AKP ភ្នំពេញ ថ្ងៃទី០៣ ខែឧសភា ឆ្នាំ២០២៦--ថ្នាក់ដឹកនាំក្រសួងអប់រំ យុវជន និងកីឡាបានផ្តល់អនុសាសន៍៤ចំណុចសំខាន់ៗ ដើម្បីជំរុញឱ្យដំណើរការនៃការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ប្រកួតដោយជោគជ័យ និងអត្ថន័យ។

អនុសាសន៍៤ចំណុចនេះលើកឡើងដោយឯកឧត្តម វ៉ាត់ ចំរើន រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នៅក្នុងពិធីបើកការប្រកួតជាផ្លូវការ កាលពីល្ងាចថ្ងៃទី០២ ខែឧសភា ឆ្នាំ២០២៦ នៅវិមានពហុកីឡដ្ឋានជាតិអូឡាំពិក។

អនុសាសន៍នេះរួមមាន៖ ១.សម្រាប់គណៈកម្មការរៀបចំការប្រកួត៖«យុត្តិធម៌ និងតម្លាភាព» ការកាត់សេចក្តី ត្រូវប្រកាន់ខ្ជាប់នូវភាពត្រឹមត្រូវ យុត្តិធម៌ និងតម្លាភាពបំផុត។ ការកាត់សេចក្តីដែលល្អ គឺជាការផ្តល់តម្លៃដល់ញើសឈាម និងការខិតខំប្រឹងប្រែងរបស់ក្មួយៗសិស្សានុសិស្ស និងបដិសណ្ឋារកិច្ច៖ ត្រូវយកចិត្តទុកដាក់លើការស្នាក់នៅ បញ្ហាសុខភាព និងសុវត្ថិភាពរបស់ ប្រតិភូកីឡា និងកីឡាករតូចៗ ឱ្យបានហ្មត់ចត់បំផុត។ ២.សម្រាប់ប្រតិភូដឹកនាំ និងគ្រូបង្វឹក៖ «គំរូ និងវិន័យ» ធ្វើជាគំរូល្អ៖ លោកគ្រូ អ្នកគ្រូ គឺជា អាណាព្យាបាលទី២។ ត្រូវបង្ហាញនូវឥរិយាបថល្អ និងការគោរពវិន័យ ដើម្បីឱ្យសិស្សានុសិស្ស រៀនសូត្រតាម និងការអប់រំស្មារតី៖ ក្រៅពីបច្ចេកទេសលេង ត្រូវបណ្តុះស្មារតី សាមគ្គីភាព និងមិត្តភាពរវាងខេត្ត និងខេត្ត ដោយមិនត្រូវតម្កល់ការចង់ឈ្នះរហូត បោះបង់សីលធម៌ កីឡានោះឡើយ។

៣.សម្រាប់កីឡាករ កីឡការិនី (ក្មួយៗសិស្សានុសិស្ស)៖ «លេងដើម្បីសុខភាព និងមិត្តភាព» ស្មារតីកីឡា (Fair Play)៖ ត្រូវលេងដោយអស់ពីសមត្ថភាព គោរពច្បាប់ការប្រកួត និងផ្តល់តម្លៃឱ្យគូប្រកួត ដោយឈ្នះដោយមោទនភាព ចាញ់ដោយកិត្តិយស និងសាមគ្គីភាព។ ៤.ការផ្សារភ្ជាប់ "កីឡា និងការសិក្សា" ៖ កីឡាដើម្បីបង្កើតភាពសប្បាយរីករាយ កាត់បន្ថយមភាពតានតឹងនៅក្នុងអារម្មណ៍ បង្កើតមិត្តភាព ភាពជាអ្នកដឹកនាំ កីឡារស់ក្នុងសន្តិភាព "កីឡានាំមកនូវសុខភាព កីឡានាំមកនូវសន្តិភាព និងការអភិវឌ្ឍ សូមឱ្យការប្រកួតកីឡាសិស្សបឋម សិក្សាថ្នាក់ជាតិ ឆ្នាំ២០២៦ ក្លាយជាវេទិកានៃការបណ្តុះគ្រាប់ពូជកីឡាដ៏រឹងមាំសម្រាប់អនាគតកម្ពុជា”!

បើតាមរបាយការណ៍ឯកឧត្តម ប៉ុន សុខ អគ្គនាយកនៃអគ្គនាយកដ្ឋានកីឡាបានឱ្យដឹងថា ការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ត្រូវបានធ្វើឡើងយោងតាមផែនការប្រតិបត្តិប្រចាំឆ្នាំ២០២៦ និងគោលការណ៍អនុញ្ញាតពីក្រសួងអប់រំ យុវជន និងកីឡា នាយកដ្ឋានរៀបចំព្រឹត្តិការណ៍និងស្ថិតិកីឡានៃអគ្គនាយកដ្ឋានកីឡា បានសហការបច្ចេកទេសជាមួយសហព័ន្ធកីឡាជាតិទាំង១២ ក្នុងការរៀបចំការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ ដែលប្រព្រឹត្តទៅចាប់ពីថ្ងៃទី០១-០៩ ខែឧសភា ឆ្នាំ២០២៦ នៅរាជធានីភ្នំពេញ ដោយមានប្រតិភូ គ្រូបង្វឹក កីឡាករ កីឡាការិនី ចុះឈ្មោះចូលរួមមកពី ២៥រាជធានី-ខេត្ត សរុបចំនួន ២ ៦៨៩នាក់។

ឯកឧត្តម ប៉ុន សុខ គូសបញ្ជាក់បន្ថែមថា ព្រឹត្តិការណ៍កីឡាដ៏ធំនេះធ្វើឡើងក្រោមប្រធានបទ៖ «កីឡាដើម្បីសុខភាពកុមារ» ដោយសំដៅបំផុសសកម្មភាពអប់រំកាយ និងកីឡានៅក្នុងគ្រឹះស្ថានបឋមសិក្សា។ ផ្តល់ឱកាសដល់សិស្សានុសិស្សចូលរួមប្រកួតប្រជែង ដើម្បីជ្រើសរើសសិស្សដែលមានទេពកោសល្យតំណាងជាតិចូលរួមប្រកួតកីឡាកម្រិតអន្តរជាតិ។ ផ្តល់លទ្ធភាពជូនសហព័ន្ធកីឡាជាតិ យកការប្រកួតនេះជាការពិនិត្យមើលទេពកោសល្យ និងសមត្ថភាពរបស់កុមារា កុមារីក្នុងការជ្រើសរើសចូលរួមជាមួយសហព័ន្ធរបស់ខ្លួន។

ជាមួយគ្នានេះក៏ជាផ្តល់ឱកាសដល់មន្រ្តីបច្ចេកទេស ដែលសហព័ន្ធកីឡាជាតិបានបណ្តុះបណ្តាលហើយ បានអនុវត្តការងារជាក់ស្តែង ដើម្បីទទួលបានចំណេះដឹង និងបទពិសោធ។ លើកកម្ពស់គុណភាពនៃការរៀបចំការប្រកួត។ ជួយឱ្យសិស្សានុសិស្សមានសុខុមាលភាពល្អ កាយសម្បទាមាំមួន អំណត់ព្យាយាម គំនិតច្នៃប្រឌិត និងសំដៅដណ្ដើមបានលទ្ធផលល្អលើការប្រកួត។ បង្កលក្ខណៈឱ្យសិស្សជួបជុំគ្នា ចេះសាមគ្គីគ្នា និងចេះរួមរស់ជាមួយគ្នានៅក្នុងសង្គម។ ជំរុញស្មារតីស្នេហាជាតិ និងរួមចំណែកកាត់បន្ថយនូវភាពអសកម្មក្នុងសង្គម ព្រមទាំងបង្កើតជាឱកាសក្នុងការផ្លាស់ប្តូរបទពិសោធរវាងកីឡាករ កីឡាការិនីក្នុងការប្រកួតផងដែរ៕

ដោយ ហេង ណាលីន (រូបភាព៖ NOCC)