វឹកហ្វឺនជំនាញបច្ចេកទេស លើគ្រប់វិស័យឱ្យកាន់តែមានប្រសិទ្ធភាពថែមទៀត និងបានត្រៀមខ្លួនជាស្រេច ក្នុងប្រព័ន្ធ UN PCRS ដោយបានរៀបចំកងចំនួន៤ ត្រៀមខ្លួនជាស្រេចដើម្បីឆ្លើយតប សំណូមពរភ្លាមៗ របស់អង្គការសហប្រជាជាតិ ដើម្បីចូលរួមក្នុងការថែរក្សាសន្តិភាពពិភពលោក៕

ដោយ សំ សាម៉ន