AKP ប៉េកាំង ថ្ងៃទី២៥ ខែឧសភា ឆ្នាំ២០២៥ -- ក្រុមអ្នកវិភាគបាននិយាយថា កិច្ចសហប្រតិបត្តិការរវាងសមាគមប្រជាជាតិអាស៊ីអាគ្នេយ៍ (អាស៊ាន) ប្រទេសចិន និងបណ្តាប្រទេសនៃក្រុមប្រឹក្សាសហប្រតិបត្តិការឈូងសមុទ្រ (GCC) នឹងបើកនូវសក្តានុពលដ៏ធំសម្បើមសម្រាប់កិច្ចសហប្រតិបត្តិការពហុភាគីលើគ្រប់វិស័យ និងនាំមកនូវស្ថិរភាពទៅក្នុងសេដ្ឋកិច្ចពិភពលោក។

នៅក្នុងកិច្ចប្រជុំកំពូលអាស៊ាន-ចិន-GCC ដែលនឹងប្រព្រឹត្តទៅនៅក្នុងរដ្ឋធានីរបស់ប្រទេសម៉ាឡេស៊ីនៅសប្តាហ៍ក្រោយនេះ ភាគីទាំងបីត្រូវបានគេរំពឹងថានឹងធ្វើឱ្យកាន់តែស៊ីជម្រៅនូវកិច្ចសហប្រតិបត្តិការជាក់ស្តែងក្នុងវិស័យផ្សេងៗ ដូចជាវិស័យពាណិជ្ជកម្ម ការវិនិយោគ និងខ្សែសង្វាក់ផ្គត់ផ្គង់ ការបង្កើតឱកាសថ្មីក្នុងវិស័យថាមពលស្អាត និងថាមពលកកើតឡើងវិញ សេដ្ឋកិច្ចឌីជីថល យានយន្តអគ្គិសនី ទីផ្សារហិរញ្ញវត្ថុ និងការអភិវឌ្ឍហេដ្ឋារចនាសម្ព័ន្ធក្នុងចំណោមវិស័យផ្សេងៗទៀត។

ការជួបប្រជុំត្រីភាគីរបស់មេដឹកនាំនៃប្រទេសចំនួន១៧ ខាងមុខនេះ ក៏នឹងបង្ហាញអំពីជំហានប្រកបដោយនវានុវត្តន៍ក្នុងកិច្ចសហប្រតិបត្តិការខាងត្បូង-ខាងត្បូងអន្តរតំបន់ក្នុងចំណោមប្រទេសដែលមានសេដ្ឋកិច្ចបំពេញបន្ថែម ដើម្បីដកចេញនូវរាល់ការរំខានដល់ពាណិជ្ជកម្មដែលបណ្តាលមកពីកត្តាពន្ធគយរបស់សហរដ្ឋអាមេរិកផងដែរ៕

ដោយ៖ យា ចិន្តាខន្តី