AKP ភ្នំពេញ ថ្ងៃទី៣០ ខែមិថុនា ឆ្នាំ២០២៥ -- ផ្លូវថ្មើរជើង (Walk Street) នៅរាជធានីភ្នំពេញ ឥឡូវល្បីល្បាញខ្លាំង ផ្អើលពេញពិភពលោករហូតដឹងដល់ក្រុមតន្ត្រីកងទ័ពជើងអាកាសសហរដ្ឋអាមេរិក ស្ម័គ្រចិត្ដ មកប្រគំតន្រ្តីកំដរភ្ញៀវជាតិ អន្ដរជាតិកម្សាន្ដ នារាត្រីថ្ងៃអាទិត្យ ទី២៩ មិថុនា ២០២៥ យ៉ាងសប្បាយរីករាយក្រោមម្លប់សន្ដិភាព។ ខណៈនេះរដ្ឋបាលរាជធានីភ្នំពេញបានអនុញ្ញាតឱ្យក្រុមតន្ត្រីទ័ពអាកាសអាមេរិកមកប្រគំតន្ត្រីនៅផ្លូវថ្មើរជើង (Walk Street) តបតាមការស្នើសុំរបស់ក្រុមតន្ត្រីកងទ័ពជើងអាកាសសហរដ្ឋអាមេរិកសុំរៀបចំការប្រគំតន្ត្រីនៅផ្លូវថ្មើរជើង ដែលធ្វើឡើងនៅយប់ថ្ងៃអាទិត្យទី២៩ ខែមិថុនា ឆ្នាំ២០២៥ នៅចំណុចមុខវត្តឧណ្ណាលោមនៃផ្លូវថ្មើរជើងរាជធានីភ្នំពេញ។

លោកស្រី ដោ សម្ផស្ស នាយិការងរដ្ឋបាលរាជធានីភ្នំពេញ និងជាអ្នកនាំពាក្យផងនោះបានឱ្យដឹងថា ស្របពេលដំណើរទស្សនកិច្ចចន្លោះពីថ្ងៃទី២៨ ខែមិថុនា ដល់ថ្ងៃទី០៤ ខែកក្កដា ឆ្នាំ២០២៥ ក្រុមតន្ត្រីកងទព័អាកាសប្រចាំតំបន់ប៉ាស៊ីហ្វិករបស់សហរដ្ឋអាមេរិក បានស្នើសុំរៀបចំការប្រគំតន្ត្រីនៅផ្លូវថ្មើរជើង (Walk Street) នារាជធានីភ្នំពេញក្នុងន័យចូលរួមអបអរសាទរខួបលើកទី៧៥ឆ្នាំនៃចំណងការទូតប្រទេសទាំងពីរកម្ពុជាអាមេរិក រួមទាំងធ្វើការងារមនុស្សធម៌នៅតាមសាលារៀន និងសហគមន៍នានានៅរាជធានីភ្នំពេញ និងតាមបណ្តាខេត្តមួយចំនួនទៀតផងដែរ។ នេះជាលើកដំបូងហើយដែលផ្លូវថ្មើរជើងទទួលបានការចាប់អារម្មណ៍ពីកងទ័ពជើងអាកាសរបស់សហរដ្ឋអាមេរិកស្របពេលដែលផ្លូវថ្មើរជើងកំពុងទទួលបានការចាប់អារម្មណ៍យ៉ាងខ្លាំងពីប្រជាពលរដ្ឋគ្រប់មជ្ឈដ្ឋានទាំងក្នុង និងក្រៅប្រទេសដោយមានការផ្តួចផ្តើមបង្កើតឡើងដោយឯកឧត្ដម ឃួង ស្រេង  អភិបាលរាជធានីភ្នំពេញ ក្រោមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ផ្លូវថ្មើរជើងត្រូវបានសម្ពោធដាក់ឱ្យប្រើប្រាស់ជាផ្លូវការកាលពីថ្ងៃទី២១ មិថុនា ក្រោមអធិបតីភាពដ៏ខ្ពង់ខ្ពស់របស់សម្តេចប្រមុខរាជរដ្ឋាភិបាល និងលោកជំទាវបណ្ឌិត តែត្រូវបានលើកពេលវិញក្រោយពីដាក់ឱ្យដំណើរការសាកល្បងអស់រយៈពេលជាង៥ខែកន្លងមកដោយដំណើរការ២ថ្ងៃក្នុងមួយសប្តាហ៍ គឺថ្ងៃសៅរ៍ និងថ្ងៃអាទិត្យ។

ឯកឧត្ដម  ឃួង ស្រេង និងលោកជំទាវជាភរិយា តែងបានយកចិត្តទុកដាក់យ៉ាងខ្លាំងទៅលើបញ្ហាសន្តិសុខសុវត្ថិភាពសណ្តាប់ធ្នាប់ របៀបរៀបរយសាធារណៈ និងបរិស្ថាននៅតាមបណ្តោយផ្លូវថ្មើរជើងរួមទាំងហេដ្ឋារចនាសម្ពន្ធ័ផ្សេងៗ និងការរៀបចំជាស្តង់លក់ដូរម្ហូបអាហារនំចំណីក៏ដូចសម្ភារប្រើប្រាស់ផ្សេងៗ និងបានណែនាំដល់អាជ្ញាធរដែនដីពាក់ព័ន្ធ កម្លាំងមានសមត្ថកិច្ចត្រូវតែធានាឱ្យបាននូវសន្តិសុខ សណ្តាប់ធ្នាប់ល្អ និងមានអនាម័យស្អាតជានិច្ចដែលនឹងទាក់ទាញភ្ញៀវទេសចរជាតិ អន្តរជាតិមកលេងកម្សាន្តកាន់តែច្រើន ដូចប្រជាពលរដ្ឋបានលើកឡើងថា ផ្លូវថ្មើរជើងមាត់ទន្លេមានមនុស្សមកលេងកាន់តែច្រើនឡើងៗដែលប្រៀបបាននឹងបុណ្យអុំទូករៀងរាល់ចុងសប្តាហ៍៕

ដោយ សួស សំរិត