AKP បន្ទាយមានជ័យ ថ្ងៃទី០២ ខែកក្កដា ឆ្នាំ២០២៥--

វគ្គបណ្តុះបណ្តាលដ៏សំខាន់មួយស្តីពី "ការចារពិធីការ ការធ្វើបដិសណ្ឋារកិច្ចល្អ និងរបៀបកត់ត្រាការងារអត្រានុកូលដ្ឋាន” ត្រូវបានបើកជាផ្លូវការនៅព្រឹកថ្ងៃពុធ ទី០២ ខែកក្កដា ឆ្នាំ២០២៥ នៅសាលប្រជុំ (ក) សាលាខេត្តបន្ទាយមានជ័យ ដោយ មានការអញ្ជើញចូលរួមជាអធិបតីភាពពីសំណាក់លោក យឹម សំណាង អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ឯកឧត្តម អ៊ុ រាត្រី អភិបាលនៃគណៈអភិបាលខេត្ត។

វគ្គបណ្ដុះបណ្ដាលនេះរៀបចំឡើងក្នុងគោលបំណងពង្រឹងសមត្ថភាពដល់មន្ត្រីរាជការ មន្ត្រីជាប់កិច្ចសន្យា និងបុគ្គលិកស្ម័គ្រចិត្ត របស់រដ្ឋបាលក្រុង-ស្រុក និងរដ្ឋបាលឃុំ-សង្កាត់។ ការចូលរួមដ៏ផុសផុលក្នុងពិធីបើកនេះក៏មានវត្តមានពីសំណាក់លោកអភិបាលក្រុង ស្រុក នាយក នាយិកា ឃុំ-សង្កាត់ផងដែរ ដែលបញ្ជាក់ពីការយកចិត្តទុកដាក់ខ្ពស់ចំពោះការអភិវឌ្ឍធនធានមនុស្សនៅតាមមូលដ្ឋាន។

ក្នុងឱកាសនោះ លោក យឹម សំណាង អភិបាលរងខេត្ត បានថ្លែងនូវប្រសាសន៍គន្លឹះ និងបានសង្កត់ធ្ងន់ពីសារៈសំខាន់នៃវគ្គបណ្តុះបណ្តាលនេះ។ លោកបានលើកឡើងថា ការចារពិធីការ ការធ្វើបដិសណ្ឋារកិច្ចល្អ និងការកត់ត្រាការងារអត្រានុកូលដ្ឋាន គឺជាជំនាញចាំបាច់សម្រាប់មន្ត្រីគ្រប់លំដាប់ថ្នាក់ ដែលបម្រើការងារនៅតាមរដ្ឋបាលក្រុង-ស្រុក និងឃុំ-សង្កាត់។

លោកអភិបាលរងខេត្តបានបញ្ជាក់បន្ថែមថា "ការចារពិធីការត្រឹមត្រូវ និងច្បាស់លាស់ គឺជាកញ្ចក់ឆ្លុះបញ្ចាំងពីភាពស្ទាត់ជំនាញ និងវិជ្ជាជីវៈរបស់មន្ត្រីរាជការ។ ជាមួយគ្នានេះ ការធ្វើបដិសណ្ឋារកិច្ចល្អ គឺជារឿងសំខាន់បំផុតក្នុងការផ្តល់សេវាសាធារណៈប្រកបដោយគុណភាព និងភាពកក់ក្តៅជូនប្រជាពលរដ្ឋ ព្រោះវាជាផ្នែកមួយនៃការកសាងទំនុកចិត្តរបស់សាធារណជនមកលើរដ្ឋបាល។"

លោកក៏បានសង្កត់ធ្ងន់ទៅលើសារៈសំខាន់នៃការកត់ត្រាការងារអត្រានុកូលដ្ឋាន ដោយបានថ្លែងថា "ការកត់ត្រាអត្រានុកូលដ្ឋានប្រកបដោយភាពសុក្រឹត និងទៀងទាត់ គឺជារឿងមូលដ្ឋានគ្រឹះសម្រាប់គ្រប់គ្រងទិន្នន័យប្រជាពលរដ្ឋឱ្យបានត្រឹមត្រូវ ដែលជាមូលដ្ឋានសម្រាប់រៀបចំផែនការអភិវឌ្ឍន៍ និងផ្តល់សេវាផ្សេងៗប្រកបដោយប្រសិទ្ធភាព។ ដូច្នេះ មន្ត្រីគ្រប់រូបត្រូវយកចិត្តទុកដាក់ខ្ពស់ក្នុងការបំពេញការងារនេះដោយស្មារតីទទួលខុសត្រូវខ្ពស់។"

ជាមួយគ្នានោះ លោក យឹម សំណាង ក៏បានជំរុញឱ្យសិក្ខាកាមទាំងអស់ខិតខំយកចិត្តទុកដាក់សិក្សា និងផ្លាស់ប្តូរបទពិសោធន៍គ្នាទៅវិញទៅមកក្នុងអំឡុងពេលវគ្គបណ្ដុះបណ្ដាល ដើម្បីទទួលបានចំណេះដឹង និងជំនាញថ្មីៗសម្រាប់អនុវត្តការងារប្រចាំថ្ងៃឱ្យកាន់តែមានប្រសិទ្ធភាព និងសង្ឃឹមយ៉ាងមុតមាំថា បន្ទាប់ពីបញ្ចប់វគ្គនេះ សិក្ខាកាមទាំងអស់នឹងក្លាយជាធនធានដ៏មានតម្លៃក្នុងការចូលរួមកែលម្អ និងពង្រឹងគុណភាពសេវាសាធារណៈជូនប្រជាពលរដ្ឋនៅមូលដ្ឋានរៀងៗខ្លួន។

វគ្គបណ្តុះបណ្តាលនេះរំពឹងថានឹងផ្តល់នូវចំណេះដឹង និងជំនាញជាក់ស្តែងដល់អ្នកចូលរួម ដើម្បីរួមចំណែកដល់ការកែលម្អការងាររដ្ឋបាលសាធារណៈ និងលើកកម្ពស់កម្រិតនៃការផ្តល់សេវាជូនប្រជាពលរដ្ឋនៅទូទាំងខេត្តបន្ទាយមានជ័យ៕

ដោយ ឈុន សារ៉ាត