AKP ប៉េកាំង ថ្ងៃទី២៥ ខែឧសភា ឆ្នាំ២០២៥ -- ព្រឹត្តិការណ៍នៃកិច្ចប្រជុំកំពូលអាស៊ាន-ចិន-ក្រុមប្រឹក្សាប្រតិបត្តិការឈូងសមុទ្រ (GCC) កើតឡើងចំពេលដែលភាពមិនប្រាកដប្រជានៅក្នុងសេដ្ឋកិច្ចពិភពលោកកំពុងមានការកើនឡើង និងជាការឆ្លើយតបទៅនឹងប្រឈមនឹងការរំខានផ្នែកវិស័យពាណិជ្ជកម្ម ដោយប្រទេសចិន អាស៊ាន និងសមាជិក GCC ជាផ្នែកមួយនៃសកលលោកភាគខាងត្បូង ដែលអាចរួមគ្នាជំរុញកិច្ចសហប្រតិបត្តិការបន្ថែមទៀតនៅទូទាំងបណ្តាប្រទេសផ្សេងទៀតនៅសកលលោកភាគខាងត្បូង តាមរយៈគំនិតផ្តួចផ្តើមដែលស្រដៀងគ្នាទៅនឹងគំនិតផ្តួចផ្តើមខ្សែក្រវ៉ាត់ និងផ្លូវ ដែលត្រូវបានដាក់ចេញដោយប្រធានាធិបតីចិន លោក ស៊ី ជីនពីង (Xi Jinping)។ នេះបើយោងតាមលោក ប៊ុនន៍ ណាហ្គារ៉ា (Bunn Nagara) នាយក និងជាមន្ត្រីជាន់ខ្ពស់នៅកម្មវិធីវេទិកាគំនិតផ្តួចផ្តើមខ្សែក្រវ៉ាត់ និងផ្លូវសម្រាប់តំបន់អាស៊ីប៉ាស៊ីហ្វិក (BRICAP) ដែលជាក្រុមអ្នកគិតគូរក្រៅរដ្ឋាភិបាលឯករាជ្យដែលមានមូលដ្ឋាននៅទីក្រុងគូឡាឡាំពួរ។

អ្នកជំនាញរូបនេះបាននិយាយថា «ភាពជោគជ័យរបស់យើងក្នុងកិច្ចសហប្រតិបត្តិការនេះ ក៏ជាជោគជ័យមួយសម្រាប់សកលលោកភាគខាងត្បូង ហើយបណ្តាប្រទេសនៅអាហ្រ្វិក និងអាមេរិកឡាទីនក៏បានចូលរួមចែករំលែកសេចក្តីប្រាថ្នារបស់យើងដែរ»
នៅក្នុងរបាយការណ៍ទស្សនវិស័យសេដ្ឋកិច្ចពិភពលោក (WEO) នៅក្នុងខែមេសា បានឱ្យដឹងថា មូលនិធិរូបិយវត្ថុអន្តរជាតិ (IMF) បានបន្ទាបការព្យាករណ៍កំណើនសេដ្ឋកិច្ចសកលលោករបស់ខ្លួនសម្រាប់ឆ្នាំ២០២៥ មកនៅត្រឹម ២,៨% ដែលជាការបន្ថយចុះយ៉ាងខ្លាំងចំនួន ០,៥% ពីការប៉ាន់ស្មានកាលពីក្នុងខែមករា។

របាយការណ៍នេះបាននិយាយថា «ចាប់តាំងពីការចេញផ្សាយការធ្វើបច្ចុប្បន្នភាពរបាយការណ៍ WEO នៅក្នុងខែមករា វិធានការពន្ធថ្មីជាបន្តបន្ទាប់ដោយសហរដ្ឋអាមេរិក និងវិធានការតបតដោយដៃគូពាណិជ្ជកម្មត្រូវបានប្រកាស និងអនុវត្ត»។

បណ្តារដ្ឋមន្ត្រីសេដ្ឋកិច្ចអាស៊ាន បាននិយាយនៅក្នុងសេចក្តីថ្លែងការណ៍រួមមួយដែលបានចេញបន្ទាប់ពីកិច្ចប្រជុំក្នុងទម្រង់និម្មិតពិសេសមួយដែលបានធ្វើឡើងនៅថ្ងៃទី១០ ខែមេសា ឆ្នាំ២០២៥ កន្លងទៅនេះ ថា «ការដាក់ពន្ធដែលមិនធ្លាប់មានពីមុនមកដោយសហរដ្ឋអាមេរិកនឹងរំខានដល់លំហូរពាណិជ្ជកម្ម និងការវិនិយោគក្នុងតំបន់ និងពិភពលោក ក៏ដូចជាខ្សែសង្វាក់ផ្គត់ផ្គង់ ព្រមទាំងប៉ះពាល់ដល់អាជីវកម្ម និងអ្នកប្រើប្រាស់ទូទាំងពិភពលោក រួមទាំងសហរដ្ឋអាមេរិកផងដែរ»។

ពន្ធរបស់សហរដ្ឋអាមេរិកក៏កំពុងបង្កផលប៉ះពាល់ដល់ថិវកាចំនួន ២២ពាន់លានដុល្លារអាម៉េរិកសម្រាប់ការនាំចេញមិនមែនប្រេងនៃបណ្តាប្រទេសសេដ្ឋកិច្ចនៃក្រុមប្រឹក្សាប្រតិបត្តិការឈូងសមុទ្រ (GCC) ផងដែរ។ នេះបើយោងតាមការសង្ខេបគោលនយោបាយថ្មីៗនេះដោយគណៈកម្មការសេដ្ឋកិច្ច និងសង្គមសម្រាប់តំបន់អាស៊ីខាងលិច។

ទីភ្នាក់ងារអង្គការសហប្រជាជាតិបាននិយាយថា ប្រទេសបារ៉ែនត្រូវបានរងផលប៉ះពាល់យ៉ាងខ្លាំងដោយសារតែការពឹងផ្អែកខ្លាំងទោលើការនាំចេញអាលុយមីញ៉ូម និងសារធាតុគីមីទៅកាន់ទីផ្សារសហរដ្ឋអាមេរិក ខណៈដែលប្រទេសអេមីរ៉ាត់អារ៉ាប់រួមអាចជួបនូវការរំខានដល់ការនាំចេញឡើងវិញទៅកាន់សហរដ្ឋអាមេរិកដែលមានទឹកប្រាក់ប្រមាណ ១០ពាន់លានដុល្លារអាម៉េរិក ដែលជាលទ្ធផលនៃការដាក់ចេញពន្ធគយរបស់សហរដ្ឋអាមេរិកទៅលើទំនិញដែលផលិតដំបូងនៅក្នុងប្រទេសទីបី៕

ដោយ៖ យា ចិន្តាខន្តី