AKP បន្ទាយមានជ័យ ថ្ងៃទី២៧ ខែមិថុនា ឆ្នាំ២០២៥ -- ឯកឧត្តម កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា និងជាតំណាងរាស្ត្រមណ្ឌលខេត្តបន្ទាយមានជ័យ នៅព្រឹកថ្ងៃសុក្រ ទី២៧ ខែមិថុនា ឆ្នាំ២០២៥ បានអញ្ជើញចុះសំណេះសំណាលសួរសុខទុក្ខបងប្អូនពលករខ្មែរ ដែលបានវិលត្រឡប់មកកាន់ប្រទេសកម្ពុជាវិញ តាមច្រកទ្វារអន្តរជាតិប៉ោយប៉ែត។ វត្តមានរបស់ឯកឧត្តម នាពេលនេះ គឺដើម្បីបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ចំពោះសុខទុក្ខ និងអនាគតរបស់បងប្អូនពលករ។

ចាប់ពីម៉ោង៩៖០០ព្រឹកថ្ងៃទី២៧ ខែមិថុនា ឆ្នាំ២០២៥នេះ មន្ត្រីរាជការនៃក្រសួងការងារ និងបណ្តុះបណ្តាលវិជ្ជាជីវៈ រួមមានទីភ្នាក់ងារជាតិមុខរបរ និងការងារ (NEA) បេឡាជាតិសន្តិសុខសង្គម (ប.ស.ស.) មន្ទីរការងារ និងបណ្តុះបណ្តាលវិជ្ជាជីវៈ រួមទាំងអាជ្ញាធរមូលដ្ឋានពាក់ព័ន្ធគ្រប់ផ្នែក ដែលប្រចាំការនៅច្រកព្រំដែនអន្តរជាតិប៉ោយប៉ែត និងមណ្ឌលសំចតប៉ោយប៉ែត ក្នុងខេត្តបន្ទាយមានជ័យ បានត្រៀមខ្លួនរួចជាស្រេចក្នុងការផ្តល់ព័ត៌មានយ៉ាងសព្ការយកវគ្រប់។ ព័ត៌មានទាំងនោះរួមមាន ឱកាសការងារដ៏សម្បូរបែប ការអប់រំបណ្តុះបណ្តាលបច្ចេកទេសនិងវិជ្ជាជីវៈ និងអត្ថប្រយោជន៍ ប.ស.ស. ដែលទាំងអស់នេះគឺជាការគិតគូរដ៏ល្អិតល្អន់របស់រាជរដ្ឋាភិបាលកម្ពុជា សម្រាប់បងប្អូនប្រជាពលរដ្ឋ និងពលករខ្មែរនៅប្រទេសថៃ ដែលមានបំណងវិលត្រឡប់មកស្រុកកំណើតវិញ។

ក្នុងឱកាសនោះ ឯកឧត្តម កែ គឹមយ៉ាន បានមានប្រសាសន៍សង្កត់ធ្ងន់ពីការប្តេជ្ញាចិត្តរបស់រាជរដ្ឋាភិបាល ក្នុងការជួយសម្រួលដល់បងប្អូនពលករខ្មែរទាំងអស់ ដែលបានវិលត្រឡប់មកពីប្រទេសថៃ តាមច្រកប៉ោយប៉ែត។ ឯកឧត្តមបានថ្លែងថា «រាជរដ្ឋាភិបាលជានិច្ចកាល គឺតែងតែគិតគូរអំពីសុខុមាលភាពរបស់បងប្អូនប្រជាពលរដ្ឋ ជាពិសេសពលកររបស់យើង ដែលបានទៅប្រកបការងារនៅក្រៅប្រទេស។ ការវិលត្រឡប់របស់បងប្អូនមកកាន់មាតុភូមិវិញ គឺជាការបូកសរុបនូវក្តីសង្ឃឹមថ្មីមួយ ដែលរដ្ឋាភិបាលបានត្រៀមខ្លួនរួចជាស្រេច ដើម្បីផ្តល់នូវឱកាសការងារ និងការបណ្តុះបណ្តាលជំនាញ ដើម្បីឱ្យបងប្អូនអាចកសាងជីវភាពរស់នៅសមរម្យនៅក្នុងប្រទេសរបស់យើង»។

ឯកឧត្តមក៏បានលើកឡើងអំពីយន្តការសម្របសម្រួលផ្សេងៗនៅច្រកទ្វារអន្តរជាតិប៉ោយប៉ែត ដើម្បីធានាថា ពលករដែលវិលត្រឡប់មកវិញ ទទួលបានការស្វាគមន៍ និងការជួយជ្រោមជ្រែងចាំបាច់។ «យើងបានរៀបចំក្រុមការងារចម្រុះ នៅតាមច្រកព្រំដែន ដើម្បីជួយសម្រួលរាល់នីតិវិធី ផ្តល់ព័ត៌មាន និងតម្រង់ទិសដល់បងប្អូនពលករ។ គោលបំណងគឺចង់ឱ្យបងប្អូនមានអារម្មណ៍កក់ក្តៅ និងមានទំនុកចិត្តថា រដ្ឋាភិបាលនឹងមិនទុកបងប្អូនចោលនោះទេ»។

ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ក៏បានមានប្រសាសន៍បន្ថែមពីការយកចិត្តទុកដាក់របស់អាជ្ញាធរខេត្ត ក្នុងការចូលរួមអនុវត្តគោលនយោបាយរបស់រាជរដ្ឋាភិបាល។ ឯកឧត្តមបានបញ្ជាក់ថា «អាជ្ញាធរខេត្តបន្ទាយមានជ័យ បានសហការយ៉ាងជិតស្និទ្ធជាមួយក្រសួង និងស្ថាប័នពាក់ព័ន្ធ ដើម្បីធានាថារាល់ការគាំទ្រ និងជំនួយនានា ដល់បងប្អូនពលករ គឺត្រូវបានអនុវត្តប្រកបដោយប្រសិទ្ធភាព។ យើងបានត្រៀមរៀបចំទាំងមជ្ឈមណ្ឌលសម្រាកបណ្តោះអាសន្ន ការផ្តល់ព័ត៌មានការងារក្នុងស្រុក និងការបណ្តុះបណ្តាលជំនាញថ្មីៗ ដើម្បីឆ្លើយតបទៅនឹងតម្រូវការទីផ្សារការងារនាពេលបច្ចុប្បន្ន»។

ជុំវិញការរកការងារធ្វើ ឯកឧត្តម កែ គឹមយ៉ាន បានគូសបញ្ជាក់ថា រាជរដ្ឋាភិបាលបាននិងកំពុងខិតខំទាក់ទាញវិនិយោគិនបរទេស និងជំរុញវិស័យឧស្សាហកម្ម សិប្បកម្ម និងកសិកម្ម ដើម្បីបង្កើតឱកាសការងារបន្ថែមនៅក្នុងប្រទេស។ ឯកឧត្តមបានលើកទឹកចិត្តពលករដែលវិលត្រឡប់មកវិញ ឱ្យចាប់យកឱកាសទាំងនេះ។ «យើងមានវិស័យជាច្រើនដែលកំពុងរីកចម្រើន ហើយត្រូវការកម្លាំងពលកម្ម។ ក្រសួងការងារ និងបណ្តុះបណ្តាលវិជ្ជាជីវៈ តាមរយៈ NEA បានប្រមូលផ្តុំព័ត៌មានអំពីមុខរបរ និងការងាររាប់ពាន់កន្លែង ដែលកំពុងរង់ចាំបងប្អូន។ លើសពីនេះ បើបងប្អូនមានបំណងចង់ពង្រឹងសមត្ថភាព ឬផ្លាស់ប្តូរជំនាញ យើងក៏មានកម្មវិធីបណ្តុះបណ្តាលបច្ចេកទេសនិងវិជ្ជាជីវៈ ដែលផ្តល់ជូនដោយឥតគិតថ្លៃ ឬក្នុងតម្លៃសមរម្យ»។
បងប្អូនពលករជាច្រើននាក់ដែលបានវិលត្រឡប់មកពីប្រទេសថៃ បានសម្តែងនូវក្តីរីករាយ និងការដឹងគុណចំពោះការយកចិត្តទុកដាក់របស់រាជរដ្ឋាភិបាល។ លោក វ៉ាន់ សុវណ្ណ អាយុ ៣៥ ឆ្នាំ ដែលទើបតែវិលត្រឡប់មកពីខេត្តសាមុតសាខន ប្រទេសថៃ បានថ្លែងថា«ខ្ញុំពិតជាអរគុណណាស់ដែលឯកឧត្តម កែ គឹមយ៉ាន និងអាជ្ញាធរទាំងអស់បានអញ្ជើញមកសួរសុខទុក្ខពួកខ្ញុំដោយផ្ទាល់។ ការផ្តល់ព័ត៌មានអំពីការងារ និងការបណ្តុះបណ្តាលជំនាញ ធ្វើឲ្យខ្ញុំមានសង្ឃឹមឡើងវិញ ក្នុងការរកការងារធ្វើនៅស្រុកកំណើត»។

ចំណែកឯអ្នកនាង ស្រី ណាក់ អាយុ ២៨ ឆ្នាំ ដែលធ្វើការនៅប្រទេសថៃអស់រយៈពេល៥ ឆ្នាំ ក៏បានសម្តែងនូវចំណាប់អារម្មណ៍ស្រដៀងគ្នា។ «ខ្ញុំពិតជារំភើបចិត្តណាស់ ដែលឃើញរដ្ឋាភិបាលយកចិត្តទុកដាក់ដល់ពួកខ្ញុំ។ ខ្ញុំមានបំណងចង់រៀនជំនាញកាត់ដេរ ដើម្បីបើកហាងផ្ទាល់ខ្លួននៅផ្ទះ ហើយខ្ញុំបានទទួលព័ត៌មានលម្អិតអំពីវគ្គសិក្សានេះពីមន្ត្រី NEA នៅទីនេះ»។ វត្តមានរបស់ឯកឧត្តម កែ គឹមយ៉ាន និងការត្រៀមលក្ខណៈរបស់មន្ត្រីជំនាញនៅច្រកទ្វារអន្តរជាតិប៉ោយប៉ែត នាពេលនេះ ពិតជាបានឆ្លុះបញ្ចាំងពីការប្តេជ្ញាចិត្តដ៏មោះមុតរបស់រាជរដ្ឋាភិបាលកម្ពុជា ក្នុងការធានាសុខុមាលភាព និងផ្តល់ឱកាសថ្មីៗដល់បងប្អូនពលករខ្មែរ ដែលបានវិលត្រឡប់មកកាន់មាតុភូមិវិញ ដើម្បីរួមចំណែកអភិវឌ្ឍន៍ប្រទេសជាតិ៕

ដោយ ឈុន សារ៉ាត