AKP ភ្នំពេញ ថ្ងៃទី៣០ ខែមិថុនាឆ្នាំ២០២៥--

ក្រោមកិច្ចសហប្រតិបត្តិការរវាងមន្ទីរអប់រំទីក្រុងប៊ូសាន នៃសាធារណរដ្ឋកូរ៉េ និងក្រសួងអប់រំ យុវជន និងកីឡា នៃព្រះរាជាណាចក្រកម្ពុជា  ដែលដឹកនាំសម្របសម្រួលដោយនាយកដ្ឋានបរិវត្តកម្មឌីជីថល គណៈគ្រប់គ្រង លោកគ្រូ អ្នកគ្រូកម្ពុជាបានទទួលការបណ្តុះបណ្តាលការអប់រំបែបឌីជីថលស្តីពីវិធីសាស្ត្រនៃការបញ្ជ្រាបបច្ចេកវិទ្យាឌីជីថលសម្រាប់ការបង្រៀន និងរៀនក្នុងបរិវត្តឧស្សាហកម្ម ៤.០ ដែល វគ្គបណ្តុះបណ្តាលនេះធ្វើឡើងនៅទីក្រុងប៊ូសាន នៃសាធារណរដ្ឋកូរ៉េពីថ្ងៃទី២៣ ខែមិថុនា ដល់ថ្ងៃទី២៩ ខែមិថុនា ឆ្នាំ២០២៥ មានសិក្ខាកាមចូលរួមសរុបចំនួន២៥នាក់ ស្រី០៦នាក់។

សម្រាប់ឆ្នាំ២០២៥នេះ កម្មវិធីវគ្គបណ្តុះបណ្តាលត្រូវបានរៀបចំឡើងយ៉ាងល្អច្បាស់លាស់សម្រាប់សិក្ខាកាមដើម្បីទទួលបានចំណេះដឹង និងបទពិសោធន៍ថ្មីស្របនឹងបរិវត្តកម្មឌីជីថលក្នុងវិស័យអប់រំ ដែលបានកើតឡើង និងវិវត្តយ៉ាងឆាប់រហ័សនៅក្នុងការរស់នៅរបស់យើងទាំងអស់គ្នា ក្នុងការបញ្ជ្រាបបច្ចេកវិទ្យាឌីជីថលថ្មី ជាពិសេសបញ្ញាសិប្បនិម្មិតសម្រាប់ជំនួយដល់ការបង្រៀន និងរៀន។ ប៉ុន្តែទោះជាបច្ចេកវិទ្យារីកចម្រើនលឿនយ៉ាងណាក៏ដោយ ក៏មិនអាចជំនួសតួនាទីរបស់គ្រូបង្រៀននៅក្នុងថ្នាក់រៀនបានដែរ ហេតុនេះការពង្រឹងសមត្ថភាពរបស់គ្រូបង្រៀននាពេលនេះមានសារ:សំខាន់ណាស់។ នេះជាការគូសបញ្ជាក់ពីក្រសួងអប់រំ យុវជន និងកីឡា។

តាមរយៈវគ្គបណ្តុះបណ្តាលនេះ លោក គឹម ស៊ុកជូន ប្រធានមន្ទីរអប់រំទីក្រុងប៊ូសាន បានសម្តែងការអបអរសាទរខួប២០ឆ្នាំនៃកិច្ចសហប្រតិបត្តិការរវាងមន្ទីរអប់រំក្រុងប៊ូសាន និងក្រសួងអប់រំ យុវជន និងកីឡា កម្ពុជាសម្រាប់កិច្ចការងារនេះ ដែលបាននាំមកនូវការផ្លាស់ប្តូរជាវិជ្ជមានយ៉ាងច្រើនដល់ប្រព័ន្ធអប់រំនៅកម្ពុជាក្នុងការលើកកម្ពស់ការអប់រំបែបឌីជីថល។ កិច្ចសហប្រតិបត្តិការនេះបាន និងកំពុងចូលរួមចំណែកយ៉ាងសំខាន់ក្នុងការលើកកម្ពស់ការអប់រំបែបឌីជីថល តាមរយៈការអភិវឌ្ឍសមត្ថភាពសិក្ខាកាមកម្ពុជាឱ្យទទួលបានបំណិនឌីជីថលថ្មីស្របតាមការវិវត្តនៃបច្ចេកវិទ្យា អាចជួយគ្រូបង្រៀនកម្ពុជាបានយ៉ាងច្រើនក្នុងការធ្វើទំនើបកម្មវិធីសាស្ត្របង្រៀនកាន់តែមានប្រសិទ្ធភាព ជាពិសេសការបញ្ជ្រាបបញ្ញាសិប្បនិម្មិតក្នុងគ្រប់រូបភាពនៃការអប់រំ។ ក្នុងនោះដែរ កម្មវិធីនេះបានផ្តល់នូវផលជះជាវិជ្ជមានជាច្រើនដល់ការអភិវឌ្ឍប្រព័ន្ធអប់រំបែបឌីជីថលនៅកម្ពុជា ដោយនឹង ១. ចូលរួមជាមួយរដ្ឋាភិបាលក្នុងអភិវឌ្ឍធនធានមនុស្សកម្ពុជាឆ្ពោះទៅសម្រេចចក្ខុវិស័យឆ្នាំ២០៣០ និង២០៥០។ ២. ចូលរួមចំណែកយ៉ាងសកម្មជាមួយបេសកកម្មរបស់ក្រសួងលើការធ្វើបរិវត្តកម្មឌីជីថលប្រព័ន្ធអប់រំឆ្ពោះទៅរកការអប់រំប្រកបដោយគុណភាព សមធម៌ បរិយាបន្ន និងចីរភាព។ ៣. ការបង្កើតសហគមន៍សិក្សាវិជ្ជាជីវៈសម្រាប់អតីតសិក្ខាកាមប៊ូសានក្នុងចែករំលែកបន្ត និង៤. ការបង្កើនលទ្ធផលនៃការសិក្សារបស់សិស្សលើការចាប់យកជំនាញ STEM និងបច្ចេកវិទ្យាសម្រាប់អភិវឌ្ឍអាជីពនាពេលអនាគត៕

ដោយ៖ ចាន់ សុភឿន (ប្រភព៖ ក្រសួងអប់រំ)