ទីភ្នាក់ងារសារព័ត៌មានកម្ពុជា

បទយកការណ៍៖ ប្រជាពលរដ្ឋខ្មែរប្រមាណជាង ១០ ម៉ឺននាក់ បានជួបជុំដើរក្បួនបង្ហាញស្មារតីរួមគ្នា ជាខឿនការពារជាតិប្រជាជនដ៏រឹងមាំ

ចែករំលែក ៖

AKP ភ្នំពេញ ថ្ងៃទី១៨ ខែមិថុនា ឆ្នាំ២០២៥--ចាប់តាំងពីម៉ោង៥ទៀបភ្លឺ ថ្ងៃទី១៨ ខែមិថុនា ឆ្នាំ២០២៥ គេសង្កេតឃើញវត្តមានបងប្អូនប្រជាពលរដ្ឋខ្មែរ គ្រប់វ័យ គ្រប់និន្នាការនយោបាយ បានជួបជុំគ្នាជាបន្តបន្ទាប់ ហើយរលកនៃចំនួនអ្នកចូលរួមបានប្រមូលផ្តុំច្រើនឡើងៗបង្កើតជាផ្ទាំងទស្សនីយភាពមួយដ៏រស់រវើក ខណៈទង់ជាតិខ្មែរគ្រវីឡើង អមដោយព្រះបរមឆាយាលក្ខណ៍របស់ព្រះមហាក្សត្រ ព្រះមហាក្សត្រី ព្រះបរមរតនកោដ្ឋ និងរូបថតសម្តេចតេជោ ហ៊ុន សែន សម្តេចបវរធិបតី ជាមួយសម្លេងស្រែកដ៏រន្ទឺ «ជយោព្រះរាជាណាចក្រកម្ពុជា មោទនភាពជាតិខ្មែរ គាំទ្ររាជរដ្ឋាភិបាល និងកម្លាំងជួរមុខរបស់កម្ពុជា»។

ព្រឹត្តិការណ៍នៃការជួបជុំនេះគឺដើម្បីបង្ហាញនូវមោទនភាពជាតិ និងបង្ហាញពីឆន្ទៈស្នេហាជាតិ ទឹកដី និងគាំទ្រចំណាត់ការរបស់រាជរដ្ឋាភិបាលក្នុងដោះស្រាយបញ្ហាព្រំដែនដោយសន្តិវិធី តាមយន្តការការទូត និងច្បាប់អន្តរជាតិដើម្បីបុព្វហេតុការពារបូរណភាពទឹកដី អធិបតេយ្យជាតិកម្ពុជា។ នេះជាព្រឹត្តិការណ៍ដ៏ធំជាប្រវត្តិសាស្ត្រថ្មីមួយទៀតដែលបង្ហាញអំពីស្មារតីរួមគ្នារបស់ប្រជាជាតិមួយ ដែលជាប្រទេសតូច មានប្រជាជនតិច ប៉ុន្តែប្រជាជនមានស្មារតីសាមគ្គី ឯកភាពជាតិដ៏រឹងមាំ ពិសេសគឺខឿនការពារជាតិប្រជាជន។

នៅមុនការចាប់ផ្តើមដំណើរថ្មើរជើង «Solidarity March» ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានថ្លែងនូវមោទនភាពចំពោះការចូលរួមដ៏ច្រើនកុះកររបស់ប្រជាពលរដ្ឋខ្មែរមកពីគ្រប់ទិសទី ពីគ្រប់គណបក្សនយោបាយ ពីគ្រប់មជ្ឈដ្ឋាន រួមទាំងមានវត្តមាននិមន្តចូលរួមពីព្រះសង្ឃផងដែរ។ ក្នុងនាមជាប្រធានសហភាពសហព័ន្ធយុវជនកម្ពុជា ដំណើរថ្មើរជើងនៅថ្ងៃនេះ មិនមែនជាកម្មវិធីរបស់ ស.ស.យ.ក.ទៀតឡើយ ប៉ុន្តែជាកម្មវិធីរបស់ប្រជាពលរដ្ឋខ្មែរទាំងអស់គ្នា។

ឯកឧត្តមបានបន្តថា៖ «ការជួបជុំគ្នានៅថ្ងៃនេះរបស់មហាគ្រួសារខ្មែរ មិនមែនដើម្បីបង្ហាញកម្លាំង ឬក៏ការគំរាមកំហែងទៅអ្នកណាទេ តែជាការជួបជុំដើម្បីបង្ហាញនូវឆន្ទៈរួបរួមគ្នារបស់ប្រជាពលរដ្ឋខ្មែរ និងស្មារតីគាំទ្រ និងជឿជាក់លើប្រមុខដឹកនាំប្រទេស ក៏ដូចជាកម្លាំងជួរមុខរបស់កម្ពុជា។ ការជួបជុំនេះបង្ហាញពីឈាមជ័រជាខ្មែរ មហាគ្រួសារខ្មែរ ដួងព្រលឹងជាតិខ្មែរ ទឹកចិត្តឆន្ទៈ និងក្តីស្រឡាញ់»។

ឯកឧត្តមប្រធាន ស.ស.យ.ក មានប្រសាសន៍ថា៖ «កម្មវិធីនេះគឺសបញ្ជាក់ពីទឹកចិត្តម្នាក់ៗដែលជាកូនខ្មែរ ដែលមានការគិតគូរយល់ពីសុខទុក្ខ មានការរួមចំណែក ហើយចង់បង្ហាញពីឆន្ទៈ និងមោទនភាព ចង់បង្ហាញពីក្តីស្រឡាញ់ ចង់បង្ហាញពីការគាំទ្រ ចង់បង្ហាញពីការជឿជាក់ដល់កម្ពុជា ជឿជាក់ទៅលើព្រះមហាក្សត្រ ជឿជាក់ទៅលើសម្តេចយាយ ជឿជាក់ទៅលើសម្តេចតេជោ ជឿជាក់ទៅលើសម្តេចមហាបរវធិបតី នាយករដ្ឋមន្ត្រីកម្ពុជា»។

ស្មារតី សកម្មភាព កាយវិការ និងសម្លេងនៃការគាំទ្រ របស់ប្រជាពលរដ្ឋខ្មែរនៅពេលនេះគឺជាកម្លាំងចិត្ត និងថាមពលសម្រាប់រាជរដ្ឋាភិបាល និងកងកម្លាំងជួរមុខរបស់កម្ពុជា ដែលកំពុងការពារបូរណភាពទឹកដី និងអធិបតេយ្យជាតិ។ ជាព្រឹត្តិការណ៍មួយដ៏ធំសម្រាប់ប្រជាពលរដ្ឋខ្មែរ មានឱកាសក្នុងការបង្ហាញនូវការគាំទ្រ និងបង្ហាញឆន្ទៈគាំទ្រទៅលើវិធានការរបស់រាជរដ្ឋាភិបាល ក៏ដូចជាការពារទឹកដី ផ្អែកលើមូលដ្ឋាននៃច្បាប់។ ដំណើរថ្មើរជើងនេះធ្វើឡើងដើម្បីបង្ហាញពីស្មារតីសាមគ្គីភាពរបស់ប្រជាពលរដ្ឋខ្មែរ ជាពិសេសយុវជនដែលជាសសរស្តម្ភរបស់ជាតិ ក្នុងឆន្ទៈមោះមុត ការពារជាតិ មាតុភូមិ និងការស្រឡាញ់សន្តិភាព។

ក្នុងទឹកមុខញញឹមស្រស់ស្រាយ លោក យ៉ាន់ ភក្តី ជាយុវជនមួយរូបនៅរាជធានីភ្នំពេញ ដែលបានចូលរួមក្នុងដំណើរថ្មើរជើង «Solidarity March»បានបង្ហាញពីអារម្មណ៍រីករាយដែលបានចូលរួមបង្ហាញការគាំទ្រជំហរបស់រាជរដ្ឋាភិបាល និងកងកម្លាំងជួរមុខ ក្នុងការការពារបូរណភាពទឹកដី និងអធិបតេយ្យជាតិ ដោយបានថ្លែងក្នុងនាមជាយុវជនខ្មែរមួយរូបថា៖ «ខ្ញុំមានអារម្មណ៍រីករាយណាស់ក្នុងនាមខ្ញុំជាយុវជនមួយរូប ហើយខ្ញុំគាំទ្រចំពោះចំណាត់ការរបស់រាជរដ្ឋាភិបាលក្នុងការនាំយកបញ្ហាព្រំដែន នៅប្រាសាទតាមាន់ធំ តាមាន់តូច តាក្របី និងតំបន់មុំបី ទៅកាន់តុលាការយុត្តិធម៌អន្តរជាតិទីក្រុងឡាអេ ដើម្បីកាត់ក្តីរកយុត្តិធម៌ឱ្យខ្មែរ ។ ហើយខ្ញុំសង្ឃឹមថាខ្មែរយើងនឹងឈ្នះក្តី ខ្ញុំសង្ឃឹមថាថៃនឹងទទួលយកសាលក្រមនេះដោយសុទ្ធចិត្ត ។ គោរពច្បាប់អន្តរជាតិ មានន័យថា ស្រឡាញ់សន្តិភាព។ ខ្ញុំគិតថាយន្តការតុលាការអន្តរជាតិ គឺយន្តការដ៏ត្រឹមត្រូវបង្ហាញថា មេដឹកនាំខ្មែរ ស្រឡាញ់សន្តិភាព»។

ចំណែកយុវជន រតនៈ វិទូ បានលើកឡើងថា៖ ខ្ញុំគោរពចំពោះភាពវ័យឆ្លាតរបស់សម្តេចបវរធិបតី ដែលបានសម្រេចចិត្តប្តឹងទៅតុលាការទីក្រុងឡាអេ ព្រោះទំនាស់ព្រំដែនជាមួយថៃនេះពិតជាមិនអាចដោះស្រាយដោយទ្វេភាគីបានទេ ព្រោះថៃតែងបង្ហាញចេតនារំលោភបំពានដែនដីរបស់កម្ពុជា បើទោះបីជាប្រទេសទាំងពីរធ្លាប់មានគោលការណ៍អន្តរជាតិរវាងគ្នានិងគ្នាយ៉ាងណាក្ដី ជាក់ស្ដែងក្រុមទាហានថៃតែងចូលឈ្លានពានតំបន់ទាំង ៤ របស់កម្ពុជា ដូចជា តំបន់មុំ៣ឬចុងបូក ប្រាសាទតាមាន់ធំ តាមាន់តូច និងប្រាសាទតាក្របី ជាដើម។ ដើម្បីបញ្ចប់ជម្លោះដ៏រ៉ាំរ៉ៃនេះ បើទោះបីភាគីថៃមិនឯកភាពជាមួយកម្ពុជាក្នុងការយកបញ្ហានេះទៅដោះស្រាយនៅតុលាការអន្តរជាតិក៏ដោយ ខ្ញុំជឿជាក់លើការដឹកនាំប្រកបដោយគតិបណ្ឌិតវែងឆ្ងាយរបស់ សម្តេចបវរធិបតី ដែលបង្ហាញពីភាពចាស់ទុំ និងភាពស៊ីវីល័យរបស់ប្រទេសជាតិយើង ឱ្យអន្តរជាតិបានឃើញថា ខ្មែរជាប្រជាជាតិមួយគោរពច្បាប់អន្តរជាតិ ស្រឡាញ់សន្តិភាព។

«ខ្ញុំគិតថា បើសិនជាប្រទេសថៃមានសុច្ឆន្ទៈចង់បានសន្តិភាព មិត្តភាព សម្រាប់ប្រទេសជិតខាងគ្នាមែន គួរតែឯកភាពនាំយកបញ្ហាទំនាស់នេះទៅកាន់តុលាការអន្តរជាតិឡាអេជួយកាត់សេចក្តីឱ្យ ដើម្បីបញ្ចប់ជម្លោះដ៏រ៉ាំរ៉ៃនេះ។ ហើយនៅពេលសាលក្រមចេញហើយគឺសុខស្រួលគ្នាបំផុត តែបើសិនជាអ្នកនយោបាយថៃយកបញ្ហាតំបន់ទាំង ៤ ជារឿងនយោបាយវិញ ខ្ញុំយល់ថានឹងមានរឿងមិនប្រក្រតីតទៅទៀតមិនចប់ មិនហើយឡើយ»។

វាមិនមែនជាលើកទី១ ទេដែលថៃមានចេតនាឈ្លានពានលើកម្ពុជា ក៏ដូចជាប្រទេសក្បែរខាងខ្លួនតាមរយៈក្រុម យោធាជ្រុលនិយមមួយចំនួន ដែលគិតថាប្រទេសទាំងនោះខ្សោយជាងខ្លួន។ អ្នកជំនាញប្រវត្តិសាស្ត្រកម្ពុជាបានលើកឡើងថា ការឈ្លានពានរបស់ថៃមកលើកម្ពុជា គឺជាទង្វើរបស់ក្រុមជ្រុលនិយមថៃមួយចំនួន ដែលមានបំណងចង់បង្ហាញពីស្មារតីជាតិនិយម ហើយយកកម្ពុជាធ្វើជាឧបករណ៍ ក្នុងកិច្ចការនយោបាយរបស់ពួកគេ។

លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានលើកឡើងថា ប្រទេសថៃមានចេតនាឈ្លានពានលើកម្ពុជាជាង ១០០ឆ្នាំមកហើយ ពោលគឺតាំងពីឆ្នាំ១៩០៤ មកម៉្លេះ ទោះបីជាភាគីទាំងពីរធ្លាប់ឆ្លងកាត់ការប៉ះទង្គិចគ្នា និងធ្លាប់បានចុះសន្ធិសញ្ញាជាមួយគ្នាជាច្រើនយ៉ាងណាក្ដី។ ជាការកត់សម្គាល់ លោកបណ្ឌិត យង់ ពៅ ការណ៍ដែលថៃតែងបង្ហាញភាពគឃ្លើនរំលោភបំពាន និងមិនគោរពគោលការណ៍អន្តរជាតិជាមួយកម្ពុជាគឺដោយសារថៃគិតថាកម្ពុជាខ្សោយជាងខ្លួន ហើយក្រុមជ្រុលនិយមរបស់ថៃក៏បានធ្វើទង្វើនេះដាក់ប្រទេសក្បែររបស់ខ្លួនផ្សេងទៀតផងដែរ។

សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានផ្ញើសារចូលរួមក្នុងព្រឹត្តិការណ៍ដំណើរថ្មើរជើង «Solidarity March» នេះ ដោយបានបង្ហាញដោយមោទនភាពថា ការដើរក្បួនថ្មើរជើងនៅពេលនេះគឺពិតជាមានអត្ថន័យយ៉ាងជ្រាលជ្រៅ និងបានផ្តល់កម្លាំងចិត្តគាំទ្រយ៉ាងសំខាន់ដល់រាជរដ្ឋាភិបាល និងជាពិសេសកងកម្លាំងជួរមុខក្នុងការបន្តបំពេញបេសកកម្មការពារឯករាជ្យជាតិ បូរណភាពទឹកដី នៃព្រះរាជាណាចក្រកម្ពុជា។ ក្បួនថ្មើរជើងនេះបានបង្ហាញនូវស្មារតីស្នេហាជាតិ ស្នេហាទឹកដី របស់ប្រជាជាតិខ្មែរ។

សម្តេចបវរធិបតីបានអរព្រះគុណថ្វាយព្រះមហាក្សត្រ ព្រះមហាក្សត្រី អតីតព្រះមហាក្សត្រ សម្តេចព្រះនរោត្តម សីហនុ ព្រះបរមរតនកោដ្ឋ អរគុណចំពោះសម្តេចតេជោ ហ៊ុន សែន ដែលជាស្ថាបនិកនៃនយោបាយឈ្នះ ឈ្នះដែលបានដឹកនាំប្រទេសជាតិមានសុខសន្តិភាព និងការអភិវឌ្ឍ។ សម្តេចក៏បានអរគុណចំពោះទឹកចិត្តប្រជាពលរដ្ឋខ្មែរ ដែលបានគាំទ្រ និងចូលរួមឧបត្ថម្ភជាសម្ភារ ថវិកា ស្បៀងអាហារ និងបានចូលរួមយ៉ាងផុសផុលតាមគ្រប់រូបភាព ក្នុងការលើកទឹកចិត្តកងកម្លាំងរបស់យើង ក្នុងនាមប្រជាជាតិខ្មែរតែមួយ ដែលបញ្ជាក់ឱ្យឃើញពីភាពរឹងមាំនៃខឿនការពារជាតិរបស់ប្រជាជន ដើម្បីគាំទ្រដល់រាជរដ្ឋាភិបាល និងកម្លាំងជួរមុខ នៅក្នុងបុព្ធហេតុ ការពារអធិបតេយ្យ និងបូរណភាពទឹកដី នៃព្រះរាជាណាចក្រកម្ពុជា។

ស្របពេលស្ថានភាពជម្លោះព្រំដែនកម្ពុជា-ថៃ វិវត្តកាន់តែស្មុគស្មាញ និងក្នុងស្មារតីគាំទ្រដល់កងកម្លាំងជួរមុខកម្ពុជា ដែលជាខឿនការពារជាតិ សហភាពសហព័ន្ធយុវជនកម្ពុជា (ស.ស.យ.ក) បានប្រកាសរៀបចំ ដំណើរថ្មើរជើង «Solidarity March» នៅព្រឹកថ្ងៃទី១៨ ខែមិថុនា ឆ្នាំ២០២៥ ក្នុងស្មារតីបង្ហាញការរួមគ្នាជាធ្លុងមួយគាំទ្រដល់រាជរដ្ឋាភិបាល និងកងកម្លាំងជួរមុខកម្ពុជា។ដំណើរថ្មើរជើងនេះ ធ្វើឡើងស្ថិតក្នុងស្មាតីធំចំនួន៣រួមមាន៖ ១.បង្ហាញការគាំទ្រសុចរិតភាព និងភាពស្របច្បាប់របស់កម្ពុជា ផ្អែកលើច្បាប់ និងបទដ្ឋានគតិយុត្តផ្សេងៗ (កម្ពុជាមិនមានបំណងចង់បានទឹកដីរបស់ប្រទេសណាមួយសូម្បីតែមួយមីលីម៉ែត្រ ប៉ុន្តែកម្ពុជាក៏មិនឱ្យនរណាយកដីសូម្បីតែមួយមីលីម៉ែត្រដែរ)។ ២.បង្ហាញការគាំទ្រវិធានការរបស់រាជរដ្ឋាភិបាលទាំងផ្នែកការទូត ផ្នែកការពារជាតិ ផ្នែកច្បាប់ និងខឿនការពារជាតិប្រជាជន។ ៣.បង្ហាញការគាំទ្រក្នុងការសម្រេចចិត្តរបស់រាជរដ្ឋាភិបាលកម្ពុជាក្នុងការរៀបចំឯកសារដើម្បីដាក់ពាក្យប្តឹងទៅតុលាការយុត្តិធម៌អន្តរជាតិ (ICJ) ដោយផ្អែកលើស្មារតីត្រូវពន្លត់ភ្លើងជាជាងអង្គុយបក់ផ្សែង ។

ពិតណាស់ថាប្រជាពលរដ្ឋខ្មែរប្រាកដជាគ្មានអ្នកណាម្នាក់ភ្លេចនៅឡើយទេនូវរូបភាពនៃវិនាសកម្មសង្គ្រាម ដែលខ្លួនបានហែលឆ្លងកាត់អស់រយៈពេលជិត ៣ទសវត្សរ៍។ បច្ចុប្បន្ន ថ្វីបើប្រទេសជាតិស្គាល់សុខសន្តិភាពឆ្លងផុតពីសង្គ្រាមស៊ីវិលក៏ពិតមែន ប៉ុន្តែប្រទេសកម្ពុជាកំពុងពើបប្រទះនឹងសង្គ្រាមថ្មីមួយទៀតនៅក្នុងសតវត្សទី ២១នេះនោះគឺសង្គ្រាម «ឈ្លានពាន» ទឹកដីពីសំណាក់ប្រទេសជិតខាង។ ជាការពិត សង្គ្រាមដណ្តើមទឹកដី មិនមែនជារឿងថ្មីសម្រាប់ប្រវត្តិសាស្ត្រកម្ពុជា ជាមួយថៃដែលមានប្រវត្តិដណ្តើមទឹកដីកម្ពុជាតាំងពីយូរលង់ មុនសម័យបារាំងចូលស្រុកទៅទៀត។ ប៉ុន្តែអ្វីដែលមិនគួរឱ្យជឿនោះ គឺរឿងរ៉ាវដែលបានកប់ជ្រៅទៅក្នុងអតីតកាលទៅហើយនោះនៅតែផ្ទុះឡើងជាថ្មីក្នុងយុគសម័យដែលពិភពលោកកំពុងធ្វើនយោបាយសកលភាវូបនីយកម្ម បើកចំហជើងមេឃ ស្ទើរតែគ្មានព្រំដែនទៅហើយនោះ។ ការបង្ករឿងរបស់ថៃមកលើបូរណភាពទឹកដីកម្ពុជា ម្តងហើយម្តងទៀតបែបនេះបង្ហាញកម្ពុជាថា ការពង្រឹងវិស័យយោធា គឺជាកិច្ចការចម្បងមួយដែលមិនអាចមើលរំលងបានឡើយ បើទោះបីជាប្រទេសជាតិស្ថិតក្នុងស្ថានភាពសន្តិភាពក៏ដោយ មានន័យថា ប្រទេសកម្ពុជាត្រូវការវិស័យការពារជាតិខ្លាំង មិនមែនដើម្បីត្រៀមធ្វើសង្គ្រាមទេ ប៉ុន្តែគឺត្រៀមការពារទឹកដីរបស់ខ្លួន ពីព្រោះថា ការទន្ទឹងរង់ចាំអន្តរាគមន៍ពីសហគមន៍អន្តរជាតិ មិនមែនងាយស្រួល និងទាន់ចិត្ត ដូចដែលយើងចង់បាននោះឡើយ ។ ការចូលមកបាញ់សម្លាប់កងទ័ពកម្ពុជាចុងក្រោយនេះ បង្ហាញប្រាប់យើងយ៉ាងច្បាស់ថា សៀមទោះបីបានប្តូរឈ្មោះជាថៃវិញតាំងពីឆ្នាំ១៩៣៩ ក៏ដោយ តែជនជាតិនេះមួយចំនួនមិនបានផ្លាស់ប្តូរមហិច្ឆតាឈ្លានពានទឹកដីកម្ពុជាឡើយ៕

ដោយ បាន ច័ន្ទតារារិទ្ធ