KP ប៉េកាំង ថ្ងៃទី២២ ខែឧសភា ឆ្នាំ២០២៥ -- គំនិតផ្តួចផ្តើមគោលនយោបាយការបរទេសសំខាន់ៗជាច្រើនរបស់ប្រទេសចិន ដូចជាគំនិតផ្តួចផ្តើមខ្សែក្រវ៉ាត់ និងផ្លូវ គំនិតផ្តួចផ្តើមអភិវឌ្ឍន៍សកល គំនិតផ្តួចផ្តើមសន្តិសុខសកល និងគំនិតផ្តួចផ្តើមអរិយធម៌សកល ត្រូវបានដាក់ឱ្យដំណើរការជាលើកដំបូង និងបានផ្សព្វផ្សាយនៅក្នុងបណ្តាប្រទេសជិតខាងដោយរហូតមកដល់ពេលនេះ យើងបានឈានដល់ការឯកភាពគ្នាទៅលើការកសាងសហគមន៍មួយដែលមានអនាគតរួមគ្នាជាមួយប្រទេសជិតខាងចំនួន១៧។ នេះបើយោងតាមការលើកឡើងរបស់លោក លាំង ជានជុន (Liang Jianjun) អគ្គនាយករងនៃនាយកដ្ឋានកិច្ចការអាស៊ីនៃក្រសួងការបរទេសចិន ទទួលបន្ទុកចម្បងសម្រាប់ទំនាក់ទំនងទ្វេភាគីជាមួយប្រទេសនៅអាស៊ីអាគ្នេយ៍ចំនួន១១ និងសម្រាប់យន្តការសហប្រតិបត្តិការឡានឆាង-មេគង្គ​ ដែលបានចូលរួមសន្និសីទសារព័ត៌មានមួយកាលពីថ្ងៃទី២០ ខែឧសភា ឆ្នាំ២០២៥.

សម្រាប់កិច្ចសហប្រតិបត្តិការមេគង្គ-ឡានឆាង ដែលជាសហគមន៍ពហុភាគីនៃអនាគតរួមគ្នាជាមួយប្រទេសមេគង្គទាំង៥ និងភាពជាដៃគូអនាគតរួមគ្នាទ្វេភាគីជាមួយប្រទេសនីមួយៗដែលគ្របដណ្តប់ពេញលេញនៃក្របខ័ណ្ឌទ្វេភាគី និងពហុភាគី។ ដូចគ្នានេះដែរ យើងមានសហគមន៍អនាគតរួមគ្នាទ្វេភាគីជាមួយបណ្តាប្រទេសនៅតំបន់អាស៊ីកណ្តាលទាំង៥ គឺ «សហគមន៍ចិន-អាស៊ីកណ្តាលជាមួយនឹងអនាគតរួមគ្នា»។

លោកបាននិយាយបន្ថែមថា «ចិន​ជា​ដៃគូ​ពាណិជ្ជកម្ម​ធំជាងគេ​ក្នុងចំណោម​ប្រទេស​ជិតខាង​ចំនួន១៨។ យើងបានចុះហត្ថលេខាលើអនុស្សរណៈស្តីពីកិច្ចសហប្រតិបត្តិការខ្សែក្រវ៉ាត់ និងផ្លូវ ជាមួយបណ្តាប្រទេសជិតខាងចំនួន២៥។ សមាជិកអាស៊ានទាំងអស់បានចូលរួមជាមួយក្រុមប្រទេសជាមិត្ត GDI»។

លោកបានបញ្ជាក់ថា ដំណើរ​ទស្សន​កិច្ច​របស់​ប្រធានាធិបតីចិន លោក ស៊ី ជីនពីង (Xi Jinping) បន្ទាប់ពី​សន្និសីទ​ការងារប្រទេសជិតខាង បាន​គូសបញ្ជាក់​ពី​សារៈសំខាន់​ជា​យុទ្ធសាស្ត្រ​ដែល​ចិន​បាន​ភ្ជាប់​ជាមួយប្រទេសជិតខាង​របស់ខ្លួន។ ទំនាក់ទំនងរបស់យើងជាមួយប្រទេសជិតខាងកាន់តែជិតស្និទ្ធឡើង ដោយបានកសាងឡើងនូវកិច្ចខិតខំប្រឹងប្រែងទៅវិញទៅមក ដែលវា​ជា​ដំណើរ​ពីរ​ផ្លូវ​ដោយ​បង្កប់​នូវ​ជោគវាសនា​រួម​គ្នា ផលប្រយោជន៍​ជាប់​ទាក់ទង​គ្នា និង​សាមគ្គីភាព​ទៅវិញទៅមក៕

ដោយ៖ យា ចិន្តាខន្តី