AKP ភ្នំពេញ ថ្ងៃទី២២ ខែឧសភា ឆ្នាំ២០២៥ -- រដ្ឋមន្ត្រីការបរទេសចិនលោក វ៉ាង យី (Wang Yi) ឧបនាយករដ្ឋមន្ត្រីប៉ាគីស្ថាន និងជារដ្ឋមន្ត្រីការបរទេស លោក ម៉ូហាមម៉ាដ អ៊ីសាក់ ដារ (Mohammad Ishaq Dar) និងរដ្ឋមន្ត្រីការបរទេសស្តីទីអាហ្វហ្គានីស្ថាន លោក អាមៀ ខាន់ មុតតាគី (Amir Khan Muttaqi) បានជួបប្រជុំក្រៅផ្លូវការនៅទីក្រុងប៉េកាំងកាលពីថ្ងៃពុធ។

លោក វ៉ាង ជា​សមាជិក​ការិយាល័យ​នយោបាយ​នៃ​គណៈកម្មាធិការ​មជ្ឈិម​បក្ស​កុម្មុយនិស្ត​ចិន​បាន​ធ្វើ​ជា​ប្រធាន​កិច្ចប្រជុំ​នេះ។ លោកបានលើកឡើងយ៉ាងច្រើនអំពីលទ្ធផលនៃកិច្ចសន្ទនាត្រីភាគីចិន-អាហ្វហ្គានីស្ថាន-ប៉ាគីស្ថាន ហើយបានចូលរួមក្នុងការពិភាក្សាស៊ីជម្រៅលើការពង្រីកសក្តានុពលនៃយន្តការត្រីភាគី និងការជំរុញកិច្ចសហប្រតិបត្តិការដែលមានផលប្រយោជន៍ទៅវិញទៅមក។

សរុបលទ្ធផលនៃកិច្ចប្រជុំនេះ លោក វ៉ាង បាននិយាយថា រដ្ឋមន្ត្រីការបរទេសបានឯកភាពថា ប្រទេសទាំងបីគួរតែបង្កើនការជឿទុកចិត្តគ្នាទៅវិញទៅមកផ្នែកនយោបាយ និងលើកកម្ពស់ទំនាក់ទំនងមិត្តភាពក្នុងចំណោមអ្នកជិតខាង។

លោក វ៉ាង បាននិយាយថា ប្រទេសចិនគាំទ្រប្រទេសអាហ្វហ្គានីស្ថាននិងប៉ាគីស្ថានក្នុងការស្វែងរកផ្លូវអភិវឌ្ឍន៍ដែលសមស្របនឹងលក្ខខណ្ឌជាតិនិងការពារអធិបតេយ្យភាព សន្តិសុខ និងសេចក្តីថ្លៃថ្នូររបស់ពួកគេ។

លោក វ៉ាង បាន​និយាយ​ថា រដ្ឋមន្ត្រី​បាន​យល់​ព្រម​លើ​ការ​រៀបចំ​កិច្ច​សន្ទនា​ថ្នាក់​រដ្ឋមន្ត្រី​ការ​បរទេស​ត្រីភាគី​ចិន-អាហ្វហ្គានីស្ថាន-ប៉ាគីស្ថាន​លើក​ទី​៦ ​​ក្នុង​ទីក្រុង​កាប៊ុល​។

យោងតាមលោក វ៉ាង បានឱ្យដឹងថា ប្រទេសអាហ្វហ្គានីស្ថាន និងប៉ាគីស្ថានបានបង្ហាញពីឆន្ទៈក្នុងការលើកកម្ពស់ទំនាក់ទំនងការទូតទ្វេភាគីដោយភាគីទាំងពីរបានយល់ព្រមជាគោលការណ៍ក្នុងការផ្លាស់ប្តូរឯកអគ្គរដ្ឋទូតឱ្យបានឆាប់រហ័ស។

ប្រទេសទាំងបីបានព្រមព្រៀងគ្នាលើការប្រឆាំងភេរវកម្មក្នុងគ្រប់ទម្រង់ ការអនុវត្តច្បាប់ និងកិច្ចសហប្រតិបត្តិការសន្តិសុខ ការប្រយុទ្ធប្រឆាំងនឹងកងកម្លាំងភេរវករ និងបន្តការប្រុងប្រយ័ត្នចំពោះការជ្រៀតជ្រែកពីខាងក្រៅក្នុងកិច្ចការផ្ទៃក្នុងរបស់ប្រទេសក្នុងតំបន់៕

ដោយ៖ មូល មិនា (ប្រភព៖ ភីបផលដេលី)