AKP ភ្នំពេញ ថ្ងៃទី២១ ខែឧសភា ឆ្នាំ២០២៥ -- យោងតាមអ្នកនាំពាក្យក្រសួងការបរទេសរុស្ស៊ីលោកស្រី ម៉ារៀ ហ្សាខារ៉ូវ៉ា (Maria Zakharova)បាននិយាយកាលពីថ្ងៃអង្គារថា ទីក្រុងមូស្គូត្រៀមខ្លួនជាស្រេចដើម្បីបន្តទំនាក់ទំនងជាមួយទីក្រុងគៀវ ហើយនឹងស្នើឱ្យធ្វើការលើអនុស្សរណៈអំពីកិច្ចព្រមព្រៀងសន្តិភាពដ៏មានសក្តានុពលមួយ។

លោកស្រី ហ្សាខារ៉ូវ៉ា បាននិយាយថា ប្រទេសរុស្ស៊ីបានអះអាងជាថ្មីម្តងទៀតនូវបំណងប្រាថ្នារបស់ខ្លួនក្នុងការសម្រេចបាននូវដំណោះស្រាយចុងក្រោយ និងយុត្តិធម៌នៃវិបត្តិនេះ ដោយលោកស្រីបានបន្ថែមថាវឌ្ឍនភាពឆ្ពោះទៅរកដំណោះស្រាយជម្លោះមិនអាចសម្រេចបានដោយមិនចាំបាច់ដោះស្រាយមូលហេតុឫសគល់នោះទេ។

លោកស្រីបាននិយាយថា យើងចាំបាច់ត្រូវយល់ព្រមលើទិដ្ឋភាពជាច្រើន រួមទាំងគោលការណ៍សំខាន់ៗនៃដំណោះស្រាយ ពេលវេលានៃកិច្ចព្រមព្រៀងសន្តិភាពដែលមានសក្តានុពល និងព័ត៌មានលម្អិតទាក់ទងនឹងបទឈប់បាញ់ដែលអាចកើតមាន ប្រសិនបើកិច្ចព្រមព្រៀងពាក់ព័ន្ធត្រូវបានឈានដល់។

អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ (Dmitry Peskov)បាននិយាយនៅមុននេះបន្តិចថា ទីក្រុងមូស្គូ និងទីក្រុងគៀវត្រូវតែរៀបចំសម្រាប់ទំនាក់ទំនងស្តីពីការបង្កើតអនុស្សរណៈរួមទាក់ទងនឹងសន្ធិសញ្ញាសន្តិភាព និងបទឈប់បាញ់។ លោកបានស្វាគមន៍ចំពោះទំនាក់ទំនងជាថ្មីរវាងរុស្ស៊ី និងអ៊ុយក្រែន ដោយនិយាយថា គ្មានថ្ងៃកំណត់សម្រាប់ការបញ្ចប់អនុស្សរណៈនេះទេ។

កាលពីថ្ងៃចន្ទ ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) និងប្រធានាធិបតីអាមេរិក លោក ដូណាល់ ត្រាំ (Donald Trump)បានសន្ទនាតាមទូរស័ព្ទស្តីពីវិបត្តិអ៊ុយក្រែន និងកិច្ចចរចារុស្ស៊ី-អ៊ុយក្រែន នាពេលថ្មីៗនេះនៅទីក្រុងអ៊ីស្តង់ប៊ុល៕

ដោយ៖ មូល មិនា (ប្រភព៖ ស៊ីនហួ)