AKP សៀមរាប ថ្ងៃទី១៩ ខែមិថុនា ឆ្នាំ២០២៥ -- លោក Kensuke Nagase ជារដ្ឋមន្ត្រី និងជាអនុប្រធានបេសកកម្មនៃស្ថានទូតជប៉ុនប្រចាំកម្ពុជា និងជាសហប្រធាននៃកិច្ចប្រជុំគណៈកម្មាធិការសម្របសម្រួលអន្តរជាតិ សម្រាប់កិច្ចការពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (អាយស៊ីស៊ីអង្គរ) និងសំបូរព្រៃគុក បានថ្លែងក្នុងកិច្ចប្រជុំបច្ចេកទេសលើកទី៤០នៅឯខេត្តសៀមរាប នាថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥ថា អង្គការ Jasa របស់ជប៉ុន និងអាជ្ញាធរជាតិអប្សរា ជាមួយអង្គការយូណេស្កូ នឹងបន្តធ្វើការរួមគ្នាលើកិច្ចការពារ អភិរក្សនៅតំបន់អង្គរ។

លោក Kensuke Nagase ឱ្យដឹងថា រាជរដ្ឋាភិបាលជប៉ុននឹងបន្តផ្ដល់ជំនួយជាទឹកប្រាក់ប្រមាណ៩០ម៉ឺនដុល្លារអាមេរិក សម្រាប់គម្រោងជួសជុលប្រាសាទបាយ័ន ក្នុងរយៈពេល៣ឆ្នាំទៅមុខទៀត។ គម្រោងនៃជំនួយនេះនឹងចាប់ផ្ដើមចាប់ពីអំឡុងខែកញ្ញា ឆ្នាំ២០២៥។ ជាផែនការរួមជំនួយរបស់រាជរដ្ឋាភិបាលជប៉ុននេះមានសារសំខាន់យ៉ាងខ្លាំង ចំពោះការងារការពារ និងអភិរក្សប្រាសាទបុរាណនានា នៅក្នុងរមណីយដ្ឋានអង្គរ។ ជំនួយនេះមិនត្រឹមតែជាគម្រោងសម្រាប់ជួសជុលប្រាសាទបាយ័នប៉ុណ្ណោះទេ វាក៏ជាការជួយលើកតម្លៃនៃបេតិកភណ្ឌនានា ការជួសជុលនូវប្រព័ន្ធលូបង្ហូរទឹកបុរាណ ព្រមទាំងជួយដល់ដំណើរការនៃការចុះបញ្ជីថ្ម ដែលកំពុងរាយប៉ាយនៅតំបន់ជុំវិញប្រាសាទបាយ័នផងដែរ។

ជាមួយគ្នានេះដែរ អាជ្ញាធរជាតិអប្សរាក៏គ្រោងនឹងបើកអគារអភិរក្សទី១របស់តំបន់អង្គរ ដែលមិនប្រើការជាយូរមកហើយឱ្យដំណើរការឡើងវិញ សម្រាប់ជួយដល់ការងារចុះបញ្ជីថ្ម និងការទាក់ទាញភ្ញៀវទេសចរ ឱ្យទៅស្វែងយល់ពីប្រវត្តិសាស្ត្រនៃការងារអភិរក្សអង្គរជំនាន់មុនផងដែរ។

សូមបញ្ជាក់ថា កិច្ចប្រជុំបច្ចេកទេសលើកទី៤០ របស់ណៈកម្មាធិការសម្របសម្រួលអន្តរជាតិ សម្រាប់ កិច្ចការពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ អាយស៊ីស៊ីអង្គរ និងសំបូរព្រៃគុក កំពុងប្រព្រឹត្តទៅរយៈពេល២ថ្ងៃនៅក្នុងខេត្តសៀមរាប ចាប់ពីថ្ងៃទី១៩ខែរហូតដល់ថ្ងៃទី២០មិថុនាឆ្នាំ២០២៥។

កិច្ចប្រជុំនេះក្រោមការសម្របសម្រួលពីសហប្រធាន លោក Kensuke Nagase ជារដ្ឋមន្ត្រី និងជាអនុប្រធានបេសកកម្មនៃស្ថានទូតជប៉ុនប្រចាំកម្ពុជា និងលោក Pierre Vincent ជាទីប្រឹក្សាផ្នែកវប្បធម៌របស់ស្ថានទូតបារាំង ក្រោមអធិបតីភាពរបស់លោកជំទាវ បណ្ឌិតសភាចារ្យ ភឿង  សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា៕

ដោយ ឃុត សៅ