AKP កំពង់ធំ ថ្ងៃទី២៩ ខែមិថុនា ឆ្នាំ២០២៥ -- លោកស្រី លំ គន្ធារី អភិបាលរងខេត្តកំពង់ធំ បានអញ្ជើញជួបសំណេះសំណាល សួរសុខទុក្ខ និងនាំយកសម្លៀកបំពាក់ប្រជាការពារជូនប្រជាការពារចំនួន ៤៧នាក់ក្នុងភូមិនចំនួន០៤ គឺភូមិក្តីដូង ភូមិសស្លែង ភូមិអូរសំបួរ និងភូមិពាមគ្រែង នៅឃុំក្តីដូង ស្រុកកំពង់ស្វាយ ខេត្តកំពង់ធំ កាលពីរសៀលថ្ងៃទី២៨ ខែមិថុនា ឆ្នាំ២០២៥ និងដោយមានការអញ្ជើញចូលរួមពីឯកឧត្តម ប្លុង ពុទ្ធកូរ៉ា សមាជិកក្រុមប្រឹក្សាខេត្តកំពង់ធំ។

លោកស្រី លំ គន្ធារី បានមានប្រសាសន៍លើកឡើងពីការខិតខំប្រឹងប្រែងការយកចិត្តទុកដាក់ចូលរួមការពារសន្តិសុខនៅតាមភូមិវត្តអារាម និងកម្មវិធីផ្សេងៗរបស់បងប្អូនប្រជាការពារបានបម្រើជូនបងប្អូនប្រជាពលរដ្ឋឱ្យមានសុវត្ថិភាពក្នុងការរស់នៅ និងទ្រព្យសម្បត្តិរបស់ខ្លួនប្រកបដោយការទទួលខុសត្រូវខ្ពស់។ លោកស្រីអភិបាលរងខេត្តកំពង់ធំ បានកោតសរសើរដល់កម្លាំងប៉ុស្តិ៍នគរបាលឃុំក្តីដូង និងប្រជាការពារទាំងអស់ដែលបានលះបង់កម្លាំងកាយ កម្លាំងចិត្ត និងពេលវេលាចូលរួមការពារសន្តិសុខជូនបងប្អូនប្រជាពលរដ្ឋឱ្យមានសុវត្ថិភាពក្នុងពិធីផ្សេងៗ។ ជាពិសេស កម្លាំងប្រជាការពារទាំងអស់បានសាមគ្គីគ្នា យោគយល់គ្នាទៅវិញទៅមក ចូលរួមរក្សាសន្តិសុខសណ្ដាប់ធ្នាប់បម្រើការនៅពេលមានកម្មវិធីផ្សេងៗក្នុងសហគមន៍ឱ្យមានដំណើរការពុំមានរឿងអ្វីកើតឡើងនោះឡើយ។

លោកស្រី លំ គន្ធារី អភិបាលរងខេត្តកំពង់ធំ បានផ្ដាំផ្ញើដល់បងប្អូនប្រជាការពារទាំងអស់ ត្រូវតែបន្តយកចិត្តទុកដាក់ អនុវត្តការងាររបស់ខ្លួនបន្តទៀត ឱ្យមានភាពស្មោះត្រង់ និងជឿជាក់លើខ្លួនឯង ដើម្បីការពារសុខសន្តិភាពជូនប្រជាពលរដ្ឋក្នុងសហគមន៍ ក៏ដូចប្រទេសជាតិឱ្យមានភាពរីកចម្រើនបន្តទៅមុខទៀត។

សូមបញ្ជាក់ថា សម្រាប់បងប្អូនប្រជាការពារនៅឃុំក្តីដូងចំនួន ៤៧នាក់ ដោយនៅក្នុងនោះ ភូមិក្តីដូងមានចំនួន ១២នាក់ ភូមិពាមគ្រែងចំនួន ១៣នាក់ ភូមិអូរសំបួរចំនួន ១២នាក់ និងភូមិស្លែងចំនួន ១០នាក់ ដោយក្នុងម្នាក់ទទួលបានសម្លៀកបំពាក់ប្រជាការពារ ១កំប្លេ៕

ដោយ: ស៊ុម វណ្ណា