AKP បន្ទាយមានជ័យ ថ្ងៃទី១៨ ខែមិថុនា ឆ្នាំ២០២៥ -- លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) រួមជាមួយក្រុមការងារ នៅព្រឹកថ្ងៃទី១៨ ខែមិថុនា ឆ្នាំ២០២៥ បានអញ្ជើញចុះមកត្រួតពិនិត្យទីតាំងសម្រាប់ទទួលពលករខ្មែរដែលវិលត្រឡប់មកពីប្រទេសថៃនៅច្រកទ្ចារអន្តរជាតិប៉ោយប៉ែត ខេត្តបន្ទាយមានជ័យ។

ការចុះត្រួតពិនិត្យនេះធ្វើឡើងនៅច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ ដែលជាច្រកដ៏សំខាន់មួយសម្រាប់ពលករខ្មែរធ្វើដំណើរចេញចូលរវាងប្រទេសកម្ពុជា និងប្រទេសថៃ។ ដំណើរទស្សនកិច្ចរបស់លោកជំទាវ ជូ ប៊ុនអេង គឺសំដៅពិនិត្យមើលដោយផ្ទាល់នូវហេដ្ឋារចនាសម្ព័ន្ធ ក៏ដូចជាការត្រៀមលក្ខណៈរបស់អាជ្ញាធរពាក់ព័ន្ធ ក្នុងការទទួល និងគ្រប់គ្រងលំហូរពលករខ្មែរ ដែលវិលត្រឡប់ចូលប្រទេសវិញ ប្រកបដោយសណ្តាប់ធ្នាប់ សុវត្ថិភាព និងភាពងាយស្រួល។

ក្នុងឱកាសនោះ លោកជំទាវ ជូ ប៊ុនអេង បានមានប្រសាសន៍សង្កត់ធ្ងន់ពីសារៈសំខាន់នៃការយកចិត្តទុកដាក់ខ្ពស់ចំពោះពលករខ្មែរ ជាពិសេសការផ្តល់នូវសេវាចាំបាច់នានា ដើម្បីធានាថាពួកគេទទួលបានការការពារ និងជំនួយទាន់ពេលវេលា។ យើងត្រូវតែធានាថា ទីតាំងទទួលពលកររបស់យើងមានលក្ខណៈគ្រប់គ្រាន់ និងមានអនាម័យល្អ។ ការរៀបចំនេះ មិនមែនត្រឹមតែជាកន្លែងស្នាក់នៅបណ្ដោះអាសន្នប៉ុណ្ណោះទេ ប៉ុន្តែវាក៏ជាការឆ្លុះបញ្ចាំងពីការយកចិត្តទុកដាក់របស់រាជរដ្ឋាភិបាលចំពោះប្រជាពលរដ្ឋរបស់យើងផងដែរ។ អាជ្ញាធរពាក់ព័ន្ធទាំងអស់ ត្រូវតែសហការគ្នាឱ្យបានជិតស្និទ្ធ ដើម្បីសម្រួលដល់ដំណើរការវិលត្រឡប់របស់ពលករ ឱ្យមានភាពរលូន និងឆាប់រហ័ស។ យើងមិនចង់ឱ្យមានការកកស្ទះ ឬការលំបាកណាមួយកើតឡើងចំពោះបងប្អូនពលករឡើយ។

ក្រៅពីការរៀបចំទីតាំង យើងក៏ត្រូវបន្តពង្រឹងយន្តការប្រយុទ្ធប្រឆាំងអំពើជួញដូរមនុស្សផងដែរ។ ពលករដែលវិលត្រឡប់មកវិញអាចជាក្រុមដែលងាយរងគ្រោះ ដូច្នេះយើងត្រូវមានវិធានការការពារ និងផ្សព្វផ្សាយព័ត៌មានឱ្យបានទូលំទូលាយ ដើម្បីឲ្យពួកគាត់យល់ដឹងពីហានិភ័យ និងវិធីការពារខ្លួនពីការជួញដូរ។

ទន្ទឹមនឹងនោះ លោកជំទាវបានមានប្រសាសន៍ថា «ខ្ញុំសូមថ្លែងអំណរគុណដល់កងកម្លាំងនគរបាល និងអាជ្ញាធរពាក់ព័ន្ធទាំងអស់ ដែលបានខិតខំប្រឹងប្រែងក្នុងការរក្សាសន្តិសុខ សណ្តាប់ធ្នាប់ និងការរៀបចំទីតាំងនេះឱ្យបានល្អប្រសើរ។ យើងត្រូវតែបន្តកិច្ចការងារនេះដោយស្មារតីទទួលខុសត្រូវខ្ពស់ ដើម្បីធានាបាននូវសុខុមាលភាពរបស់បងប្អូនពលករយើង។»

ដំណើរទស្សនកិច្ចរបស់លោកជំទាវ ជូ ប៊ុនអេង បានបង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការការពារ និងផ្តល់ការគាំទ្រដល់ពលករខ្មែរ ដែលជាកម្លាំងចលករដ៏សំខាន់មួយក្នុងការអភិវឌ្ឍសេដ្ឋកិច្ចជាតិ។ តាមរយៈការត្រួតពិនិត្យនេះ អាជ្ញាធរពាក់ព័ន្ធនឹងបន្តកែលម្អ និងពង្រឹងសេវាកម្មរបស់ខ្លួន ដើម្បីឆ្លើយតបទៅនឹងតម្រូវការជាក់ស្តែងរបស់ពលករខ្មែរ។

សូមបញ្ជាក់ថា កាលពីថ្ងៃទី១៦ ខែមិថុនា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំទៅឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា និងសារពិសេសសម្តេចតេជោ ហ៊ុន សែន ប្រធានព្រឹទ្ធិសភានៃព្រះរាជាណាចក្រកម្ពុជា ប្រាប់ទៅស្ថានកុងស៊ុលខ្មែរនៅប្រទេសថៃ ជួយសម្រួលឯកសារនានា ដែលពលករខ្មែរខ្វះខាតសម្រាប់ឆ្លងដែនមកកម្ពុជា។ ក្នុងកំឡុងពេលដែលកម្ពុជា និងថៃ មានវិវាទព្រំដែនជាមួយគ្នានេះ មានជនជ្រុលនិយមថៃមួយចំនួនបានគំរាមដេញពលករខ្មែរត្រឡប់មកប្រទេសវិញ ហើយពលរដ្ឋថៃ ដែលមានភាពជ្រុលនិយមខ្លះ ក៏បានរើសអើងសម្រាប់ពលករខ្មែរផងដែរ។

ជាមួយគ្នានោះច្រកទ្វារអន្តរជាតិប៉ោយប៉ែត ច្រកទ្វារព្រំដែនស្ទឹងបត់ អាជ្ញាធរខេត្ត ក្រុមការងារក្រសួងការងារ និងបណ្តុះបណ្តាលវិជ្ជាជីវៈ បាននិងកំពុងប្រចាំការដើម្បីរង់ចាំទទួលស្វាគមន៍បងប្អូនប្រជាពលរដ្ឋ និងពលករខ្មែរ ដែលត្រឡប់មកពីប្រទេសថៃវិញ។ ចំពោះបងប្អូនពលករដែលវិលត្រឡប់មកប្រទេសកម្ពុជា ទោះជាគ្មានឯកសារគ្រប់គ្រាន់ក៏ដោយតាមបទបញ្ជា និងសាររបស់សម្តេច ក្រុមការងារបានត្រៀមលក្ខណៈសម្រួលឯកសារនានា ការផ្តល់អាហារបណ្តោះអាសន្ន រយៈពេលវែង កន្លែងទទួលសមរម្យ និងរថយន្តជួយដឹកជញ្ជូនបងប្អូនត្រឡប់ទៅស្រុកកំណើតវិញ។

ក្រសួងការងារ និងបណ្ដុះបណ្ដាលវិជ្ជាជីវៈ ដែលជាសេនាធិការរបស់រាជរដ្ឋាភិបាល ក៏បានជួយសម្របសម្រួលជូនបងប្អូនទាំងផ្លូវច្បាប់ ការផ្ដល់ការងារថ្មីនៅក្នុងស្រុក និងផ្ដល់ការបណ្ដុះបណ្ដាលជំនាញបច្ចេកទេស និងវិជ្ជាជីវៈមួយច្បាស់លាស់ ជាមួយគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈនានានៅកម្ពុជា ដែលក្នុងនោះអង្គភាពក្រោមឱវាទក្រសួងការងារ និងបណ្តុះបណ្តាលវិជ្ជាជីវៈ ដែលមានទីភ្នាក់ងារជាតិមុខរបរ និងការងារ (NEA), TVET, និងបេឡាជាតិសន្តិសុខសង្គម (ប.ស.ស.) ព្រមទាំងមន្រ្តី ទាំងថ្នាក់ជាតិ និងថ្នាក់ក្រោមជាតិ ក៏បាន និងកំពុងសស្រាក់សស្រាំអស់ពីកម្លាំងកាយចិត្ត ក្នុងការអនុវត្តលើការងារនេះផងដែរ៕

ដោយ ឈុន សារ៉ាត