AKP ភ្នំពេញ ថ្ងៃទី២៩ ខែមិថុនា ឆ្នាំ២០២៥ -- លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា បានថ្លែងថា កម្មវិធីតិចណូវេសិន និងអនាគតទេពកោសល្យឌីជីថល បានឆ្លុះបញ្ចាំងពីផលជះជាវិជ្ជមានប្រកបដោយប្រសិទ្ធភាព និងស្មារតីទទួលខុសត្រូវក្នុងការអនុវត្តកម្មវិធីក្រៅម៉ោងសិក្សា ស្របតាមអនុសាសន៍ដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ 

កម្មវិធីនេះបានចូលរួមគាំទ្រពង្រឹងចំណេះដឹងផ្នែកបច្ចេកវិទ្យាជំនាញឌីជីថល សហគ្រិនភាព ការកសាងអាជីព លើកកម្ពស់ការអនុវត្តកម្មវិធីក្រៅម៉ោងសិក្សា ការបង្កើតក្លឹបសិក្សា ពង្រឹងវិជ្ជាសម្បទា បំណិនសម្បទា និងចរិយាសម្បទា ព្រមទាំងបំណិនទន់ផ្សេងៗ ដូចជាការដោះស្រាយបញ្ហា ការសហការ ធ្វើការងារជាក្រុម ការបង្កើតគំនិតច្នៃប្រឌិតថ្មីៗ ការធ្វើស្វ័យសិក្សាដែលជាបំណិនដ៏ចាំបាច់ឆ្លើយតបទៅនឹងភាពរីកចម្រើននាយុគសម័យបច្ចេកវិទ្យាឌីជីថល បញ្ញាសិប្បនិម្មិត ព្រមទាំងបានប្រែក្លាយយុវជនកម្ពុជាទៅជា មូលធនមនុស្សនាសតវត្សរ៍ទី២១។ ការថ្លែងរបស់លោកជំទាវបណ្ឌិតរដ្ឋលេខាធិការប្រចាំការខាងលើនេះ ធ្វើឡើងនៅក្នុងពិធីបើកកម្មវិធីប្រកួតប្រជែងថ្នាក់ជាតិតិចណូវេសិន និងអនាគតទេពកោសល្យឌីជីថល ឆ្នាំ២០២៥ នាថ្ងៃទី២៨ ខែមិថុនា ឆ្នាំ២០២៥។

តាងនាមក្រសួងអប់រំ យុវជន និងកីឡា លោកជំទាវបណ្ឌិត គឹម សេដ្ឋានី បានអបអរសាទរចំពោះក្មួយៗ បេក្ខជនទាំង ១៥ក្រុម ដែលបានខិតខំប្រឹងប្រែងរហូតឈានដល់ការប្រកួតថ្នាក់ជាតិនាថ្ងៃនេះ ខណៈសម្រាប់ឆ្នាំ២០២៥ នេះជាឆ្នាំទី១១ ដែលកម្មវិធីតិចណូវេសិនបានប្រារព្ធឡើងក្នុងប្រទេសកម្ពុជា ហើយក៏ជាឆ្នាំដំបូងដែលបានបើកឱកាសឱ្យមានការចូលរួមពីកុមារ និងយុវជនឱ្យបានសិក្សាយល់ដឹង ប្រកួតប្រជែង និងបង្កើនចំណាប់អារម្មណ៍ពួកគាត់នៅក្នុងការប្រើប្រាស់បច្ចេកវិទ្យាក្នុងការដោះស្រាយបញ្ហា។

លោកជំទាវបានថ្លែងអំណរគុណដល់ក្រុមការងារ គ្រូដឹកនាំ អ្នកស្ម័គ្រចិត្តទាំងអស់ ដែលបានលះបង់កម្លាំងកាយចិត្តចំណាយពេលវេលាផ្ទាល់ខ្លួនជួយតម្រង់ទិសដៅដល់ក្មួយៗបេក្ខជនទាំងអស់តាំងពីដើមរហូតមកទល់ពេលនេះ និងបានអំពាវនាវដល់គណៈគ្រប់គ្រងសាលារៀនជួយសហការសម្របសម្រួលបង្កភាពងាយស្រួលដល់លោកគ្រូ អ្នកគ្រូ សិស្សានុសិស្សអាចចូលរួមក្នុងកម្មវិធីប្រកួតប្រជែង និងបញ្ចេញសមត្ថភាព និងសូមលើកទឹកចិត្តដល់ឪពុកម្តាយ អាណាព្យាបាលទាំងអស់ឱ្យយកចិត្តទុកដាក់គាំទ្រកូនចៅ ពិសេសក្មេងស្រីឱ្យចូលរួមក្នុងកម្មវិធីប្រកួតប្រជែងផ្សេងៗ។

ឆ្លៀតក្នុងឱកាសនោះ លោកជំទាវបណ្ឌិតបានថ្លែងអំណរគុណចំពោះក្រុមការងារនាយកដ្ឋានបរិវត្តកម្មឌីជីថលក្រសួងអប់រំ យុវជន និងកីឡា និងក្រសួងប្រៃសណីយ៍ និងទូរគមនាគមន៍ មូលនិធិ ស.អ ក្រុមការងារ Technovation ក្រុមហ៊ុន Tech for Kids Academy ក្រុមហ៊ុន ៦០៦ ឌីជីថល ព្រមទាំងដៃគូសហការទាំងអស់ ដែលខិតខំប្រឹងប្រែងសហការគ្នាបន្តដំណើរការកម្មវិធីប្រកួតនេះរហូតមកទល់បច្ចុប្បន្នដែលសម្រេចបាននូវសមិទ្ធផលគួរជាទីមោទន និងសូមបន្តគាំទ្រ និងលើកទឹកចិត្តក្រុមការងារឱ្យបន្តសហការដើម្បីដំណើរការកម្មវិធីនេះនៅឆ្នាំបន្តបន្ទាប់ទៀត៕

ដោយ៖ ចាន់ សុភឿន (ប្រភព៖ ក្រសួងអប់រំ)