AKP បន្ទាយមានជ័យ ថ្ងៃទី៣០ ខែមិថុនា ឆ្នាំ២០២៥ -- ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពក្នុងពិធីជួបសំណេះសំណាលជាមួយមន្ត្រីកសិកម្មឃុំ-សង្កាត់ ក្នុងក្រុងសិរីសោភ័ណ ខេត្តបន្ទាយមានជ័យ កាលពីរសៀលថ្ងៃទី២៩ ខែមិថុនា ឆ្នាំ២០២៥ ដោយមានការចូលរួមពីឯកឧត្តមរដ្ឋលេខាធិការ គង់ ច័ន្ទវាសនា និងឯកឧត្តម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យផងដែរ។ ជំនួបនេះបានគូសបញ្ជាក់ពីការប្ដេជ្ញាចិត្តរបស់រាជរដ្ឋាភិបាលក្នុងការលើកកម្ពស់វិស័យកសិកម្ម និងជីវភាពប្រជាកសិករ។

ក្នុងឱកាសនោះ ឯកឧត្តមរដ្ឋមន្ត្រី ឌិត ទីណា បានលើកឡើងពីកម្មវិធីគោលនយោបាយអាទិភាពទី៥ និងទី៦ របស់រាជរដ្ឋាភិបាល នីតិកាលទី៧ ដែលផ្តោតសំខាន់លើការរក្សាលំនឹងថ្លៃកសិផល ការដាក់ពង្រាយមន្ត្រីកសិកម្មឃុំទូទាំងប្រទេស និងការរៀបចំសហគមន៍កសិកម្មទំនើប។ គោលដៅចម្បងនៃគោលនយោបាយទាំងនេះគឺដើម្បីជួយគាំទ្រផ្នែកបច្ចេកទេស ផលិតកម្ម ទីផ្សារ និងសេដ្ឋកិច្ច ស្របតាមទស្សនទានដ៏ស៊ីជម្រៅ "មានហូប មានប្រើ មានបាន និងមានរហូត"។ ទស្សនទាននេះឆ្លុះបញ្ចាំងពីចក្ខុវិស័យយូរអង្វែងក្នុងការធានាសន្តិសុខស្បៀង លើកកម្ពស់ផលិតភាពកសិកម្ម និងបង្កើតលទ្ធភាពសេដ្ឋកិច្ចប្រកបដោយនិរន្តរភាពសម្រាប់ប្រជាកសិករ។

ជាមួយគ្នានោះ ឯកឧត្តមរដ្ឋមន្ត្រីបានផ្ដល់អនុសាសន៍សំខាន់ៗមួយចំនួនដល់មន្ត្រីទាំងអស់សហការស្នើសុំការគាំទ្រពីអ្នកជំនាញក្នុងករណីចាំបាច់ តាមរយៈលេខ ១២៨៩ ដែលជាខ្សែទូរស័ព្ទបន្ទាន់សម្រាប់ប្រឹក្សាយោបល់ផ្នែកកសិកម្ម។ ក្រៅពីនេះ ឯកឧត្តមបានសង្កត់ធ្ងន់លើសារៈសំខាន់នៃការពិនិត្យវាយតម្លៃស្ថានភាពឱ្យបានច្បាស់លាស់ ដោះស្រាយបញ្ហាឱ្យចំគោលដៅ កាត់បន្ថយថ្លៃដើមផលិត និងជំរុញកសិករឱ្យផ្សារភ្ជាប់ខ្លួនជាមួយសហគមន៍កសិកម្មទំនើប។ ឯកឧត្តមរដ្ឋមន្ត្រីបានបញ្ជាក់ថា ការភ្ជាប់កសិករទៅនឹងសហគមន៍កសិកម្មទំនើបនឹងអាចឱ្យក្រសួងកសិកម្មមានលទ្ធភាពជួយគាំទ្រឱ្យកសិករទទួលបានផលចំណេញសេដ្ឋកិច្ច និងលើកកម្ពស់ជីវភាពរស់នៅរបស់ពួកគេ។ នេះជាយន្តការមួយដ៏សំខាន់ក្នុងការកសាងភាពធន់ និងនិរន្តរភាពក្នុងវិស័យកសិកម្មកម្ពុជា។

ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានថ្លែងអំណរគុណចំពោះវត្តមានរបស់ឯកឧត្តមរដ្ឋមន្ត្រី ឌិត ទីណា និងក្រុមការងារ ដែលបានចុះមកជួបសំណេះសំណាលផ្ទាល់ជាមួយមន្ត្រីកសិកម្មឃុំ-សង្កាត់ក្នុងខេត្ត។ ឯកឧត្តមអភិបាលបានលើកឡើងពីសក្ដានុពល និងបញ្ហាប្រឈមនានាក្នុងវិស័យកសិកម្មនៅខេត្តបន្ទាយមានជ័យ និងបានគូសបញ្ជាក់ពីការប្ដេជ្ញាចិត្តរបស់រដ្ឋបាលខេត្តក្នុងការគាំទ្ររាល់កម្មវិធី និងគោលនយោបាយរបស់ក្រសួងកសិកម្ម ដើម្បីធានាបាននូវការអនុវត្តប្រកបដោយប្រសិទ្ធភាព និងសម្រេចបាននូវគោលដៅរួមក្នុងការអភិវឌ្ឍវិស័យកសិកម្ម។

តំណាងមន្ត្រីកសិកម្មឃុំ-សង្កាត់ដែលបានចូលរួមក្នុងពិធីនេះ បានបង្ហាញពីចំណាប់អារម្មណ៍ និងការសាទរយ៉ាងខ្លាំងចំពោះប្រសាសន៍ណែនាំរបស់ឯកឧត្តមរដ្ឋមន្ត្រី។ មន្ត្រីមួយរូបបានថ្លែងថា "យើងពិតជារីករាយ និងមានមោទកភាពដែលបានក្លាយជាផ្នែកមួយនៃយន្តការដ៏សំខាន់នេះ។ ការណែនាំរបស់ឯកឧត្តមរដ្ឋមន្ត្រីបានផ្តល់ភាពច្បាស់លាស់ដល់ពួកយើងអំពីតួនាទី និងភារកិច្ច ហើយជាពិសេសការទទួលបានការគាំទ្រពីអ្នកជំនាញតាមរយៈលេខ១២៨៩ គឺជាជំនួយដ៏សំខាន់សម្រាប់យើងក្នុងការអនុវត្តការងារនៅមូលដ្ឋាន"។

មន្ត្រីម្នាក់ទៀតបានលើកឡើងថា "ការដាក់ពង្រាយមន្ត្រីកសិកម្មឃុំ និងការបង្កើតសហគមន៍កសិកម្មទំនើប គឺជាគំនិតផ្តួចផ្តើមដ៏ល្អប្រសើរ ដែលនឹងជួយកសិករឱ្យទទួលបានចំណេះដឹង បច្ចេកទេស និងទីផ្សារកាន់តែប្រសើរ។ យើងនឹងខិតខំប្រឹងប្រែងឱ្យអស់ពីលទ្ធភាពដើម្បីអនុវត្តនូវរាល់ការណែនាំ និងរួមចំណែកដល់ការរីកចម្រើននៃវិស័យកសិកម្មនៅក្នុងមូលដ្ឋានរបស់យើង"។

ក្នុងពិធីជួបសំណេះសំណាលនេះបានបង្ហាញពីឆន្ទៈដ៏មុតមាំរបស់រាជរដ្ឋាភិបាល តាមរយៈក្រសួងកសិកម្ម រុក្ខាប្រមាញ់ និងនេសាទ ក្នុងការបន្តពង្រឹង និងពង្រីកវិស័យកសិកម្មឱ្យកាន់តែមានភាពរឹងមាំ ប្រកួតប្រជែង និងនិរន្តរភាព សម្រាប់ជាប្រយោជន៍ដល់ជីវភាពប្រជាកសិករ និងសេដ្ឋកិច្ចជាតិទាំងមូល៕

ដោយ ឈុន សារ៉ាត