AKP ភ្នំពេញ ថ្ងៃទី៣០ ខែមិថុនា ឆ្នាំ២០២៥-អាជ្ញាធរជាតិប្រយុទ្ធប្រឆាំងគ្រឿងញៀនបានចាត់តាំងមន្ត្រីចំនួន១០រូប ដើម្បីចូលរួមក្នុងកិច្ចប្រជុំលើកទី២ នៃក្រុមការងារត្រួតពិនិត្យសារធាតុគីមីផ្សំ ក្រុមការងារអប់រំបង្ការ និងក្រុមការងារកោសល្យវិច័យគ្រឿងញៀន នៃយន្តការ ប្រទេសហត្ថលេខីអនុស្សរណៈយោគយល់គ្នានៃប្រទេសមហាអនុតំបន់ទន្លេមេគង្គឆ្នាំ១៩៩៣ ដែលនឹងប្រព្រឹត្តទៅចាប់ពីថ្ងៃទី០១-០៣ ខែកក្កដា ឆ្នាំ២០២៥ នៅទីក្រុងបាងកក ប្រទេសថៃ។ 

ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀននិងជាប្រធានប្រតិភូកម្ពុជា បានជម្រាបជូនឱ្យដឹងមុនចាកចេញពីកម្ពុជាថា កិច្ចប្រជុំ នេះរៀបចំឡើងដោយអង្គការសហប្រជាជាតិទទួលបន្ទកគ្រឿងញៀននិងឧក្រិដ្ឋកម្ម (UNODC)ដែលមានសមាសភាពចូលរួមជាមន្រ្តីមកពីបណ្តាប្រទេសហត្ថលេខី MoU ឆ្នាំ១៩៩៣ ទាំង៦ រួមមាន កម្ពុជា ចិន ថៃ វៀតណាម ឡាវ មីយ៉ាន់ម៉ា និងអង្គការ UNODC សរុបចំនួន ៦០នាក់ ។ ឯកឧត្តមឧត្តមសេនីយ៍ឯកបានបញ្ជាក់ថា កិច្ចប្រជុំនេះដែរ គឺជាកិច្ចប្រជុំលើកទី២ដើម្បីធ្វើបច្ចុប្បន្នភាពលើការអនុវត្តនូវគម្រោងស្តីពីការរួមគ្នាដោះស្រាយបញ្ហាគ្រឿងញៀនសំយោគនៅក្នុងមហាអនុតំបន់ទន្លេមេគង្គបន្ទាប់ពីគម្រោងនេះត្រូវបានអនុម័តដោយកិច្ចប្រជុំថ្នាក់រដ្ឋមន្រ្តីលើកទី១៤ នៃប្រទេសហត្ថលេខី MoU ឆ្នាំ១៩៩៣ កាលពីខែកញ្ញា ឆ្នាំ ២០២៣ កន្លងទៅ នៅទីក្រុងប៉េកាំង និងបានធ្វើការប្រជុំលើកទី១កាលពីឆ្នាំ២០២៤កន្លងទៅ។ 

ឯកឧត្តម ឧត្តមសេនីយ៍ឯក នាក់ យុទ្ធា បានជម្រាបឱ្យដឹងផងដែរថា  អង្គការ UNODC បានស្នើប្រទេសទាំងអស់ចាត់តំណាងរបស់ខ្លួនចំនួន១០ រូប ចូលជាសមាជិកនៃក្រុមការងារត្រួតពិនិត្យសារធាតុគីមីផ្សំ ក្រុមការងារអប់រំបង្ការ និងក្រុមការងារកោសល្យវិច័យគ្រឿងញៀនដែលបានចូលរួមប្រជុំលើកទី១កាលពីឆ្នាំ២០២៤ កន្លងទៅ ដោយផ្តោតលើខ្លឹមសារសំខាន់ៗមួយចំនួនដូចជា  ទី១.បន្ត បច្ចុប្បន្នភាពនៃស្ថានភាពគ្រឿងញៀនដែលពាក់ព័ន្ធតាមវិស័យនៃក្រុមការងារនីមួយៗ ក្នុងប្រទេសសមាជិក។ ទី២.បន្តចែករម្លែកបទពិសោធន៍ល្អៗ យន្តការឆ្លើយតបក្នុងការអនុវត្តការងារតាមវិស័យនីមួយៗនាពេលកន្លងមក។ ទី៣.បន្តការពិភាក្សាពីតម្រូវការសម្រាប់អនុវត្តផែនការសកម្មភាពគម្រោងក្នុងកិច្ចប្រជុំលើកទី២នឹងចាប់ថ្ងៃទី០១-០៣ ខែកក្កដា ឆ្នាំ២០២៥ នៅទីក្រុងបាងកក ប្រទេសថៃ៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន