AKP ភ្នំពេញ ថ្ងៃទី២៨ ខែមិថុនា ឆ្នាំ២០២៥ -- លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា ក្នុងពិធីប្រគល់សញ្ញាបត្រជូនដល់សិស្សានុសិស្សឆ្នាំ២០២៥ នៃសាលាអន្តរជាតិស៊ី អាយ អេ ហ្វឺសត៍ នាថ្ងៃទី២៧ ខែមិថុនា ឆ្នាំ២០២៥ បានវាយតម្លៃខ្ពស់ចំពោះឪពុកម្តាយ និងអ្នកអាណាព្យាបាល ដែលបានខិតខំប្រឹងប្រែងក្នុងការវិនិយោគលើការអប់រំដល់បុត្រធីតាតាំងពីមេត្តយ្យសិក្សាដល់ឧត្តមសិក្សា ហើយបាននិយាយថា លទ្ធផលថ្ងៃនេះបានឆ្លុះបញ្ចំាងពីការខិតខំប្រឹងប្រែងរួមគ្នាក្នុងការបណ្តុះបណ្តាលចំពោះពួកគេ ដែលជាទំពាំងស្នងឫស្សី និងជាអ្នកបន្ដវេនដឹកនាំដ៏មានសក្ដានុពលសម្រាប់ប្រទេសជាតិយើងនាពេលអនាគត។

លោកជំទាវបណ្ឌិតបានលើកឡើងអំពីប្រសាសន៍របស់សម្តេចអគ្គមហាសេនាធិបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា និងបច្ចុប្បន្នជាប្រធានព្រឹទ្ធសភាថា កម្ពុជាមិនដែលទម្លាក់ដៃចុះក្នុងការអភិវឌ្ឍវិស័យអប់រំបណ្តុះបណ្តាលនោះទេ ផ្ទុយទៅវិញរាជរដ្ឋាភិបាលបានផ្ដល់ការលើកទឹកចិត្តតាមរយៈការអនុគ្រោះពន្ធជាច្រើនជូនដល់គ្រឹះស្ថានអប់រំ និងបណ្តុះបណ្តាល ដើម្បីពង្រឹងខ្លួនបន្ថែម និងបន្តរួមចំណែកអភិវឌ្ឍន៍គុណភាពអប់រំនៅកម្ពុជា។ ក្នុងន័យនេះ យុទ្ធសាស្ត្ររបស់រាជរដ្ឋាភិបាលកម្ពុជាតាំងពីអាណត្តិមុនៗ រហូតមកដល់យុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលអាណត្តិថ្មីនេះ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជណាចក្រកម្ពុជា វិស័យអប់រំតែងតែត្រូវបានយកចិត្តទុកដាក់។

លោកជំទាវបានបន្តថា ស្របពេលជាមួយគ្នានេះ ដើម្បីឆ្លើយតបទៅនឹងអាទិភាពកំណែទម្រង់អប់រំ និងយុទ្ធសាស្ត្របញ្ចកោណដំណាក់កាលទី១ មុំទី១ ផ្តោតលើការអភិវឌ្ឍមូលធនមនុស្ស "ការពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យា" និងមុំទី៥ ផ្ដោតលើការអភិវឌ្ឍវិទ្យាសាស្ត្របច្ចេកវិទ្យាឌីជីថល ដែលជាកត្តាគន្លឹះដើម្បីនាំកម្ពុជាទៅសម្រេចចក្ខុវិស័យរបស់រាជរដ្ឋាភិបាល និងការអភិវឌ្ឍប្រកបដោយចីរភាព ក្រសួងអប់រំ យុវជន និងកីឡាក៏បានសម្រួចអាទិភាពគោលនយោបាយអប់រំដោយផ្ដោតតែមួយចំណុច គឺធានាឱ្យប្រជាពលរដ្ឋកម្ពុជាគ្រប់រូបទទួលបានការអប់រំប្រកបដោយគុណភាព សមធម៌ និងបរិយាបន្នពោរពេញដោយចំណេះដឹង បំណិន វិន័យសីលធម៌ និងឥរិយាបទល្អ ព្រមទាំងសុខភាពល្អ កាយសម្បទារឹងមាំ និងការសិក្សាពេញមួយជីវិត៕

ដោយ៖ ចាន់ សុភឿន (ប្រភព៖ ក្រសួងអប់រំ)