AKP ភ្នំពេញ ថ្ងៃទី០៤ ខែឧសភា ឆ្នាំ២០២៦-- គម្រោងតាមដាន និងពិនិត្យការនេសាទខុសច្បាប់ មិនបានរាយការណ៍ និងមិនបានចុះបញ្ជី គឺជាសកម្មភាពស្នូលមួយនៃអង្គការអភិរក្សសមុទ្រកម្ពុជា MCC ដែលផ្តោតទៅលើការចុះអង្កេត និងការការពារជីវចម្រុះ ដែនជម្រកធនធានជលផលសមុទ្រសំខាន់ៗដូចជា តំបន់វាលស្មៅសមុទ្រ តំបន់ថ្មប៉ប្រះទឹក និងតំបន់ថនិកសត្វសមុទ្រជាដើម។

បើតាមការឱ្យដឹងពីអង្គការ MCC នៅថ្ងៃទី០៤ ខែឧសភា ឆ្នាំ២០២៦ថា កិច្ចខិតខំប្រឹងប្រែងទាំងនេះគឺដើម្បីធានាឱ្យបាននូវការនេសាទប្រកបដោយនិរន្តរភាព សម្រាប់សហគមន៍មូលដ្ឋាន ប្រជានេសាទលក្ខណៈគ្រួសារ និងគាំទ្រដល់កំណើនអេកូទេសចរណ៍ធម្មជាតិផងដែរ។ ការកត់ត្រាសកម្មភាពគម្រោងក្នុងពេលចុះបេសកកម្មម្ដងៗ បានពង្រឹងការយល់ដឹងទៅលើបរិស្ថានបន្ថែមសម្រាប់ក្រុមការងាររបស់អង្គការ MCC ។ ហើយសកម្មភាពទាំងអស់នោះបានក្លាយជាចំណែកដ៏សំខាន់ ដែលអាចចូលរួមថែរក្សាសមុទ្រឱ្យមានភាពសម្បូររុងរឿងរហូតទៅ។

គម្រោងនេះត្រូវបានអនុវត្តដោយមានការគាំទ្រពីក្រសួងកសិកម្ម រុក្ខាប្រមាញ់ និងនេសាទ និងដោយមានកិច្ចសហការយ៉ាងជិតស្និទ្ធជាមួយ អង្គនាយកដ្ឋានជលផល។ អង្គការ MCC ក៏សូមថ្លែងអំណរគុណយ៉ាងជ្រាលជ្រៅផងដែរ ចំពោះការគាំទ្រពី មូលនិធិ Biome Conservation មូលនិធិ 30x30 Southeast Asia Ocean Fund និងមូលនិធិ McPike and Zuma Foundation៕

ដោយ ណយ នឿន (ប្រភព៖ MCC)