AKP ភ្នំពេញ ថ្ងៃទី០៣ ខែកក្កដា ឆ្នាំ២០២៥ -- នៅមន្ទីរកិច្ចការនារីខេត្តកំពត ចាប់ពីថ្ងៃទី០១ ដល់ថ្ងៃទី០៣ ខែកក្កដា ឆ្នាំ២០២៥ នាយកដ្ឋានស្ត្រី និងសុខភាពនៃក្រសួងកិច្ចការនារី បានបើកវគ្គបណ្តុះបណ្តាលគ្រូបង្គោលស្តីពី «សុខភាពបន្តពូជ និងអាហារូបត្ថម្ភ» គាំទ្រដោយថវិកាកម្មវិធី (PB) របស់រាជរដ្ឋាភិបាលកម្ពុជា ក្រោមអធិបតីភាពលោកជំទាវ ពេជ ពិទូរ្យរដ្ឋា អនុរដ្ឋលេខាធិការក្រសួងកិច្ចការនារី ដោយមានការចូលរួមពីលោកស្រី ហួត រី  អនុប្រធានមន្ទីរកិច្ចការនារីខេត្តកំពត ជាអ្នកសម្របសម្រួល។

វគ្គបណ្តុះបណ្តាលនេះផ្ដោតលើប្រធានបទជាច្រើនទាក់ទងនឹងផ្នត់គំនិតយេនឌ័រ ការយល់ដឹងអំពីសុខភាពបន្តពូជ (ការប្រែប្រួលរាងកាយរបស់ក្មេងស្រី និងក្មេងប្រុសនៅពេលពេញវ័យ ការមករដូវ ប្រព័ន្ធបន្តពូជស្រ្តី និងបុរស ការបង្កកំណើត សុខភាពបន្តពូជ និងសិទ្ធ) និងអាហារូបត្ថម្ភ (មូលដ្ឋានគ្រឹះនៃអាហារូបត្ថម្ភ អាហារទាំង៣ក្រុម សន្ទស្សម៉ាសរាងកាយ ឱកាសមាស១០០០ថ្ងៃនៃជីវិត អាហារូបត្ថម្ភសម្រាប់ស្រ្តីមានផ្ទៃពោះ ការចំអិនអាហារបបរខាប់គ្រឿង និងការផ្តល់អាហារបន្ថែមដល់កូនអាយុចាប់ពី៦ខែ រហូតដល់២ ឆ្នាំ ជាដើម) ។

វគ្គបណ្តុះបណ្តាលត្រូវបានរៀបចំឡើងក្នុងគោលបំណងអភិវឌ្ឍសមត្ថភាពវិជ្ជាជីវៈ ជំនាញរបស់មន្រ្តីថ្នាក់ជាតិ និងថ្នាក់ក្រោមជាតិឱ្យមានសមត្ថភាពសមស្រប ក្នុងការផ្តល់ការអប់រំផ្សព្វផ្សាយបន្តនៅក្នុងសហគមន៍ប្រកបដោយគុណភាព និងប្រសិទ្ធភាព ដោយមានសិក្ខាកាមមកពី៩ខេត្ត ដូចជា កោះកុង  ព្រះសីហនុ  កំពង់ស្ពឺ  កណ្តាល ស្វាយរៀង ព្រៃវែង ស្ទឹងត្រែង តាកែវ និងខេត្តកំពត ដោយមានចំនួនសរុបទាំងអស់៤៩នាក់៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)