AKP ភ្នំពេញ ថ្ងៃទី២៧ ខែមិថុនា ឆ្នាំ២០៥--សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអះអាងថា  វិស័យសហគ្រាសធុនមីក្រូ តូចនិងមធ្យម ជួយជំរុញអភិវឌ្ឍន៍សេដ្ឋកិច្ច ស្ថេរភាពសង្គម លើកកម្ពស់ជីវភាពប្រជាពលរដ្ឋ និងកាត់បន្ថយចំណាកស្រុក។
ការអះអាងបែបនេះ របស់សម្ដេចធិបតី ធ្វើឡើងក្នុងឱកាសអញ្ជើញជាអធិបតី ក្នុងពិធីសំណេះសំណាល និងពិសាអាហារសាមគ្គីមហាគ្រួសារ សហគ្រាសធុនតូច មធ្យម និងសិប្បកម្មកម្ពុជា ក្នុងឱកាសអបអរ “ទិវាជាតិសហគ្រាសធុនមីក្រូ តូច និងមធ្យម របស់សមាគមមូលនិធិសម្តេចតេជោ នៅមជ្ឈមណ្ឌល សាលសន្និបាត និងពិព័រណ៍កោះពេជ្រ ល្ងាចថ្ងៃទី២៧ ខែមិថុនា ឆ្នាំ២០២៥។

 ជាមួយគ្នានេះ សម្ដេចធិបតីនាយករដ្ឋមន្ត្រី បានគូសបញ្ជាក់ថា ការរៀបចំព្រឹត្តិការណ៍ប្រចាំឆ្នាំនៃសហគ្រាសធុនមីក្រូ តូច និងមធ្យម មានគោលដៅលើកកម្ពស់ និងផ្ដល់តម្លៃដល់វិស័យសហគ្រាសធុនមីក្រូ តូចនិងមធ្យមដែលជាមូលដ្ឋានគ្រឹះនិងកម្លាំងចលករជំរុញកំណើនសេដ្ឋកិច្ច ការអភិវឌ្ឍប្រកបដោយភាពធន់ បរិយាបន្ន និងចីរភាព។
បើតាមសម្ដេចធិបតី ហ៊ុន ម៉ាណែត «វិស័យនេះគ្របដណ្ដប់សកម្មភាពសេដ្ឋកិច្ចចម្រុះដោយបានបង្កើតការងារ មុខរបរ បង្កើនប្រាក់ចំណូល កាត់បន្ថយចំណាកស្រុកជួយប្រជាជនងាយរងគ្រោះឱ្យមានលំនឹងជីវភាព ជំរុញអភិវឌ្ឍន៍សេដ្ឋកិច្ចស្ថេរភាពសង្គម រួមចំណែកដល់ការរីកចម្រើននៃវិស័យឯកជន សមិទ្ធផលនិងវឌ្ឍនភាពផ្នែកសង្គមសេដ្ឋកិច្ចដែលកម្ពុជាសម្រេចបានក្នុងរយៈពេលជាងពីរទសវត្ស បានបង្កើតនូវមោទនភាពជាតិថ្មីនោះគឺការឈានឆ្ពោះនៃការចាកចេញពីប្រទេសអភិវឌ្ឍន៍តិចតួចនៅឆ្នាំ២០២៩»។

សម្ដេចធិបតី បានបន្តថា សហគ្រាសធុនមីក្រូ តូច និងមធ្យមពិតជារួមចំណែកយ៉ាងសកម្មហើយនិងត្រូវមានតួនាទីគន្លឹះក្នុងការឆ្ពោះទៅគោលដៅ លក្ខខណ្ឌពាណិជ្ជកម្ម ជំនួយការអភិវឌ្ឍន៍ផ្លូវការ និងភាពអនុគ្រោះដែលបណ្ដាប្រទេសជាមិត្ត និងដៃគូអភិវឌ្ឍន៍បានផ្ដល់ជូនកម្ពុជានិងមានការប្រែប្រួលហើយកាន់តែតឹងរឹងជាងមុន។
ប្រការនេះហើយទើបសម្ដេចធិបតី ទាមទារឱ្យគ្រប់តួអង្គ ទាំងវិស័យសាធារណៈ វិស័យឯកជន ជាពិសេសសហគ្រាសគ្រប់ប្រភេទ ត្រូវបង្កើននិងពង្រឹងសមត្ថភាព ព្រមទាំងអភិវឌ្ឍន៍អាជីវកម្មរបស់ខ្លួនជាប្រចាំដើម្បីទទួលបានទំនុកចិត្តពីអតិថិជនអាចបន្តប្រកួតប្រជែងក្នុងសង្វៀនធុរកិច្ច៕
ដោយ៖ គង់ សិរីរ័ត្ន, រូបថត៖ គល់ រ៉េននី