EN 
FR 
AR
CNឯកឧត្ដម កែ គឹមយ៉ាន៖ គណបក្សប្រជាជនកម្ពុជាដើរតួជាឆ្អឹងខ្នងក្នុងការនាំមកនូវសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យនៅកម្ពុជា
AKP បន្ទាយមានជ័យ ថ្ងៃទី២៨ ខែមិថុនា ឆ្នាំ២០២៥ -- ថ្លែងនៅក្នុងមីទ្ទីងអបអរសាទរខួបទី ៧៤ឆ្នាំនៃថ្ងៃបង្កើតគណបក្សប្រជាជនកម្ពុជា ដែលបានប្រារព្ធធ្វើយ៉ាងមហោឡារិកនៅសាលប្រជុំធំនៃទីស្នាក់ការគណបក្សប្រជាជនកម្ពុជា ខេត្តបន្ទាយមានជ័យ នាព្រឹកថ្ងៃថ្ងៃទី២៨ ខែមិថុនា ឆ្នាំ២០២៥ នេះ ឯកឧត្ដម កែ គឹមយ៉ាន សមាជិកគណៈអចិន្ត្រៃយ៍នៃគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបន្ទាយមានជ័យ បានសង្កត់ធ្ងន់ថា គណបក្សប្រជាជនកម្ពុជាដើរតួនាទីជាឆ្អឹងខ្នងក្នុងការនាំមកនូវសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យនៅកម្ពុជា។
ពិធីនេះមានការអញ្ជើញចូលរួមពីឥស្សរជនសំខាន់ៗជាច្រើនរូប រួមមាន ឯកឧត្តម ឌិត ទីណា អនុប្រធានទី១ ក្រុមការងារគណបក្សចុះមូលដ្ឋានខេត្តបន្ទាយមានជ័យ ឯកឧត្តម អ៊ុ រាត្រី ប្រធានគណៈកម្មាធិការគណបក្សខេត្ត ឯកឧត្តម លោកជំទាវ សមាជិកព្រឹទ្ធអ្នសភា តំណាងរាស្ត្រមណ្ឌលបន្ទាយមានជ័យ ព្រមទាំងក្រុមការងារ និងសមាជិក-សមាជិកាបក្សមកពីក្រុង-ស្រុកទាំង៩ សរុបជិត ១.០០០នាក់។ ការជួបជុំដ៏ធំនេះបានឆ្លុះបញ្ចាំងពីការរួបរួមសាមគ្គីភាព និងការគាំទ្រយ៉ាងមុតមាំចំពោះគណបក្ស។
ក្នុងឱកាសដ៏សំខាន់នេះ ឯកឧត្ដម កែ គឹមយ៉ាន បានថ្លែងសុន្ទរកថាដ៏មានខ្លឹមសារដោយបានគូសបញ្ជាក់ពីប្រវត្តិសាស្ត្រដ៏យូរលង់ និងពោរពេញដោយស្នាដៃរបស់គណបក្សប្រជាជនកម្ពុជា ចាប់តាំងពីការបង្កើតឡើងក្នុងឆ្នាំ១៩៥១ រហូតមកដល់បច្ចុប្បន្ន។ ឯកឧត្តមបានរំលឹកអំពីដំណាក់កាលលំបាកជាច្រើនដែលគណបក្សបានឆ្លងកាត់ រួមមានទាំងការតស៊ូដើម្បីឯករាជ្យ ការរំដោះប្រជាជនចេញពីរបបប្រល័យពូជសាសន៍ ប៉ុល ពត និងបានការកសាងប្រទេសជាតិឡើងវិញពីគំនរផេះផង់។
ឯកឧត្ដមបានសង្កត់ធ្ងន់ថា គណបក្សប្រជាជនកម្ពុជាដើរតួនាទីជាឆ្អឹងខ្នងក្នុងការនាំមកនូវសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យនៅកម្ពុជា។ ប្រទេសជាតិបានផ្លាស់ប្តូរមុខមាត់គួរឱ្យកត់សម្គាល់ពីប្រទេសដែលធ្លាប់ជួបសង្គ្រាមទៅជាប្រទេសដែលមានការរីកចម្រើន និងមានកិត្យានុភាពលើឆាកអន្តរជាតិ។ សមិទ្ធផលទាំងនេះកើតចេញពីការដឹកនាំដ៏ឈ្លាសវៃ និងការលះបង់ដ៏ធំធេងរបស់ថ្នាក់ដឹកនាំគណបក្ស ព្រមទាំងការចូលរួមពីប្រជាជនគ្រប់ស្រទាប់វណ្ណៈ។ បន្ថែមពីនេះទៀត ឯកឧត្ដមបានលើកឡើងពីគោលនយោបាយចម្បងៗរបស់រាជរដ្ឋាភិបាលបច្ចុប្បន្ន ដែលដឹកនាំដោយគណបក្សប្រជាជនកម្ពុជា ក្នុងការបន្តលើកកម្ពស់ជីវភាពរស់នៅរបស់ប្រជាពលរដ្ឋ ពង្រឹងវិស័យអប់រំ សុខាភិបាល កសិកម្ម និងពង្រីកហេដ្ឋារចនាសម្ព័ន្ធទូទាំងប្រទេស។ ឯកឧត្ដមបានសង្កត់ធ្ងន់ថា គណបក្សនៅតែប្តេជ្ញាចិត្តបន្តខិតខំប្រឹងប្រែងដើម្បីធានាឱ្យបាននូវសន្តិភាព ស្ថិរភាព និងការអភិវឌ្ឍប្រកបដោយចីរភាពសម្រាប់កូនចៅជំនាន់ក្រោយ។
ជាមួយគ្នានោះ ឯកឧត្ដម កែ គឹមយ៉ាន បានអំពាវនាវដល់សមាជិកសមាជិកាគណបក្សទាំងអស់បន្តពង្រឹងសាមគ្គីភាពផ្ទៃក្នុង ខិតខំបំពេញភារកិច្ចរបស់ខ្លួនឱ្យបានល្អប្រសើរ និងបន្តបម្រើប្រជាជនដោយស្មោះត្រង់ប្រកបដោយស្មារតីទទួលខុសត្រូវខ្ពស់។ ឯកឧត្ដមជឿជាក់ថា ក្រោមការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ប្រទេសជាតិនឹងបន្តឈានទៅមុខកាន់តែរីកចម្រើនថែមទៀត៕
ដោយ៖ ឈុន សារ៉ាត
