AKP បន្ទាយមានជ័យ ថ្ងៃទី២៩ ខែមិថុនា ឆ្នាំ២០២៥ -- ឯកឧត្ដមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា កាលពីរសៀលថ្ងៃ២៨ ខែមិថុនា ឆ្នាំ២០២៥ បានអញ្ជើញចុះពិនិត្យការរស់នៅ ការដាំដុះដំណាំ និងសំណេះសំណាលសួរសុខទុក្ខជាមួយបងប្អូនអតីតយុទ្ធជន ស្ថិតនៅមជ្ឈមណ្ឌលតេជោសន្តិភាពការ៉េពីរ ក្នុងភូមិកូនខ្លែង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។

ដំណើរទស្សនកិច្ចនេះ ធ្វើឡើងក្នុងគោលបំណងបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាល ក៏ដូចជាសមាគមអតីតយុទ្ធជនកម្ពុជា ចំពោះសុខុមាលភាព និងជីវភាពរស់នៅរបស់បងប្អូនអតីតយុទ្ធជន ដែលបានលះបង់កម្លាំងកាយចិត្តក្នុងការបម្រើជាតិមាតុភូមិ។

ក្នុងឱកាសសំណេះសំណាលនោះ ឯកឧត្ដមកិត្តិសង្គហបណ្ឌិត គន់ គីម បានពាំនាំនូវការផ្តាំផ្ញើសួរសុខទុក្ខពីសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានសមាគមអតីតយុទ្ធជនកម្ពុជា ដែលជានិច្ចកាលតែងតែគិតគូរអំពីជីវភាពរស់នៅរបស់អតីតយុទ្ធជនគ្រប់រូប។

ឯកឧត្ដមបានថ្លែងសង្កត់ធ្ងន់ថា «ក្រោមការដឹកនាំដ៏ឈ្លាសវៃរបស់សម្ដេចតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា តែងតែយកចិត្តទុកដាក់ខ្ពស់ចំពោះបងប្អូនអតីតយុទ្ធជន ដែលជាវីរបុរសពិតប្រាកដក្នុងការការពារជាតិ និងនាំមកនូវសុខសន្តិភាពពេញលេញ។ រាល់ការលះបង់របស់បងប្អូន នឹងមិនត្រូវបានបំភ្លេចឡើយ»។

ជាមួយគ្នានោះ ឯកឧត្ដមទេសរដ្ឋមន្ត្រីក៏បានលើកទឹកចិត្តដល់បងប្អូនអតីតយុទ្ធជនឱ្យបន្តខិតខំប្រកបរបរកសិកម្ម ដាំដុះដំណាំនានា ដើម្បីលើកកម្ពស់ជីវភាពគ្រួសារឱ្យកាន់តែប្រសើរឡើង។ ឯកឧត្ដមបានបញ្ជាក់ថា សមាគមអតីតយុទ្ធជនកម្ពុជានឹងបន្តសហការជាមួយស្ថាប័នពាក់ព័ន្ធនានា ដើម្បីផ្តល់ការគាំទ្រ និងជំនួយចាំបាច់ដល់អតីតយុទ្ធជន ក៏ដូចជាកូនចៅរបស់ពួកគាត់។

នៅក្នុងពិធីនោះដែរ ឯកឧត្ដម គន់ គីម ក៏បានចែកអំណោយជូនដល់គ្រួសារអតីតយុទ្ធជនចំនួន ២០៦ គ្រួសារ។ ក្នុងមួយគ្រួសារទទួលបានសារុង១ និងថវិកា ២០.០០០រៀល។ បងប្អូនអតីតយុទ្ធជនដែលបានចូលរួមក្នុងពិធីសំណេះសំណាលនេះ បានសម្ដែងនូវក្ដីរំភើបរីករាយ និងថ្លែងអំណរគុណយ៉ាងជ្រាលជ្រៅចំពោះការយកចិត្តទុកដាក់របស់រាជរដ្ឋាភិបាល តាមរយៈឯកឧត្ដមកិត្តិសង្គហបណ្ឌិត គន់ គីម។

លោក ជា វណ្ណា អតីតយុទ្ធជនម្នាក់ រស់នៅមជ្ឈមណ្ឌលតេជោសន្តិភាព បានលើកឡើងថា «ខ្ញុំពិតជាត្រេកអរខ្លាំងណាស់ដែលឯកឧត្ដម គន់ គីម បានចុះមកសួរសុខទុក្ខពួកយើងដោយផ្ទាល់។ នេះបង្ហាញថា រដ្ឋាភិបាលមិនបានបំភ្លេចពួកយើង ដែលធ្លាប់បានលះបង់ដើម្បីជាតិឡើយ។ អំណោយដែលទទួលបាននេះ គឺពិតជាមានតម្លៃសម្រាប់ជីវភាពគ្រួសារខ្ញុំ»។

ចំណែកឯលោកស្រី ធី សុភ័ក្រ្ត ជាភរិយាអតីតយុទ្ធជនម្នាក់ទៀត បានថ្លែងថា «ការចុះមកពិនិត្យមើលការរស់នៅ និងការដាំដុះដំណាំរបស់ពួកយើងនេះ គឺពិតជាលើកទឹកចិត្តពួកខ្ញុំឱ្យកាន់តែមានកម្លាំងចិត្តប្រកបរបរចិញ្ចឹមជីវិត។ ខ្ញុំសង្ឃឹមថា នឹងមានការគាំទ្របន្តទៀតពីសមាគមអតីតយុទ្ធជន ដើម្បីជួយអភិវឌ្ឍន៍ជីវភាពពួកខ្ញុំឱ្យកាន់តែប្រសើរ»។

សូមជម្រាបថា ក្នុងពិធីនោះក៏មានការអញ្ជើញចូលរួមពីអង្គភាព និងមន្ទីរនានាដែលពាក់ព័ន្ធក្នុងខេត្តបន្ទាយមានជ័យផងដែរ ដើម្បីបង្ហាញពីការគាំទ្រ និងកិច្ចសហការក្នុងកិច្ចការមនុស្សធម៌នេះ។ ដំណើរទស្សនកិច្ចរបស់ឯកឧត្ដម គន់ គីម នាពេលនេះ ពិតជាបានបន្សល់ទុកនូវស្នាមញញឹម និងក្ដីសង្ឃឹមថ្មីសម្រាប់បងប្អូនអតីតយុទ្ធជននៅមជ្ឈមណ្ឌលតេជោសន្តិភាព៕

ដោយ: ឈុនសារ៉ាត