AKP បន្ទាយមានជ័យ ថ្ងៃទី២៩ ខែមិថុនា ឆ្នាំ២០២៥ --

ឯកឧត្តម កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ និងជាតំណាងរាស្ត្រមណ្ឌលខេត្តបន្ទាយមានជ័យ នៅព្រឹកថ្ងៃទី២៩ ខែមិថុនា ឆ្នាំ២០២៥ នេះ បានដឹកនាំក្រុមការងារអញ្ជើញចុះសំណេះសំណាល សួរសុខទុក្ខ និងនាំយកអំណោយជាគ្រឿងឧបភោគបរិភោគ រួមជាមួយថវិកាមួយចំនួន ប្រគល់ជូនកងកម្លាំងប្រដាប់អាវុធនៅទិសទី១ បន្ទាយមានជ័យ ដែលកំពុងឈរជើងតាមបណ្ដោយព្រំដែនដើម្បីការពារបូរណភាពទឹកដីពីការឈ្លានពានរបស់សត្រូវនោះ។

ក្នុងឱកាសនោះ ឯកឧត្តម កែ គឹមយ៉ាន បានពាំនាំបណ្តាំផ្ញើសួរសុខទុក្ខ ការយកចិត្តទុកដាក់ និងជូនពរជ័យពី សម្តេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន  សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិតរួមនឹងឥស្សរជនគណបក្សប្រជាជនកម្ពុជា ជូនចំពោះកងកម្លាំងទាំងអស់សូមជួបតែពុទ្ធពរទាំង ៤ប្រការ អាយុ វណ្ណ: សុខ: ពល: កុំបីឃ្លៀងឃ្លាតឡើយ។

ឯកឧត្តម បានថ្លែងនូវប្រសាសន៍ដោយក្ដីគោរព និងកោតសរសើរខ្ពស់ចំពោះកងកម្លាំងទាំងអស់ ដែលបានលះបង់កម្លាំងកាយ កម្លាំងចិត្ត ប្រាជ្ញា ស្មារតី យាមកាមទាំងយប់ទាំងថ្ងៃ ដោយមិនគិតពីការនឿយហត់ ដើម្បីបុព្វហេតុការពារជាតិ មាតុភូមិ និងប្រជាជន។

ឯកឧត្តម បានសង្កត់ធ្ងន់ថា «បងប្អូនកងកម្លាំងប្រដាប់អាវុធទាំងអស់ពិតជាវីរបុរសពិតប្រាកដរបស់ជាតិ។ ការលះបង់របស់បងប្អូន គឺជាមូលដ្ឋានគ្រឹះនៃសុខសន្តិភាព ស្ថិរភាព និងការអភិវឌ្ឍរបស់ប្រទេសជាតិ។ ក្នុងនាមថ្នាក់ដឹកនាំ ក៏ដូចជាប្រជាពលរដ្ឋទូទៅ ពិតជាដឹងគុណយ៉ាងជ្រាលជ្រៅចំពោះបងប្អូន ដែលបានបំពេញតួនាទីយ៉ាងសកម្មក្នុងការថែរក្សាបូរណភាពទឹកដី និងសន្តិសុខជាតិ»។

ឯកឧត្តមក៏បានរំលឹកដល់ការរីកចម្រើនរបស់ប្រទេសជាតិក្នុងពេលបច្ចុប្បន្ន ដែលមិនអាចកាត់ផ្ដាច់បានពីកិច្ចខិតខំប្រឹងប្រែងរបស់កងកម្លាំងប្រដាប់អាវុធ។ ជាមួយគ្នានោះដែរ ឯកឧត្តមក៏បានណែនាំដល់កងកម្លាំងទាំងអស់ឱ្យបន្តប្រកាន់ខ្ជាប់នូវស្មារតីសាមគ្គីភាពផ្ទៃក្នុង បង្កើនការយកចិត្តទុកដាក់លើសុខភាពផ្ទាល់ខ្លួន និងត្រៀមលក្ខណៈជានិច្ចដើម្បីទប់ស្កាត់រាល់សកម្មភាពប៉ុនប៉ងឈ្លានពានណាមួយពីសំណាក់សត្រូវ។
 
លោកឧត្តមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី៥ ជាមេបញ្ជាការទិសទី១ បន្ទាយមានជ័យ តំណាងកងកម្លាំងប្រដាប់អាវុធ បានសម្ដែងនូវក្ដីរំភើប និងអំណរគុណយ៉ាងជ្រាលជ្រៅចំពោះឯកឧត្តម កែ គឹមយ៉ាន និងក្រុមការងារ ដែលបានអញ្ជើញចុះសួរសុខទុក្ខ និងនាំយកអំណោយជាច្រើនដល់ទីតាំងឈរជើង។ ពួកគេបានចាត់ទុកថា ការចុះសួរសុខទុក្ខនេះ គឺជាការលើកទឹកចិត្តដ៏ធំធេងសម្រាប់កងកម្លាំងទាំងអស់ ដែលកំពុងបំពេញភារកិច្ចនៅតាមបណ្ដោយព្រំដែន។

លោកឧត្តមសេនីយ៍ទោ ឈុន ម៉ៅ បានថ្លែងនូវការប្ដេជ្ញាចិត្តយ៉ាងមុតមាំថា «ពួកយើងខ្ញុំទាំងអស់គ្នា សូមប្ដេជ្ញាការពារបូរណភាពទឹកដីឱ្យបានគង់វង្ស មិនអនុញ្ញាតឱ្យសត្រូវណាមកបំពានបានឡើយ។ ទោះបីជាត្រូវប្រឈមមុខនឹងការលំបាក និងគ្រោះថ្នាក់យ៉ាងណាក៏ដោយ ក៏ពួកយើងខ្ញុំនៅតែបន្តបំពេញភារកិច្ចនេះឱ្យបានល្អបំផុត ស្របតាមពាក្យស្លោក "ស្លាប់ក៏ស្លាប់ទៅ ដើម្បីជាតិ មាតុភូមិ និងប្រជាជន"»។

កងកម្លាំងបានបន្តទៀតថា ការយកចិត្តទុកដាក់ពីសំណាក់ថ្នាក់ដឹកនាំ គឺជាកម្លាំងចលករដ៏សំខាន់ ដែលជំរុញឱ្យពួកគេកាន់តែមានទឹកចិត្ត និងស្មារតីខ្ពស់ក្នុងការបំពេញបេសកកម្មការពារជាតិ។

ដំណើរចុះសួរសុខទុក្ខ និងនាំយកអំណោយរបស់ឯកឧត្តម កែ គឹមយ៉ាន នៅពេលនេះ មិនត្រឹមតែបានផ្ដល់ជាសម្ភារៈចាំបាច់ប៉ុណ្ណោះទេ ប៉ុន្តែថែមទាំងបានពង្រឹងនូវស្មារតីស្នេហាជាតិ និងការប្ដេជ្ញាចិត្តរបស់កងកម្លាំងជួរមុខក្នុងការការពារព្រំដែន និងថែរក្សាសន្តិភាពជូនជាតិមាតុភូមិបានយ៉ាងគង់វង្ស៕

ដោយ: ឈុនសារ៉ាត