AKP ព្រៃវែង ថ្ងៃទី០៣ ខែកក្កដា ឆ្នាំ២០២៥--សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាបានថ្លែងឱ្យដឹងថា សភា នឹងកោះប្រជុំវិសាមញ្ញនៅថ្ងៃទី១១ ខែកក្កដា ឆ្នាំ២០២៥ខាងមុខនេះ ដើម្បីធ្វើវិសោធនកម្មរដ្ឋធម្មនុញ្ញដកសញ្ជាតិ ចំពោះបុគ្គលណាឃុបឃិតជាមួយបរទេស ដើម្បីបំផ្លាញផលប្រយោជន៍ជាតិខ្មែរ។ ការថ្លែងរបស់សម្ដេចតេជោប្រធានព្រឹទ្ធសភាបែបនេះ ក្នុងពិធីជួបសំណេះសំណាលជាមួយ សិស្ស និស្សិត លោកគ្រូ អ្នកគ្រូ នៅមជ្ឈ មណ្ឌលអប់រំ និងបណ្ដុះបណ្ដាល ជា ស៊ីម កំចាយមារ ក្នុងខេត្តព្រៃវែង នាព្រឹកថ្ងៃទី០៣ ខែកក្កដា ឆ្នាំ២០២៥។ សម្ដេចតេជោ ហ៊ុន សែន បានលើកឡើងថា វិសោធនកម្មរដ្ឋធម្មនុញ្ញ ដើម្បីដកសញ្ជាតិ គឺអាចធ្វើទៅរួច ដោយក្រុមប្រឹក្សាធម្មនុញ្ញបានពិនិត្យរួចរាល់ហើយ។ សម្ដេចតេជោបានគូសបញ្ជាក់ថា៖«សភា នឹងកោះប្រជុំវិសាមញ្ញ នៅថ្ងៃទី១១ ខែកក្កដា នេះហើយ។ រដ្ឋធម្មនុញ្ញ នឹងត្រូវបានកែ ដើម្បីផ្ដល់ឱកាសសម្រាប់ការដកសញ្ជាតិ អ្នកឯងឃុបឃិតជាមួយបរទេសប្រឆាំងខ្មែរ»។ 

សម្ដេចតេជោប្រធានព្រឹទ្ធសភាបានបន្ថែមថា លើកនេះ សំណើរួមគ្នារវាង រដ្ឋសភាទាំង ១២៥រូប និងរាជរដ្ឋាភិបាល ស្នើសុំព្រះមហាក្សត្រ និងត្រូវបានព្រះអង្គសួរទៅក្រុមប្រឹក្សាធម្មនុញ្ញរួចរាល់ផងដែរ។ សម្ដេចតេជោបានបន្ដថា ក្រុមប្រឹក្សាធម្មនុញ្ញកាលពីថ្ងៃទី០២ ខែកក្កដា បានបើកកិច្ចប្រជុំពេញអង្គក្រាបបង្គំទូលថ្វាយអង្គព្រះមហាក្សត្រ ពាក់ព័ន្ធនឹងការធ្វើវិសោធនកម្មមាត្រា ៣៣ នៃរដ្ឋធម្មនុញ្ញ ដោយបានបង្គំទូលថ្វាយថា ការធ្វើវិសោធនកម្មមាត្រា ៣៣ នៃរដ្ឋធម្មនុញ្ញប្រទេសកម្ពុជា «អាចធ្វើទៅបាន»៕

ដោយ៖ ប៊ុនរិទ្ធ