AKP ប៉េកាំង ថ្ងៃទី២២ ខែឧសភា ឆ្នាំ២០២៥ -- លោក លាំង ជានជុន (Liang Jianjun) អគ្គនាយករងនៃនាយកដ្ឋានកិច្ចការអាស៊ីនៃក្រសួងការបរទេសចិន ទទួលបន្ទុកចម្បងសម្រាប់ទំនាក់ទំនងទ្វេភាគីជាមួយប្រទេសនៅអាស៊ីអាគ្នេយ៍ចំនួន១១ និងសម្រាប់យន្តការសហប្រតិបត្តិការឡានឆាង-មេគង្គ​ ដែលបានចូលរួមសន្និសីទសារព័ត៌មានមួយកាលពីថ្ងៃទី២០ ខែឧសភា ឆ្នាំ២០២៥ ដែលមានអ្នកសារព័ត៌មានអន្តរជាតិចូលរួមប្រមាណជាង ៣០នាក់មកពី ២៣ប្រទេស បានលើកឡើងថា ការទូតសម្រាប់ប្រទេសជិតខាង គឺជាអាទិភាពកំពូលរបស់ប្រទេសចិន។

លោកបានបន្ថែមថា នាយកដ្ឋានកិច្ចការអាស៊ី គឺជានាយកដ្ឋានដំបូងបំផុតមួយដែលត្រូវបានបង្កើតឡើងនៅក្នុងក្រសួងការបរទេសចិនក្នុងពេលដំណាល់គ្នាតែមួយនៃការបង្កើតក្រសួងការបរទេសខ្លួនឯងនេះដែរ  ដែលទទួលខុសត្រូវចំពោះបណ្តាប្រទេសជិតខាងចំនួន២៣ ដែលបង្កើតបានជាផ្នែកនៃគោលគំនិតដ៏ទូលំទូលាយនៃ «តំបន់ជុំវិញដ៏ធំ» ឬ «Big Neighborhood»។ ប្រទេសចិន គឺជាប្រទេសដ៏ធំដែលមានព្រំប្រទល់ដីវែងជាងគេដែលលាតសន្ធឹងជាង ២២.០០០គីឡូម៉ែត្រជាមួយប្រទេសជិតខាងចំនួន១៤។

លោកបាននិយាយបន្ថែមថា នៅ​ពេល​ដែល​យើង​និយាយ​អំពីប្រទេសជិតខាង​ដ៏​ទូលំទូលាយនោះ គឺយើង​សំដៅ​ទៅ​លើ​ប្រទេស​ចំនួន២៩ ដោយនៅក្នុងនោះរួមមានតំបន់អាស៊ីឦសាន (៤ប្រទេស) ជប៉ុន កូរ៉េខាងត្បូង កូរ៉េខាងជើង ម៉ុងហ្គោលី តំបន់អាស៊ីអាគ្នេយ៍ (១១ប្រទេស) សមាជិកអាស៊ានទាំង១០ បូកនឹងទីម័រឡេស្ត តំបន់អាស៊ីខាងត្បូង (៨ប្រទេស) ប៉ាគីស្ថាន ឥណ្ឌា បង់ក្លាដែស ស្រីលង្កា នេប៉ាល់ ប៊ូតង់ ម៉ាល់ឌីវ អាហ្វហ្គានីស្ថាន និងតំបន់អាស៊ីកណ្តាល (៥ប្រទេស) តូមិននីស្ថាន អ៊ូសបេគីស្ថាន តាជីគីស្ថាន កៀហ្ស៊ីស៊ីស្ថាន និងកាហ្សាក់ស្ថាន

បូកនឹងរុស្ស៊ី។

មាន​ពាក្យ​មួយ​ឃ្លា​ក្នុង​ប្រទេស​ចិនបាន​ពោល​ថា «​សាច់ញាតិ​ឆ្ងាយ​មិន​ល្អ​ដូច​អ្នកជិតខាង​ទេ​»​។ អ្នកជិតខាងល្អ មានន័យថាផ្ទះដែលមានសន្តិភាព និងសុវត្ថិភាព។ នោះហើយជាមូលហេតុដែលគណៈកម្មាធិការមជ្ឈិមបានកោះប្រជុំសន្និសិទការងារការទូតរបស់ប្រទេសជិតខាងជាលើកដំបូង ហើយបានកំណត់យ៉ាងច្បាស់នូវទំនាក់ទំនងប្រទេសជិតខាងជាមូលដ្ឋានគ្រឹះសម្រាប់ការអភិវឌ្ឍ និងវិបុលភាពរបស់ប្រទេសចិន អាទិភាពក្នុងការការពារសន្តិសុខជាតិ គន្លឹះក្នុងការធ្វើផែនការការទូតរួម និងជាផ្នែកសំខាន់នៃការកសាងសហគមន៍ដែលមានអនាគតរួមគ្នាសម្រាប់មនុស្សជាតិ។

ដោយ៖ យា ចិន្តាខន្តី