AKP ភ្នំពេញ ថ្ងៃទី២៩ ខែមិថុនា ឆ្នាំ២០២៥ -- ដើម្បីចូលរួមលើកកម្ពស់ផលិតភាព និងការអភិវឌ្ឍទីផ្សារឧស្សាហកម្មវាយនភណ្ឌកម្ពុជានៅតាមរោងចក្រ​កាត់ដេរឱ្យកាន់តែខ្លាងក្លាថែមទៀត ក្រុមហ៊ុន Jack Co., Ltd. កាលពីថ្ងៃទី២៨ ខែមិថុនា ឆ្នាំ ២០២៥ នៅតំបន់សេដ្ឋកិច្ចពិសេសភ្នំពេញ បានរៀបចំពិធីផ្សព្វផ្សាយផលិតផលម៉ាស៊ីនដេរម៉ាក Jack ដែលថ្មី​បំផុត​ជំនាន់ទី២ ប្រើបច្ចេកវិទ្យា AI ដ៏ទំនើប ដើម្បីដោះស្រាយឧបសគ្គក្នុងដំណើរការផលិតក្នុងវិស័យ​វាយនភណ្ឌ​​នៅកម្ពុជា ។

លោក Shen Qiming នាយកក្រុមហ៊ុន SEDUNO កម្ពុជា និងជាស្ថាបនិកក្រុមហ៊ុន Youcheng Sewing Machine Co., Ltd.ក៏បានអះអាងផងដែរថា ការផ្សព្វផ្សាយផលិតផលម៉ាស៊ីនដេរ Jack ថ្មី​បំផុត​ជំនាន់​ទី២ ដែលប្រើបច្ចេកវិទ្យា AI ដ៏ទំនើប មិនត្រឹមតែជាពេលវេលាដ៏សំខាន់នៅ​ក្នុងដំណើរអភិវឌ្ឍន៍របស់​ម៉ាស៊ីន​ដេររបស់ Jack ប៉ុណ្ណោះទេ ថែមទាំងជាចំណុចសំខាន់នៃដំណើរថ្មីនៃឧស្សាហកម្មផលិត​សម្លៀក​បំពាក់ផងដែរ។ លោកបានលើកឡើងថា តម្រូវការនៃទីផ្សារសម្លៀកបំពាក់កម្ពុជាបានផ្លាស់ប្តូរយ៉ាងខ្លាំង ដែលការបញ្ជាទិញមានលក្ខណៈតិចតួច ច្រើនម៉ូត និងស្មុគស្មាញ ហើយការផ្លាស់ប្តូរនេះ ដូចជារលក​ដ៏ខ្លាំងក្លា បានវាយប្រហារលើគំរូផលិតកម្មសម្លៀកបំពាក់បែបប្រពៃណី និងបានដាក់តម្រូវការថ្មីៗ​ដែល​មិនធ្លាប់មានពីមុនមកលើឧបករណ៍ផលិតកម្មរបស់យើង ជាពិសេសម៉ាស៊ីនដេរ។

លោកបាននិយាយថា នៅក្រុមហ៊ុនរបស់លោកគឺជាដៃគូដ៏ស្មោះត្រង់នៃម៉ាស៊ីនដេរម៉ាក Jack និងជាសាក្សី និងអ្នកប្រើប្រាស់ផលិតផលរបស់ Jack ដែលកំពុងធ្វើឱ្យផលិតកម្មរបស់ក្រុមហ៊ុនមានភាពប្រសើរឡើង​ជាលំដាប់។ លោកនាយកក្រុមហ៊ុនបានបន្ថែមថា អស់រយៈពេលជាច្រើនឆ្នាំមកនេះ Jack បាន​ឈរជាមួយយើងក្នុងវិស័យសម្លៀកបំពាក់ និងផ្តល់នូវការគាំទ្រពេញលេញដល់យើង។ ដោយសារ Jack បានបន្តច្នៃប្រឌិត និងកែលម្អផលិតផលយ៉ាងសកម្ម យើងអាចមានឧបករណ៍ផលិតកម្មដែលមានគុណ​ភាពល្អ និងប្រសិទ្ធភាពខ្ពស់ ហើយមានសុទិដ្ឋិនិយមក្នុងការដោះស្រាយបញ្ហាទីផ្សារ។

លោក Shen Qiming បានសង្ឃឹមថា Jack នឹងបន្តរក្សាភាពយកចិត្តទុកដាក់ចំពោះទីផ្សារ តាមដាន​តម្រូវការជាក់ស្តែងរបស់សហគ្រាសសម្លៀកបំពាក់ បន្តការវិនិយោគលើការស្រាវជ្រាវ និងអភិវឌ្ឍន៍ និង​ចេញផ្សាយម៉ាស៊ីនដេរបន្ថែមទៀតដែលសមស្របនឹងចង្វាក់ផលិតកម្មឆាប់រហ័ស ហើយដៃគូជាមួយយើង​ក្នុងការដោះស្រាយការប្រឈមនាពេលអនាគត។ លោកបន្ដថា ផលិតផលម៉ាស៊ីនដេរ Jack ថ្មីបំផុត​ជំនាន់ទី២ ដែលប្រើបច្ចេកវិទ្យា AI ដ៏ទំនើប យើងនឹងធ្វើជាដៃគូជាមួយ Jack ប្រើប្រាស់អត្ថ​ប្រយោជន៍​ពីឧបករណ៍របស់ពួកគេ រួមគ្នាស្វែងរកផ្លូវថ្មីនៃការអភិវឌ្ឍន៍វិស័យ និងរួមគ្នាលើកកម្ពស់គុណភាពនៃ​វិស័យ​សម្លៀកបំពាក់ ដើម្បីបង្កើតអនាគតដ៏ល្អប្រសើរជាមួយគ្នា។

ជាមួយគ្នានេះដែរ​ លោក He Enjia ប្រធានសមាគមវាយនភណ្ឌកម្ពុជា និងជាអនុប្រធានសមាគម TAFTAC បាន​មានប្រសាសន៍ថា ការក្រឡេកមើលថយក្រោយទៅលើដំណើរដ៏យូរលង់របស់ឧស្សា​ហកម្ម​វាយ​​នភណ្ឌ ម៉ាស៊ីនដេរគឺជា "បេះដូង" ដែលជំរុញការផ្លាស់ប្តូរក្នុងវិស័យនេះ។ លោកបានបញ្ជាក់ថា ការ​ផ្សព្វផ្សាយ​ផលិតផលម៉ាស៊ីនដេរថ្មីខាងលើនេះមិនត្រឹមតែជាគោលការណ៍សំខាន់នៃការធ្វើឱ្យបច្ចេក​វិទ្យា​កាន់​តែទាន់សម័យប៉ុណ្ណោះទេ ថែមទាំងជាសញ្ញាសំខាន់នៃយុគសម័យថ្មីដ៏ឆ្លាតវៃនៃវិស័យវាយនភណ្ឌ​ផងដែរ។ លោកប្រធានសមាគមបានអះអាងថា ផលិតផលថ្មីនេះ នឹងផ្តល់នូវការគាំទ្រដ៏រឹងមាំ​ដល់ការ​អភិវឌ្ឍ​​វិស័យ​វាយនភណ្ឌដែលអាចអនុវត្តន៍បាន និងនឹងរួមចំណែកយ៉ាងសំខាន់ដល់សុខុមាលភាពនៃ​ទីផ្សារ​​វាយ​​នភណ្ឌ​ពិភពលោក ជាពិសេសនៅក្នុងប្រទេសកម្ពុជា។

លោកបានបញ្ជាក់ទៀតថា ឧស្សាហកម្មវាយណ​ភណ្ឌ​ប្រ​ទេសកម្ពុជាកំពុងជួបប្រទះនឹងការខ្វះខាត​កម្លាំង​ពលកម្ម និងផលប៉ះពាល់ពីការកើនឡើងអាករ​ពន្ធ​របស់សហរដ្ឋអាមេរិក ដែលធ្វើឱ្យសហគ្រាសត្រូវ​ការ​ភ្ជាប់ជាមួយឧបករណ៍ឆ្លាតវៃ ដើម្បីបង្កើនផលិត​ភាព និងបន្ថយសំពាធ។ លោក He Enjia បានថ្លែង​បញ្ជាក់ផងដែរថា៖ «យើងអាចទាញយកឱកាសនេះដើម្បីពង្រឹងការ​សហការ​ច្នៃប្រឌិតនៃខ្សែសង្វាក់​ផលិត​កម្ម ស្រាវជ្រាវរួមគ្នាលើបញ្ហាបច្ចេកទេស និងពង្រីកទីផ្សារអន្តរជាតិ ដើម្បីគូរ​ផែនទីដ៏អស្ចារ្យនៃការអភិវឌ្ឍ​វិស័យវិស័យវាយនភណ្ឌដែលមានគុណភាពខ្ពស់»។

សូមជម្រាបជូនថា ក្នុងពិធីផ្សព្វផ្សាយផលិតផលខាងលើ លោក Zong Changdong ប្រធានផ្នែកយុទ្ធ​សាស្ត្រអតិថិជនពិភពលោករបស់ Jack Technology និងលោក Ke Huijun អ្នកគ្រប់គ្រងរួមនៃផ្នែក​យុទ្ធ​សាស្ត្រពិភពលោករបស់ Jack Technology បានធ្វើការណែនាំលម្អិត និងគួរឱ្យចាប់អារម្មណ៍​អំពី​ផលិតផល ម៉ាស៊ីនដេរ Jack ថ្មីបំផុតជំនាន់ទី២ ដែលប្រើបច្ចេកវិទ្យា AI ដ៏ទំនើបនេះ។ ចាប់ពី​គោលការណ៍បច្ចេកទេសដ៏ទាន់សម័យ ទៅដល់លក្ខណៈពិសេសដ៏រឹងមាំ និងចាប់ពីគំនិតរចនាដ៏ច្នៃប្រឌិត ទៅការអនុវត្តជាក់ស្តែង រាល់ចំណុចលម្អិតបានធ្វើឱ្យអតិថិជនមានជំនឿទុកចិត្តយ៉ាងពេញលេញ​លើ​ផលិត​​ផលម៉ាស៊ីនដេរ Jack ថ្មីបំផុតជំនាន់ទី២ ដែលប្រើបច្ចេកវិទ្យា AI ដ៏ទំនើបនេះ ដែលនឹងផ្តល់នូវស្នា​ដៃ​ថ្មីដល់វិស័យសម្លៀកបំពាក់កម្ពុជា នាំមកនូវប្រសិទ្ធភាពសេដ្ឋកិច្ចដ៏កាន់តែជាក់លាក់ និងជួយឱ្យ​សហ​គ្រាសកាន់តែខ្លាំងក្លាក្នុងទីផ្សារប្រកួតប្រជែង។

ជាមួយនឹងបទបង្ហាញរបស់ក្រុមហ៊ុនក៏បានឱ្យដឹងផងដែរថា ក្នុងដំណើរការក្នុងរោងចក្រកាត់ដេរ ការបាក់​ម្ជុល លោតម្ជុល បែកខ្សែ និងលិចប្រេង កើតឡើងជាញឹកញាប់ ដែលប៉ះពាល់ដល់គុណភាព​សម្លៀក​បំពាក់ ហើយបណ្តាលឱ្យមានការខាតបង់ផលិតផល ដែលធ្វើឱ្យកម្មករត្រូវបន្ថយល្បឿន។ ប៉ុន្តែផលិតផល​ម៉ាស៊ីនដេរ Jack ថ្មីបំផុតជំនាន់ទី២ ដែលប្រើបច្ចេកវិទ្យា AI ដ៏ទំនើបអាចដោះស្រាយបញ្ហា​ដ៏ស្មុគ​ស្មាញ​ទាំងនេះដោយឆ្លាតវៃ ដែលបានបង្កើនគុណភាពផលិតកម្ម និងប្រសិទ្ធភាពយ៉ាងខ្លាំង។

ក្នុងឱកាសនោះដែរ ក្រុមហ៊ុនក៏បានចេញផ្សាយម៉ាស៊ីន M9 និងម៉ាស៊ីនដេរហោប៉ៅ V6  ព្រមទាំងរៀប​ចំការបង្ហាញប្រកួតប្រជែងផលិតផល ម៉ាស៊ីនដែរម៉ាកJack និងព្រឹត្តិការណ៍ចុះហត្ថលេខាកិច្ចសន្យាការ​បញ្ជាទិញ។ ក្រុមហ៊ុន SEDUNO កម្ពុជា បានចុះហត្ថលេខាកិច្ចសន្យាទិញច្រើនជាងគេ៕

ដោយ៖ រិទ្ធី