AKPបន្ទាយមានជ័យថ្ងៃទី២៨ ខែមិថុនា ឆ្នាំ២០២៦ -- កម្លាំងនគរបាលខេត្តបន្ទាយមានជ័យ បានរួមសហការជាមួយរដ្ឋបាលខេត្ត និងស្ថាប័នពាក់ព័ន្ធ យ៉ាងសកម្មក្នុងការសម្របសម្រួល និងដឹកជញ្ជូនពលរដ្ឋខ្មែរចំនួន ១៦១ នាក់ (ស្រី ៧២ នាក់) ដែលបានវិលត្រឡប់មកពីប្រទេសថៃ តាមច្រកអន្តរជាតិប៉ោយប៉ែត បន្ទាប់ពីភាគីថៃបានប្រកាសបិទច្រកព្រំដែន។

ប្រតិបត្តិការដ៏មមាញឹកនេះ បានចាប់ផ្ដើមពីម៉ោង ៨:០០ ព្រឹក រហូតដល់ម៉ោង ១៦:០០ ល្ងាច នៅថ្ងៃសុក្រ ទី២៧ ខែមិថុនា ឆ្នាំ២០២៥នេះដោយស្ថិតក្រោមការចាត់តាំងផ្ទាល់ពី លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ។ លោកស្នងការបានចាត់តាំង លោកឧត្តមសេនីយ៍ត្រី យ៉ត សុផល ស្នងការរង ដឹកនាំកម្លាំងនគរបាលជាច្រើននាក់ ចូលរួមដោយផ្ទាល់ក្នុងការសម្របសម្រួល និងរៀបចំការដឹកជញ្ជូន។

លោកឧត្តមសេនីយ៍ទោ សិទ្ធិ ឡោះ បានមានប្រសាសន៍ថា«នេះជាកាតព្វកិច្ច និងជាការទទួលខុសត្រូវរបស់យើង ក្នុងនាមជាកងកម្លាំងនគរបាលជាតិ ក្នុងការជួយសម្រួលដល់បងប្អូនប្រជាពលរដ្ឋខ្មែររបស់យើង ដែលកំពុងជួបការលំបាក និងត្រូវការជំនួយ។ យើងបានត្រៀមលក្ខណៈគ្រប់គ្រាន់ ទាំងកម្លាំងពលកម្ម និងមធ្យោបាយ ដើម្បីធានាថាបងប្អូនទាំងអស់ទទួលបានការសម្របសម្រួល និងដឹកជញ្ជូនទៅដល់ស្រុកកំណើតរបស់ពួកគាត់ដោយសុវត្ថិភាព»។

ក្នុងប្រតិបត្តិការនេះ កម្លាំងនគរបាលបានប្រើប្រាស់រថយន្តសរុប ១១ គ្រឿង ដើម្បីដឹកជញ្ជូនពលរដ្ឋខ្មែរទាំង ១៦១ នាក់ ទៅកាន់បណ្ដាខេត្តរាជធានីចំនួន ៦ រួមមាន រាជធានីភ្នំពេញ ខេត្តកំពង់ធំ ខេត្តសៀមរាប ខេត្តពោធិ៍សាត់ ខេត្តព្រះវិហារ និងខេត្តបាត់ដំបង។

ចំណែកឯពលករដែលបានត្រឡប់មកវិញ ក៏បានសម្ដែងនូវសេចក្ដីរំភើប និងការដឹងគុណយ៉ាងជ្រាលជ្រៅចំពោះការយកចិត្តទុកដាក់របស់អាជ្ញាធរ និងកងកម្លាំងនគរបាលខេត្តបន្ទាយមានជ័យ។ ពលករម្នាក់មកពីខេត្តកំពង់ធំ បានថ្លែងទាំងក្ដីរំភើបថា «ខ្ញុំពិតជាអរគុណខ្លាំងណាស់ចំពោះអាជ្ញាធរ និងបងប្អូននគរបាល ដែលបានខិតខំជួយសម្រួល និងរៀបចំឡានដឹកពួកខ្ញុំត្រឡប់ទៅផ្ទះវិញ។ បើអត់មានពួកគាត់ទេ ពួកខ្ញុំមិនដឹងទៅជាយ៉ាងណាទេ ព្រោះអីអត់មានមធ្យោបាយធ្វើដំណើរ ហើយលុយកាក់ក៏ខ្សត់ផងដែរ»។

សកម្មភាពនេះបានឆ្លុះបញ្ចាំងពីការយកចិត្តទុកដាក់ខ្ពស់របស់រាជរដ្ឋាភិបាល ក៏ដូចជាអាជ្ញាធរខេត្តបន្ទាយមានជ័យ និងកងកម្លាំងនគរបាល ក្នុងការជួយដោះស្រាយបញ្ហាប្រឈមរបស់ប្រជាពលរដ្ឋ ជាពិសេសក្នុងកាលៈទេសៈដែលពួកគេជួបការលំបាកនៅឯបរទេស។ ការសម្របសម្រួល និងការដឹកជញ្ជូននេះ បានចូលរួមចំណែកយ៉ាងសំខាន់ក្នុងការធានានូវសុវត្ថិភាព និងភាពងាយស្រួលសម្រាប់ពលករខ្មែរដែលវិលត្រឡប់មកមាតុភូមិវិញ៕

ដោយ៖ ឈុន សារ៉ាត