AKP ប៉េកាំង ថ្ងៃទី២៣ ខែឧសភា ឆ្នាំ២០២៥ --

នាយករដ្ឋមន្ត្រីចិន លោក លី ឈៀង (Li Qiang) នឹងទៅបំពេញទស្សនកិច្ចផ្លូវការនៅប្រទេសឥណ្ឌូណេស៊ីចាប់ពីថ្ងៃទី២៤ ដល់ថ្ងៃទី២៦ ខែឧសភា ឆ្នាំ២០២៥ តាមការអញ្ជើញរបស់ប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីអាន់តូ (Prabowo Subianto)។ នេះបើយោងតាមការប្រកាសរបស់ក្រសួងការបរទេសចិនកាលពីថ្ងៃព្រហស្បតិ៍។
ក្រសួងបាននិយាយថា លោក លី ក៏នឹងចូលរួមកិច្ចប្រជុំអាស៊ាន - ក្រុមប្រឹក្សាសហប្រតិបត្តិការឈូងសមុទ្រ (GCC) - ចិន នៅទីក្រុងគូឡាឡាំពួ ពីថ្ងៃទី២៦ ដល់ថ្ងៃទី២៨ ខែឧសភា ឆ្នាំ២០២៥ តាមការអញ្ជើញរបស់នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) ដែលជាប្រធានប្តូរវេនរបស់អាស៊ាន។

លោកស្រី ម៉ៅ នីង (Mao Ning) អ្នកនាំពាក្យរបស់ក្រសួងការបរទេសចិនបាននិយាយនៅក្នុងសន្និសីទសារព័ត៌មានប្រចាំថ្ងៃមួយកាលពីថ្ងៃព្រហស្បតិ៍ថា ទំនាក់ទំនងចិន-ឥណ្ឌូណេស៊ីដែលមានប្រវត្តិរយៈពេល ៧៥ឆ្នាំកន្លងមកនេះ បានអភិវឌ្ឍន៍ជាបន្តបន្ទាប់ជាមួយនឹងលទ្ធផលប្រកបដោយផ្លែផ្កាដែលសម្រេចបានតាមរយៈកិច្ចសហប្រតិបត្តិការជាក់ស្តែង។ កាលពីឆ្នាំមុន ប្រមុខរដ្ឋទាំងពីរបានឈានដល់ការឯកភាពគ្នាដ៏សំខាន់ទៅលើការកសាងសហគមន៍ចិន-ឥណ្ឌូណេស៊ីជាមួយនឹងអនាគតរួមគ្នា ជាមួយនឹងឥទ្ធិពលក្នុងតំបន់ និងសកលលោក ដោយលើកកម្ពស់ទំនាក់ទំនងទ្វេភាគីដល់កម្រិតថ្មីមួយ។

ក្នុងអំឡុងពេលនៃដំណើរទស្សនកិច្ចរបស់លោក លី នៅក្នុងប្រទេសឥណ្ឌូណេស៊ីនោះ លោកនឹងចូលរួមក្នុងកិច្ចពិភាក្សា និងកិច្ចប្រជុំជាមួយមេដឹកនាំឥណ្ឌូណេស៊ី រួមទាំងលោកប្រធានាធិបតី ប្រាបូវ៉ូ ដែលនឹងមានការពិភាក្សាស៊ីជម្រៅទៅលើកិច្ចសហប្រតិបត្តិការយុទ្ធសាស្ត្រកម្រិតខ្ពស់ និងគ្រប់ជ្រុងជ្រោយ។ លោកស្រី ម៉ៅ បាននិយាយថា លោក លី ក៏នឹងចូលរួមក្នុងសកម្មភាពរបស់សហគមន៍ធុរកិច្ចក្នុងស្រុកផងដែរ។
លោកស្រីបាននិយាយថា ប្រទេសចិនសង្ឃឹមថានឹងបន្តទំនាក់ទំនងមិត្តភាពជាប្រពៃណីជាមួយឥណ្ឌូណេស៊ី ពង្រឹងសាមគ្គីភាព និងកិច្ចសហប្រតិបត្តិការ ព្រមទាំងបន្តពង្រឹងកិច្ចសហប្រតិបត្តិការក្នុងសសរស្តម្ភទាំងប្រាំ ដែលរួមមាននយោបាយ សេដ្ឋកិច្ច ការផ្លាស់ប្តូររវាងប្រជាជន និងប្រជាជន និងការផ្លាស់ប្តូរវប្បធម៌ កិច្ចការសមុទ្រ និងសន្តិសុខ។
លោកស្រីបាននិយាយបន្ថែមថា ប្រទេសទាំងពីរនឹងអនុវត្តតាមមាគ៌ាទំនើបកម្មរៀងៗខ្លួន ដែលនឹងបន្តពង្រឹងនូវអត្ថន័យនៃសហគមន៍ចិន-ឥណ្ឌូណេស៊ីជាមួយនឹងអនាគតរួមគ្នា និងរួមចំណែកកាន់តែច្រើនដល់សន្តិភាព ស្ថិរភាព ការអភិវឌ្ឍ និងវិបុលភាពក្នុងតំបន់ និងលើសពីនេះទៀត។

សម្រាប់កិច្ចប្រជុំកំពូលអាស៊ាន-GCC-ចិន ដែលនឹងប្រព្រឹត្តទៅជាលើកដំបូងនោះ លោកស្រី ម៉ៅ បាននិយាយថា ទាំងបណ្តាប្រទេសនៅអាស៊ាន និង GCC គឺជាប្រទេសដែលមានសេដ្ឋកិច្ចកំពុងរីកចម្រើននៅអាស៊ី ជាសមាជិកសំខាន់ៗនៃសកលលោកភាគខាងត្បូង និងជាដៃគូសំខាន់នៅក្នុងកិច្ចសហប្រតិបត្តិការខ្សែក្រវ៉ាត់ និងផ្លូវ។
លោកស្រីបាននិយាយថា ប្រទេសចិនគាំទ្រដល់ប្រទេសម៉ាឡេស៊ីដែលជាប្រធានប្តូរវេនរបស់អាស៊ានក្នុងការស្នើសុំរៀបចំកិច្ចប្រជុំកំពូលអាស៊ាន-GCC-ចិន។

លោកស្រីបានបន្តថា ក្រោមកាលៈទេសៈអន្តរជាតិ និងតំបន់នាពេលបច្ចុប្បន្ន វាមានសារៈសំខាន់ណាស់សម្រាប់ភាគីទាំងបីក្នុងការពិភាក្សារួមគ្នាអំពីផែនការសម្រាប់សាមគ្គីភាព កិច្ចសហប្រតិបត្តិការ ការអភិវឌ្ឍ និងវិបុលភាព ព្រមទាំងជំរុញកិច្ចសហប្រតិបត្តិការដែលមានផលប្រយោជន៍ទៅវិញទៅមកនៅទូទាំងតំបន់។
លោកស្រី ម៉ៅ បានបញ្ជាក់ថា ប្រទេសចិនទន្ទឹងរង់ចាំនូវការពង្រីកកិច្ចសហប្រតិបត្តិការជាក់ស្តែងជាមួយបណ្តាប្រទេសនៅអាស៊ាន និង GCC ក្នុងវិស័យផ្សេងៗ ដោយទាញយកអត្ថប្រយោជន៍បន្ថែម និងការសម្រេចបាននូវលទ្ធផលឈ្នះ-ឈ្នះ ដោយរួមគ្នាការពារប្រព័ន្ធពាណិជ្ជកម្មពហុភាគី និងការពារផលប្រយោជន៍រួមនៃសកលលោកភាគខាងត្បូង៕

ដោយ៖ យា ចិន្តាខន្តី