AKP បន្ទាយមានជ័យ ថ្ងៃទី១៩ ខែមិថុនា ឆ្នាំ២០២៥ -- ស្ថានភាពទូទៅនៅច្រកទ្វារអន្តរជាតិប៉ោយប៉ែតខេត្តបន្ទាយមានជ័យនាព្រឹកថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥នេះ បានបង្ហាញពីសកម្មភាពធ្វើដំណើរចេញចូលរបស់ប្រជាពលរដ្ឋជាធម្មតា ខណៈដែលការរកស៊ីដឹកជញ្ជូនទំនិញតាមរទេះក៏ប្រព្រឹត្តទៅបានដោយរលូន ប៉ុន្តែមានការរឹតបន្តឹងជាដាច់ខាតចំពោះការនាំចូលបន្លែ និងផ្លែឈើមកកាន់ប្រទេសកម្ពុជា។

សកម្មភាពធ្វើដំណើរចេញចូល និងការរកស៊ី ចាប់តាំងពីច្រកទ្វារបានបើកនៅវេលាម៉ោង៨ព្រឹកខាងថៃ និងម៉ោង៩ព្រឹកខាងកម្ពុជា ថ្ងៃទី១៩ ខែមិថុនា ឆ្នាំ២០២៥ គេសង្កេតឃើញមានប្រជាពលរដ្ឋខ្មែរ និងជនបរទេសជាច្រើនបានធ្វើដំណើរឆ្លងកាត់ច្រកទ្វារអន្តរជាតិប៉ោយប៉ែតទៅមក ដោយមានការត្រួតពិនិត្យឯកសារយ៉ាងត្រឹមត្រូវពីសំណាក់សមត្ថកិច្ច។ ការធ្វើដំណើរចេញចូលនេះហាក់មិនមានការកកស្ទះ ឬបញ្ហាអ្វីគួរឱ្យកត់សម្គាល់នោះទេ។ ជាមួយគ្នានេះ បងប្អូនប្រជាពលរដ្ឋដែលប្រកបរបររកស៊ីដឹកជញ្ជូនទំនិញតាមរទេះការរឹត ឬរទេះអូស ក៏នៅតែបន្តសកម្មភាពរបស់ពួកគេបានជាធម្មតាផងដែរ។ ទំនិញផ្សេងៗត្រូវបានដឹកជញ្ជូនឆ្លងកាត់ច្រកនេះទៅមកយ៉ាងមមាញឹក ដើម្បីបំពេញតម្រូវការទីផ្សារ និងការប្រកបរបរចិញ្ចឹមជីវិតរបស់ពួកគាត់។ ទោះបីជាសកម្មភាពធ្វើដំណើរ និងការដឹកជញ្ជូនទំនិញទូទៅប្រព្រឹត្តទៅដោយរលូនក្ដី ក៏សមត្ថកិច្ចនៅច្រកទ្វារអន្តរជាតិប៉ោយប៉ែតនៅតែបន្តអនុវត្តយ៉ាងតឹងរ៉ឹងនូវវិធានការហាមឃាត់ដាច់ខាតការនាំចូលបន្លែ និងផ្លែឈើគ្រប់ប្រភេទពីប្រទេសខាងថៃចូលមកកម្ពុជា។ វិធានការនេះ ត្រូវបានដាក់ចេញក្នុងគោលបំណងការពារគុណភាព និងសុវត្ថិភាពផលិតផលកសិកម្មក្នុងស្រុក ក៏ដូចជាធានាសុខភាពរបស់ប្រជាពលរដ្ឋ។

ពាក់ព័ន្ធនឹងស្ថានភាពខាងលើ លោក ឧត្តមសេនីយ៍ត្រី អ៊ីចំរើន នាយនគរបាលប៉ុស្តិ៍ច្រកទ្វារអន្តរជាតិប៉ោយប៉ែត បានមានប្រសាសន៍បញ្ជាក់ថា សម្រាប់ទិដ្ឋភាពនៅច្រកទ្វារអន្តរជាតិប៉ោយប៉ែត នាព្រឹកថ្ងៃព្រហស្បតិ៍ ទី១៩ ខែមិថុនា យើងឃើញថាការធ្វើដំណើរចេញចូលរបស់បងប្អូនប្រជាពលរដ្ឋនៅតែបន្តដំណើរការជាធម្មតា។ ចំពោះបងប្អូនដែលប្រកបរបររកស៊ីតាមរទេះ ឬរទេះអូស ក៏គាត់អាចដឹកជញ្ជូនឥវ៉ាន់របស់គាត់បានជាធម្មតាដែរ។ ប៉ុន្តែអ្វីដែលយើងនៅតែបន្តរឹតបន្តឹងជាដាច់ខាតនោះ គឺការហាមឃាត់ការនាំចូលបន្លែ និងផ្លែឈើចូលមកប្រទេសកម្ពុជា។ នេះជាវិធានការមួយដែលរាជរដ្ឋាភិបាលបានដាក់ចេញ ដើម្បីការពារផលប្រយោជន៍កសិករក្នុងស្រុក និងសុវត្ថិភាពចំណីអាហារសម្រាប់ប្រជាពលរដ្ឋយើង។ យើងនឹងបន្តអនុវត្តវិធានការនេះឱ្យបានម៉ឺងម៉ាត់បំផុត។

សរុបមក ទិដ្ឋភាពនៅច្រកទ្វារអន្តរជាតិប៉ោយប៉ែតនាព្រឹកនេះបង្ហាញពីសកម្មភាពប្រចាំថ្ងៃដ៏មមាញឹក ប៉ុន្តែមានរបៀបរៀបរយ ដោយមានការយកចិត្តទុកដាក់ខ្ពស់ពីសំណាក់សមត្ថកិច្ចក្នុងការធានាបាននូវសន្តិសុខ សុវត្ថិភាព និងការអនុវត្តច្បាប់ ជាពិសេសការរឹតបន្តឹងលើការនាំចូលបន្លែ និងផ្លែឈើ ដើម្បីលើកកម្ពស់វិស័យកសិកម្មក្នុងស្រុក៕

ដោយ ឈុន សារ៉ាត