AKP ភ្នំពេញ ថ្ងៃទី២៩ ខែមិថុនា ឆ្នាំ២០២៥--

គណៈកម្មការរៀបចំការប្រកួតកីឡាតេក្វាន់ដូ ITF ជើងឯកអាស៊ីអាគ្នេយ៍ លើកទី២ ឆ្នាំ២០២៥ នៅកម្ពុជាបានប្រារព្ធពិធីបំពាក់មេដាយជាផ្លូវការ នៅថ្ងៃទី២៩ ខែមិថុនា ឆ្នាំ២០២៥ សម្រាប់វិញ្ញាសាចំនួន២២ ដែលបានបញ្ចប់ការប្រកួត កាលពីថ្ងៃទីមួយ ថ្ងៃទី២៨ ខែមិថុនា ម្សិលមិញ។

ពិធីបំពាក់មេដាយជាផ្លូវការត្រូវបានធ្វើឡើងក្រោមវត្តមានដ៏ខ្ពង់ខ្ពស់របស់ឯកឧត្តមទេសរដ្ឋមន្ត្រី កែវ រ៉េមី ប្រធានសហព័ន្ធកីឡាតេក្វាន់ដូ ITF អាស៊ីអាគ្នេយ៍ និងជាប្រធានសហព័ន្ធកីឡាតេក្វាន់ដូ ITF កម្ពុជា និងលោក Ri Yong Son ប្រធានសហព័ន្ធកីឡាតេក្វាន់ដូ ITF អន្តរជាតិ ព្រមទាំងអញ្ជើញចូលរួមផ្តល់កិត្តិយសបំពាក់មេដាយពីឯកឧត្តម ផាន់ វណ្ណរ័ត្ន អនុប្រធានទី១ សហព័ន្ធតេក្វាន់ដូ ITF កម្ពុជា ព្រមទាំងប្រតិភូមកពីបណ្តាប្រទេសនានាផងដែរ។

គិតត្រឹមម៉ោង ១២:០០ ថ្ងៃទី២៩ ខែមិថុនា ឆ្នាំ២០២៥នេះ ក្នុងនាមជាម្ចាស់រៀបចំការប្រកួតកីឡាតេក្វាន់ដូ ITF ជើងឯកអាស៊ីអាគ្នេយ៍លើកទី២ ឆ្នាំ២០២៥ កម្ពុជាកំពុងក្តោបក្តាប់ម្ចាស់ដំណែងចំណាត់ថ្នាក់លេខ១លើតារាងមេដាយ ដោយអត្តពលិកកម្ពុជា ឈ្នះមេដាយសរុប ៦៤គ្រឿង (មេដាយមាស ៣០ ប្រាក់២៩ និងសំរឹទ្ធ៥) ស្មើនឹង៤៨%, ម៉ាឡេស៊ី ចំណាត់ថ្នាក់លេខ២ ទទួលបានមេដាយសរុប ៣២គ្រឿង (មាស១០ ប្រាក់៦ និងសំរឹទ្ធ១៦) ២៤% វៀតណាម ចំណាត់ថ្នាក់លេខ៣ ទទួលបានមេដាយសរុប ២៦គ្រឿង (មាស ២ ប្រាក់៣ និងសំរឹទ្ធ២១) ១៩%, សិង្ហបុរី ឈរលេខ៤ មេដាយសរុប ៤ គឺប្រាក់២ និងសំរឹទ្ធ២ ខណៈហ្វីលីពីន ឈរលេខ៥ មេដាយប្រាក់១ និងសំរឹទ្ធ៦ រីឯឥណ្ឌូណេស៊ី ឈរលេខ៦ ទទួលបានមេដាយប្រាក់ ១គ្រឿង។

យ៉ាងណា ការប្រកួតគិតត្រឹមម៉ោង ១២:០០ ថ្ងៃទី២៩ ខែមិថុនានេះ គឺបានបញ្ចប់លើវិញ្ញាសាចំនួន៤២ ហើយការប្រកួតកំពុងបន្តយ៉ាងសកម្មនៅល្ងាចថ្ងៃនេះ និងបន្តនៅថ្ងៃទី៣០ ខែមិថុនា ១ថ្ងៃទៀត ដោយនៅសល់ជាច្រើនវិញ្ញាសាទៀត។ ការប្រកួតកីឡាតេក្វាន់ដូ ITF ជើងឯកអាស៊ីអាគ្នេយ៍ លើកទី២ ពីថ្ងៃទី២៨-៣០ ខែមិថុនា ឆ្នាំ២០២៥ នៅវិមានពហុកីឡដ្ឋានជាតិអូឡាំពិក ដោយប្រកួតលើវិញ្ញាសាសរុប ១៤៥វិញ្ញាសា ឈុតក្រោម១៣ឆ្នាំ ក្រោម១៥ឆ្នាំ ក្រោម១៧ឆ្នាំ និងឈុតធំ។ ការប្រកួតនេះមានប្រតិភូ គ្រូបង្វឹក កីឡាករ កីឡាការិនីចូលរួមសរុបជិត ២០០នាក់មកពី៦ប្រទេស៕

ដោយ ហេង ណាលីន