AKP ភ្នំពេញ ថ្ងៃទី២៣ ខែឧសភា ឆ្នាំ២០២៥ -- ឧបនាយករដ្ឋមន្ត្រីចិនលោក ឌីង សៀស៊ាំង (Ding Xuexiang) បានជួបជាមួយរដ្ឋមន្ត្រីការបរទេសហូឡង់ លោក កាស្បា វេលខេម (Caspar Veldkamp) នៅទីក្រុងប៉េកាំង កាលពីថ្ងៃព្រហស្បតិ៍។

លោក ឌីង ជាសមាជិកគណៈកម្មាធិការអចិន្ត្រៃយ៍នៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បាននិយាយថាក្នុងនាមជាប្រទេសសេដ្ឋកិច្ចសំខាន់ទាំងពីរ ប្រទេសចិន និងហូឡង់រីករាយនឹងភាពជាដៃគូដោយបើកចំហ និងជាក់ស្តែង។

លោក ឌីង បាននិយាយថា ប្រទេសចិនមានឆន្ទៈក្នុងការបន្តសន្ទុះនៃការផ្លាស់ប្តូរមិត្តភាពជាមួយប្រទេសហូឡង់ សម្របសម្រួលរាល់កង្វល់ស្របច្បាប់របស់គ្នាទៅវិញទៅមក ពង្រឹងកិច្ចសហប្រតិបត្តិការជាក់ស្តែងលើវិស័យសំខាន់ៗ និងរួមគ្នាការពារប្រព័ន្ធពាណិជ្ជកម្មពហុភាគី និងសណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិ ព្រមទាំងរក្សាសន្តិសុខ និងស្ថិរភាពនៃខ្សែសង្វាក់ផ្គត់ផ្គង់ និងឧស្សាហកម្មសកល។

លោកបានបន្ថែមថា លោកសង្ឃឹមថា ប្រទេសហូឡង់នឹងបន្តដើរតួនាទីស្ថាបនា និងរួមចំណែកកាន់តែច្រើនដល់ការអភិវឌ្ឍប្រកបដោយសុខភាពល្អ និងស្ថិរភាពនៃទំនាក់ទំនងចិន-សហភាពអឺរ៉ុប។

លោក វេលខេម បាននិយាយថា ស្ថានភាពអន្តរជាតិបច្ចុប្បន្នគឺពោរពេញទៅដោយបញ្ហាប្រឈម ហើយវាមានសារៈសំខាន់ជាពិសេសសម្រាប់ប្រទេសហូឡង់ និងប្រទេសចិនក្នុងការបង្កើនកិច្ចសន្ទនា និងកិច្ចសហប្រតិបត្តិការ។

លោកបានបន្ថែមថា ប្រទេសហូឡង់ចាត់ទុកប្រទេសចិនជាដៃគូដ៏សំខាន់ និងមានឆន្ទៈក្នុងការពង្រឹងការផ្លាស់ប្តូរ និងកិច្ចសហប្រតិបត្តិការជាមួយប្រទេសនេះ ហើយធ្វើការរួមគ្នាដើម្បីដោះស្រាយបញ្ហាប្រឈម និងការពារពាណិជ្ជកម្មសេរី៕

ដោយ៖ មូល មិនា (ប្រភព៖ ភីបផលដេលី)