AKPកំពង់ធំថ្ងៃទី ១៩ ខែ មិថុនា ឆ្នាំ២០២៥--លោក ហាក់ ម៉ុង ហួត អភិបាលស្រុកតាំងគោកកាលពីថ្ងៃទី១៨ខែមិថុនាឆ្នាំ២០២៥នេះបានដឹកនាំក្រុមការងារនិងប្រជាពលរដ្ឋជាច្រើននាក់ រួមគ្នាដាំដើមក្ងោកនៅតាមដងផ្លូវជាតិលេខ៦ដែលមានចំងាយប្រមាណ១៨គីឡូម៉ែត្រចាប់ពីព្រំប្រទល់ខេត្តកំពង់ចាម រហូតដល់ព្រំប្រទល់ស្រុកបារាយណ៍ក្នុងភូមិសាស្ត្រស្រុកតាំងគោក ខេត្តកំពង់ធំ តាមគម្រោងអភិវឌ្ឍន៍របស់ឯកឧត្តម នួន ផារ័ត្ន អភិបាលខេត្តកំពង់ធំ ក្នុងការដាំដើមក្ងោកនិងដាក់សូឡា ដើម្បីលើកកម្ពស់វិស័យបរិស្ថានបៃតងនិងទេសចរណ៍។

នាឱកាសនោះលោក ហាក់ ម៉ុងហួតថ្លែងអរគុណចំពោះសប្បុរសជន មន្ត្រីរាជការ និងប្រជាពលរដ្ឋ ដែលបានចំណាយថវិកាផ្ទាល់ខ្លួន ចូលរួមឧបត្តម្ភទិញដើមក្ងោក ដាំអមសងខាងផ្លូវជាតិលេខ៦ក្នុងភូមិសាស្ត្រស្រុកតាំងគោកដែលនេះបានបង្ហាញឱ្យឃើញថា ប្រជាពលរដ្ឋកំពុងចូលរួមចំណែកយ៉ាងសំខាន់ជាមួយរដ្ឋាភិបាលក្នុងការជួយដាំដើមឈើឡើងវិញខណៈដែលការដាំកូនឈើនេះ ពិតជាមានសារៈប្រយោជន៍សម្រាប់សង្គមជាតិយើងនិងផ្តល់នូវអត្ថប្រយោជន៍ជាច្រើនដល់មនុស្សសត្វលើភពផែនដីនេះ។ទន្ទឹមនឹងនេះលោក ហាក់ ម៉ុងហួត ក៏បានអំពាវនាវឱ្យប្រជាពលរដ្ឋ ដែលនៅអមសងខាងផ្លូវជាតិលេខ៦ក្នុងភូមិសាស្ត្រស្រុកតាំងគោកក៏ដូចជាក្បែរដើមក្ងោកដែលបានដាំថ្មីចូលរួមជួយថែររក្សាដើមក្ងោកឱ្យបានដុះលូតលាស់ល្អដើម្បីលើកកម្ពស់វិស័យបរិស្ថានបៃតងទុកជាប្រយោជន៍សម្រាប់សង្គមជាតិនិងកូនចៅជំនាន់ក្រោយៗ និងសូមកុំកាប់បំផ្លាញដើមក្ងោកក្នុងប្រការណាមួយ។

លោក ហាក់ ម៉ុងហួត បានបញ្ជាក់ដែរថា ដើមក្ងោកទាំងអស់នេះបានមកពីការចូលរួមចំណែករបស់មន្រ្តីរាជការ ព្រះសង្ឃ និងសប្បុរសជនជាច្រើនរូបដែលបានចូលរួមជាថវិកា ជាមួយរដ្ឋបាលស្រុកដើម្បីទិញដើមក្ងោក យកមកតាំងលម្អរតាមដងផ្លូវជាតិលេខ៦ឱ្យមានភាពស្រស់បំព្រង នៅតាមដងផ្លូវ ដើម្បីទុកជាប្រយោជន៍ដល់មនុស្សជាតិគ្រប់ៗគ្នា សម្រាប់អ្នកជំនាន់បច្ចុប្បន្ន និងអ្នកជំនាន់ក្រោយៗទៀត។

គួរបញ្ជាក់ថាសម្រាប់ការដាំដើមក្ងោកតាមដងផ្លូវជាតិលេខ៦ ដែលមានចំងាយប្រមាណ ១៨គីឡូម៉ែត្រ ត្រូវការដើមក្ងោកចំនួន ២៥០០ដើម។មកដល់ពេលនេះរដ្ឋបាលស្រុកបានដាំដើមក្ងោកជាច្រើនដើមរួចមកហើយនឹងនៅតែបន្តដាំបន្ថែមទៀតក្នុងនោះរដ្ឋបាលស្រុកក៏នៅតែបន្តទទួលជំនួយពីសប្បុរសជនដើម្បីទិញដើមក្ងោកបន្តទៀតផងដែរ៕

ដោយ៖ ស៊ុម វណ្ណា