AKP កំពង់ចាម ថ្ងៃទី១៩ ខែមិថុនា ឆ្នាំ២០២៥ -- រដ្ឋបាលខេត្តកំពង់ចាម នាព្រឹកថ្ងៃ ទី១៩ ខែមិថុនា ឆ្នាំ២០២៥ បានរៀបចំបើកវគ្គបណ្តុះបណ្តាលគ្រូបង្គោល ស្តីពី “យេនឌ័រ និងបរិយាបន្នសង្គម” ដល់គ្រូបង្គោលគណនេយ្យភាពសង្គមនៅថ្នាក់ក្រុង ស្រុក ក្រោមអធិបតីភាពលោក ហាន កុសល អភិបាលរងខេត្ត តំណាងឯកឧត្តមអភិបាលនៃគណៈអភិបាលខេត្តកំពង់ចាម និងលោក ជំទាវ លន់ សុម៉ាលី សមាជិកក្រុមប្រឹក្សាខេត្ត។

លោក ហាន កុសល អភិបាលរងខេត្តកំពង់ចាម បានមានប្រសាសន៍ថា វគ្គបណ្តុះបណ្តាលដល់គ្រូបង្គោលគណនេយ្យភាពសង្គមនៅថ្នាក់ក្រុង ស្រុក ពិតជាមានសារៈសំខាន់ណាស់ដើម្បីបង្កើនចំណេះដឹងមូលដ្ឋានពាក់ព័ន្ធនឹងយេនឌ័រ និងវិធីសាស្ត្រនៃការបញ្ជាបយេនឌ័រ សម្រាប់ពង្រឹងសមត្ថភាព និងភាពអង់អាចដល់ស្ត្រី និងក្រុមជនងាយរងគ្រោះនៅក្នុងការអនុវត្តការងារគណនេយ្យភាពសង្គម។

ទន្ទឹមនឹងនេះ លោកអភិបាលរងខេត្តបានគូសបញ្ជាក់ថា ការងារគណនេយ្យភាពសង្គមគឺកិច្ចដំណើរការកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ផ្តោតសំខាន់គឺផ្តល់សិទ្ធិអំណាចដល់ស្រ្តី និងក្រុមជនងាយរងគ្រោះនៅសហគមន៍មូលដ្ឋានដែលជាក្រុមតំណាងឱ្យផលប្រយោជន៍របស់ស្ត្រី យុវវ័យ និងក្រុមជនងាយរងគ្រោះនានា ក្នុងការចូលរួមពង្រឹងការប្រើប្រាស់ថវិកា និងការផ្តល់សេវាសាធារណៈនៅមូលដ្ឋាន ក្នុងការតាមដានក្នុងការបំពេញការងាររបស់រដ្ឋបាលថ្នាក់ក្រោមជាតិ តាម ក្រុង ស្រុក ឃុំសង្កាត់របស់ខ្លួន៕

ដោយ ឆាយ ម៉ុត