AKP កំពង់ធំ ថ្ងៃទី១៩ ខែមិថុនា ឆ្នាំ២០២៥ -- លោក ឡាយ ស៊ីលី ប្រធានក្រុមប្រឹក្សាស្រុកស្ទោង បានលើកទឹកចិត្តប្រជាពលរដ្ឋឱ្យក្លាហានហ៊ានបញ្ចេញមតិយោបល់លើកឡើងពីបញ្ហាជូនអង្គវេទិកាពីគ្រោះយោបល់បានជ្រាប និងជួយដោះស្រាយ ក្នុងឱកាសដែលលោក និងសមាជិកសមាជិកា ព្រមទាំងលោក សាយ គឹមឡម អភិបាលស្រុកស្ទោង និងសហការី បានអញ្ជើញចូលរួមក្នុងវេទិកាផ្សព្វផ្សាយពិគ្រោះយោបល់ក្រុមប្រឹក្សាស្រុកអាណត្តិទី៤នៅក្នុងឃុំប្រឡាយស្រុកស្ទោង ខេត្តកំពង់ធំ នាព្រឹកថ្ងៃទី១៩ ខែមិថុនា ឆ្នាំ២០២៥ នៅវត្តឃ្លាំងខ្មូត។

លោក ឡាយ ស៊ីលី បានឱ្យអាជ្ញាធរឃុំប្រឡាយត្រូវពិនិត្យមើលអំពីតួនាទីភារកិច្ច និងប្រសិទ្ធភាពការងាររបស់ខ្លួនឡើងវិញ ជាពិសេសការផ្ដល់សេវាឱ្យបានសុក្រឹតភាពឆាប់រហ័ស និងដល់ជណ្ដើរផ្ទះប្រជាពលរដ្ឋដើម្បីទទួលបាននូវការជឿទុកចិត្ត គាំទ្រពីប្រជាពលរដ្ឋស្របតាមយុទ្ធសាស្ត្របញ្ចាកោណរបស់រាជរដ្ឋាភិបាលអាណត្តិទី៧ក្រោមការដឹកនាំដ៏ប៉ិនប្រសប់ និងឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ជាមួយនឹងការពិភាក្សាដោះស្រាយបញ្ហាជូនពលរដ្ឋ «បីចំណុច» ក្នុងវេទិកានេះ លោក សាយ គឹមឡម បានលើកទឹកចិត្តដល់ប្រជាពលរដ្ឋក្នុងមូលដ្ឋានក៏ដូចជាអាជ្ញាធរពាក់ព័ន្ធ ត្រូវយកចិត្តទុកដាក់ខ្ពស់លើសុខភាពសាធារណៈ ជាពិសេសចំពោះសុខភាពសុវត្ថិភាពចំណីអាហារដែលទទួលទានប្រចាំថ្ងៃជាប្រភេទចំណីអាហារដែលគ្មានសារធាតុគីមី ឬសារធាតុដែលនាំឱ្យប៉ះពាល់ដល់សុខភាពធ្ងន់ធ្ងរ ជាពិសេសត្រូវកាត់បន្ថយនូវការប្រើប្រាស់ថង់ប្លាស្ទិកក្នុងការវេចខ្ចប់ចំណីអាហារប្រចាំថ្ងៃដែលជាសារធាតុមួយបង្ករនូវបញ្ហាមហារីកជាច្រើនករណីបំផុតនៅក្នុងព្រះរាជាណាចក្រកម្ពុជាយើងសព្វថ្ងៃ។

ទន្ទឹមនឹងនេះ លោកអភិបាលស្រុកបានបន្ថែមថា ការផ្ដល់សេវាប្រកបដោយគុណភាព ប្រសិទ្ធភាពជារឿងចាំបាច់មួយ ហើយ ផ្ញាធរឃុំប្រឡាយត្រូវពិនិត្យមើលឡើងវិញអំពីការធ្វើឯកសារអត្រានុកូលដ្ឋាន ឬសំបុត្របញ្ជាក់កំណើតផ្សេងៗប្រកបដោយទំនួលខុសត្រូវខ្ពស់ជាពិសេស ភាពត្រឹមត្រូវ និងអាចប្រើប្រាស់ជាផ្លូវការបាននូវឯកសារពាក់ព័ន្ធទាំងនេះជាពិសេសទិន្នន័យទូទៅនិងអក្ខរាវិរុទ្ធជាដើម ហើយលោកមេឃុំត្រូវពិនិត្យឱ្យបានច្បាស់លាស់មុននឹងចុះហត្ថលេខាអនុម័តដាក់ឱ្យប្រើប្រាស់។

លោក សាយ គឹមឡម បានលើកទឹកចិត្តដល់អាជ្ញាធរភូមិឃុំត្រូវនាំគ្នាបង្កើតគណៈកម្មការក្នុងការគ្រប់គ្រងទ្វារទឹក ឬប្រព័ន្ធធារាសាស្ត្រដើម្បីផ្គត់ផ្គង់ ឬស្តុកទឹកសម្រាប់ប្រើប្រាស់ក្នុងការស្រោចស្រពស្រែស្រូវនៅក្នុងមូលដ្ឋាន តាមការចាំបាច់ និងស្ថានភាពជាក់ស្ដែង៕

ដោយ ស៊ុម វណ្ណា