AKP ភ្នំពេញ ថ្ងៃទី១៥ ខែកក្កដា ឆ្នាំ២០២៥-- ក្រសួងសេដ្ឋកិច្ច និងហិរញ្ញវត្ថុ បានបើកវគ្គបណ្តុះបណ្តាល និងវិក្រឹតការស្តីពី «វិធាន និងបទប្បញ្ញត្តិស្តីពីលទ្ធកម្មសាធារណៈ» ជូនសិក្ខាកាមគោលដៅជាមន្ត្រីទទួលបន្ទុកកិច្ចលទ្ធកម្មសាធារណៈចំនួន៦៨នាក់ មកពីស្ថាប័នអនុវត្តលទ្ធកម្មរដ្ឋបាល ក្រុង-ស្រុក នៃខេត្តរតនគិរី មណ្ឌលគិរី ក្រចេះ ស្ទឹងត្រែង និងខេត្តត្បួងឃ្មុំ ក្រោមការដឹកនាំរបស់ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និងជាប្រធានក្រុមការងារកសាងសមត្ថភាព នៃក្រសួងសេដ្ឋកិច្ចនិងហិរញ្ញវត្ថុ កាលពីថ្ងៃទី១៤ ខែកក្កដា ឆ្នាំ២០២៥ នៅវិទ្យាស្ថានសេដ្ឋកិច្ច និងហិរញ្ញវត្ថុ។

ថ្លែងក្នុងពិធីនោះ ឯកឧត្តមបណ្ឌិតសភាចារ្យបានជម្រាបជូនអង្គពិធីថា រាជរដ្ឋាភិបាលក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់ និងប៉ិនប្រសប់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានដាក់ចេញនូវ «យុទ្ធសាស្ត្របញ្ចកោណ ដំណាក់កាលទី ១» ដើម្បីកំណើន ការងារ សមធម៌ ប្រសិទ្ធភាព និង ចីរភាព ដោយបន្តផ្ដោតលើ «ការធានាប្រសិទ្ធភាពសមិទ្ធកម្ម» តាមរយៈការអនុវត្តអភិក្រម «ជវភាពនៃប្រព័ន្ធតួអង្គតែមួយ» និង ការផ្ដល់អាទិភាពលើចំណុចគន្លឹះ៥ គឺ «មនុស្ស ផ្លូវ ទឹក ភ្លើង និងបច្ចេកវិទ្យា» សម្រាប់ការអភិវឌ្ឍសង្គម-សេដ្ឋកិច្ច និងការលើកកម្ពស់ផលិតភាពសេដ្ឋកិច្ច ដែលជាគ្រឹះ និង ជាមធ្យោបាយដ៏សំខាន់ ក្នុងការឆ្ពោះទៅសម្រេច ចក្ខុវិស័យកម្ពុជាឆ្នាំ ២០៥០។

ឯកឧត្តមបណ្ឌិតសភាចារ្យបានគូសរំលេចថា កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដែលត្រូវបានដាក់ឱ្យអនុវត្តដំបូងនៅឆ្នំា ២០០៤ ត្រូវបានចាត់ទុកជាឆ្អឹងខ្នងនៃកម្មវិធីកែទម្រង់ របស់រាជរដ្ឋាភិបាល បន្ទាប់ពីទទួលបានជោគជ័យត្រចះត្រចង់ក្នុងការកសាង «ភាពជឿទុកចិត្តបាននៃថវិកា» នៅក្នុងដំណាក់កាលទី ១ (២០០៤-២០០៨) ការកសាង «គណនេយ្យភាពហិរញ្ញវត្ថុ» ក្នុងដំណាក់កាលទី ២ (២០០៩-២០១៥) និងការផ្សារភ្ជាប់ «ថវិកាទៅនឹងគោលនយោបាយ» ក្នុងដំណាក់កាលទី ៣ (២០១៦-២០២២) កន្លងទៅនេះ។ បច្ចុប្បន្ន ការកែទម្រង់ការគ្រប់គ្រងហិរញ្ញវត្ថុសាធារណៈ កំពុងស្ថិតក្នុងដំណាក់កាលទី ៤ ដែលជាដំណាក់កាលចុងក្រោយ ក្នុងគោលដៅ ពង្រឹងគណនេយ្យភាពសមិទ្ធកម្ម ដែលត្រូវបានប្រកាសដាក់ឱ្យអនុវត្តជាផ្លូវការ កាលពីថ្ងៃទី២០ ខែមីនា ឆ្នាំ២០២៣ កន្លងទៅ ។ ការណ៍នេះធ្វើឱ្យការកសាង និង ការអភិវឌ្ឍសមត្ថភាព កាន់តែមានសារៈសំខាន់ ព្រោះថាការកែទម្រង់នេះបានឈានដល់ដំណាក់កាលស្មុគស្មាញ សិទ្ធិអំណាច និង ការទទួលខុសត្រូវកាន់តែច្រើនឡើង ត្រូវបានផ្ទេរឱ្យក្រសួងស្ថាប័ន និង មន្ទីរអង្គភាពក្រោមឱវាទ និង រដ្ឋបាលថ្នាក់ក្រោមជាតិ លើការគ្រប់គ្រងថវិកា និង ហិរញ្ញវត្ថុ។

ទន្ទឹមនឹងនេះ ឯកឧត្តមបានបញ្ជាក់អំពីសារៈសំខាន់នៃវគ្គបណ្តុះបណ្តាល និងវិក្រឹតការជាស៊េរីលើ «វិធាន និងបទប្បញ្ញត្តិស្តីពីលទ្ធកម្មសាធារណៈ» ពិតជាឆ្លើយតបនឹងតម្រូវការជាក់ស្ដែងរបស់ស្ថាប័នអនុវត្តលទ្ធកម្ម និងអង្គភាពថវិកាពាក់ព័ន្ធនឹងនីតិវិធីនៃការអនុវត្តកិច្ចលទ្ធកម្មសាធារណៈ ដែលជាមូលដ្ឋានគ្រឹះសម្រាប់គាំទ្រការអនុវត្តការងារប្រចាំថ្ងៃ ឱ្យកាន់តែមានផលិតភាព និងប្រសិទ្ធភាព សំដៅចូលរួមអនុវត្តការកែទម្រង់ការគ្រប់គ្រងហិរញ្ញវត្ថុសាធារណៈឱ្យសម្រេចជោគជ័យ។

ឯកឧត្តមបណ្ឌិតសភាចារ្យបានបន្ថែមទៀតថា ប្រព័ន្ធ FMIS ជាឧបករណ៍ឆ្អឹងខ្នងក្នុងការគ្រប់គ្រង ការរៀបចំ ការអនុវត្ត ការតាមដាន និង ការត្រួតពិនិត្យ ហិរញ្ញវត្ថុសាធារណៈ, ក្នុងនោះ មុខងារអនុវត្តកិច្ចលទ្ធកម្មសាធារណៈ ត្រូវបានដាក់បញ្ចូលក្នុងប្រព័ន្ធ FMIS ផងដែរ ។ ការណ៍នេះធ្វើឱ្យក្រសួង-ស្ថាប័ន និង រដ្ឋបាលថ្នាក់ក្រោមជាតិ ចាំបាច់ត្រូវបន្តពង្រឹង និង ពង្រីកសមត្ថភាព ជូនមន្ត្រីរបស់ខ្លួន លើជំនាញពាក់ព័ន្ធនឹងការប្រើប្រាស់ប្រព័ន្ធ FMIS ដើម្បីអាចបត់បែនបានទាន់ពេល ស្របទៅនឹងការប្រែប្រួលតម្រូវការ និង បរិការណ៍នៃបច្ចេកវិទ្យាព័ត៌មាន និង ឌីជីថល។ ជាមួយគ្នានេះដែរ ឯកឧត្តមបណ្ឌិតសភាចារ្យបានលើកទឹកចិត្តសិក្ខាកាមគោលដៅ ត្រូវយកចិត្តទុកដាក់ចូលរួមពិភាក្សា និងផ្តោះប្តូរយោបល់ឱ្យបានផុលផុស ដើម្បីចាប់យកចំណេះជំនាញពិតប្រាកដ សម្រាប់អនុវត្តកិច្ចលទ្ធកម្មសាធារណៈ នៅពេលត្រឡប់ទៅអង្គភាពរៀងៗខ្លួន ប្រកបដោយផលិតភាព និង ប្រសិទ្ធភាព៕

ដោយ ទូច វលក័្ខណ