AKP ភ្នំពេញ ថ្ងៃទី០៤ ខែឧសភា ឆ្នាំ២០២៦-- ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ក្នុងសិក្ខាសាលាផ្តល់សុពលភាពលើផែនទីបង្ហាញផ្លូវចីរភាពនៃកម្មវិធីអេដស៍(២០២៦-២០២៩) នាព្រឹកថ្ងៃទី០៤ ខែឧសភា ឆ្នាំ២០២៦ នៅសណ្ឋាគារសាន់វ៉េបានថ្លែងថា ដំណើរឆ្ពោះទៅរកចីរភាពរបស់យើងបានចាប់ផ្តើមតាំងពីឆ្នាំ២០១៨ ហើយថ្ងៃនេះយើងបានមកដល់ចំណុចរបត់ដ៏សំខាន់មួយក្នុងការធានានូវការឆ្លើយតបដែលបានធ្វើឱ្យកម្ពុជាក្លាយជាអ្នកដឹកនាំសកលក្នុងការប្រយុទ្ធនឹងជំងឺអេដស៍។   

ក្នុងសិក្ខាសាលាដែលមានការចូលរួមពីគ្រប់បណ្តាភាគីពាក់ព័ន្ធឯកឧត្តមទេសរដ្ឋមន្រ្តីបានគូសបញ្ជាក់ថា សមិទ្ធផលរួមគ្នារបស់យើង គឺជាសក្ខីភាពនៃការព្យាយាមដែលសម្រេចបាន រួមមាន ការកាត់បន្ថយការឆ្លងថ្មីរហូតដល់៤៥% និងអត្រាបង្ក្រាបមេរោគ ដែលបច្ចុប្បន្ននេះមានលើសពី៩៨% ធ្វើឱ្យកម្ពុជាកំពុងស្ថិតនៅលើផ្លូវឆ្ពោះទៅសម្រេចបានគោលដៅ ៩៥-៩៥-៩៥ មុនកាលកំណត់។

ឯកឧត្តមបានលើកឡើងថា ដើម្បីជម្នះបញ្ហាប្រឈមបច្ចុប្បន្ន អាជ្ញាធរជាតិប្រយុទ្ធនឹងជំងឺអេដស៍ និងក្រសួងសុខាភិបាលត្រូវតែផ្លាស់ប្តូរតួនាទីពីគ្រាន់តែជាអ្នកគ្រប់គ្រងជំនួយ ទៅជាអ្នកកសាងប្រព័ន្ធសុខាភិបាលជាតិដ៏រឹងមាំ។ យើងកំពុងផ្លាស់ប្តូរពីការធ្វើការបែបដាច់ដោយឡែកពីគ្នា ទៅជាស្ថាបត្យកម្មសុខាភិបាលជាតិរួមតែមួយ។ ការណ៍នេះតម្រូវឱ្យមានការដឹកនាំជាយុទ្ធសាស្ត្រដែលយន្តការសម្របសម្រួលកម្រិតជាតិ(CCM) ធានាថាគ្រប់សកម្មភាពទាំងអស់បម្រើឱ្យចក្ខុវិស័យអធិបតេយ្យភាពរបស់កម្ពុជា។ 

ឯកឧត្តមទេសរដ្ឋមន្រ្តី អៀង មូលី បានសង្កត់ធ្ងន់ថា ជោគជ័យរបស់យើងនឹងមិនត្រូវបានវាស់វែងដោយចំនួនទឹកប្រាក់ជំនួយនោះទេ។ ប៉ុន្តែត្រូវធ្វើការវាស់វែងដោយប្រសិទ្ធភាពដែលយើងបញ្ជ្រាបសេវាសង្គ្រោះជីវិតទាំងនេះទៅក្នុងប្រព័ន្ធជាតិរបស់យើង។ យើងត្រូវមានទិន្នន័យច្បាស់លាស់ ផែនទីបង្ហាញផ្លូវរួចរាល់ និងមុខងារដែលត្រូវបំពេញនៅក្នុងដៃរួចហើយ។

ឯកឧត្តមបានស្នើថា ដំណាក់កាលធានាចីរភាព ត្រូវបានកំណត់ដោយភាពជាម្ចាស់ទាំងស្រុងរបស់កម្ពុជា និងការប្តេជ្ញាចិត្តមិនងាករេឆ្ពោះទៅកាន់ជំនាន់ដែលគ្មានអេដស៍។ ចូរយើងយកមេរៀនដែលទទួលបានពីការឆ្លើយតបនឹងជំងឺអេដស៍មកពង្រឹងប្រព័ន្ធសុខាភិបាលទាំងមូលរបស់យើង និងពន្លឿនវឌ្ឍនភាពឆ្ពោះទៅសម្រេចបាននូវការគ្របដណ្តប់សុខភាពជាសកលសម្រាប់ប្រជាជនកម្ពុជាគ្រប់រូប៕

ដោយ៖ ចាន់ សុភឿន (ប្រភព៖ អាជ្ញាធរជាតិប្រយុទ្ធនឹងជំងឺអេដស៍)