AKP សៀមរាប ថ្ងៃទី១៩ ខែមិថុនា ឆ្នាំ២០២៥ -- ឯកឧត្តម គុជ បញ្ញាសា រដ្ឋលេខាធិការក្រសួងទេសចរណ៍ បានមានប្រសាសន៍ថា ព្រឹត្តិការណ៍ទិវាយោគៈអន្តរជាតិនៅកម្ពុជានឹងលើកកម្ពស់ការយល់ដឹងរបស់ប្រជាជនកម្ពុជាអំពីអត្ថប្រយោជន៍សុខភាពពីការហាត់ Yoga ហើយនឹងជំរុញលំហូរភ្ញៀវទេសចរអន្តរជាតិ និងវិនិយោគិនមកកាន់តំបន់ទេសចរណ៍នានារបស់កម្ពុជា ជាពិសេសភ្ញៀវទេសចរឥណ្ឌា និងអ្នកវិនិយោគទុនដែលមកទស្សនា និងវិនិយោគនៅកម្ពុជា ដើម្បីពង្រឹងកិច្ចសហប្រតិបត្តិការទេសចរណ៍រវាងកម្ពុជា និងឥណ្ឌា និងអនុវត្តយុទ្ធនាការ ឆ្នាំទេសចរណ៍កម្ពុជា-ឥណ្ឌា ២០២៥ និងការផ្សព្វផ្សាយ។ 

ការថ្លែងរបស់ឯកឧត្តមបែបនេះបានធ្វើឡើងនៅក្នុងព្រឹត្តិការណ៍ទិវាយោគៈអន្តរជាតិលើកទី១១ ដែលធ្វើឡើងនៅព្រលានជល់ដំរី លើទឹកដីខេត្តសៀមរាប នាព្រឹកថ្ងៃទី១៩ ខែមិថុនា ឆ្នាំ២០២៥។ ឯកឧត្តមបញ្ជាក់ថា នៅក្នុងឆ្នាំ២០២៤កន្លងទៅនេះ កម្ពុជាទទួលបានភ្ញៀវទេសចរចំនួន ៦លាន៧សែននាក់ ក្នុងនោះភ្ញៀវទេសចរជនជាតិឥណ្ឌាមានប្រមាណ៨ម៉ឺននាក់។

លោកស្រី ម៉ននី រង្សី អភិបាលរងខេត្តសៀមរាប បានបង្ហាញថា ព្រឹត្តិការណ៍នេះជាចលករមួយដ៏សំខាន់ ក្នុងជួយជំរុញដល់វិស័យទេសចរណ៍ និងកំណើនសេដ្ឋកិច្ចកម្ពុជា ជាពិសេសខេត្តសៀមរាបផ្ទាល់ តាមរយៈការចូលរួមផ្សព្វផ្សាយពីតំបន់អង្គរ ទៅកាន់ពិភពលោក ដើម្បីទាក់ទាញភ្ញៀវទេសចរឱ្យមកទស្សនាខេត្តសៀមរាប ឱ្យកាន់តែច្រើនឡើង។ ព្រឹត្តិការណ៍នេះក៏នឹងបន្តប្រារព្ធធ្វើនៅលើទឹកដីអង្គរជារៀងរាល់ឆ្នាំ ព្រោះថាខេត្តសៀមរាបគឺជាតំបន់គោលដៅទេសចរណ៍លំដាប់ពិភពលោករបស់ព្រះរាជាណាចក្រកម្ពុជា ដែលវិស័យនេះ គឺជាកត្តាជំរុញដ៏សំខាន់មួយក្នុងចំណោមកត្តាជំរុញកំណើនសេដ្ឋកិច្ចដទៃទៀត។ 

ឯកឧត្តម VANLALVAWNA BAWITLUNG ឯកអគ្គរដ្ឋទូតសាធារណរដ្ឋឥណ្ឌាប្រចាំកម្ពុជា មានប្រសាសន៍ថា ជារៀងរាល់ឆ្នាំទិវាយោគៈ ត្រូវបានប្រារព្ធឡើងក្រោមមូលបទផ្សេងៗគ្នា ហើយសម្រាប់ឆ្នាំ២០២៥ គឺ "យោគៈសម្រាប់ផែនដីតែមួយ សុខភាពតែមួយ" ដែលបានបង្ហាញពីការពិតមួយថា សុខភាពមនុស្សម្នាក់ៗ និងផែនដីមានទំនាក់ទំនងគ្នាទៅវិញទៅមក។ យោគៈគឺជាលំហាត់ពង្រឹងរាងកាយ ធ្វើឱ្យចិត្តស្ងប់ និងជំរុញការយល់ដឹង និងការទទួលខុសត្រូវខ្ពស់ក្នុងជីវិតប្រចាំថ្ងៃ។ យោគៈមិនមែនគ្រាន់តែជាការធ្វើលំហាត់ប្រាណប៉ុណ្ណោះទេ ប៉ុន្តែជារបៀបនៃជីវិត ជួយយើងឱ្យភ្ជាប់ទំនាក់ទំនងជាមួយខ្លួនយើង ទៅនឹងពិភពលោកជុំវិញយើង៕

ដោយ ឃុត សៅ