AKP ព្រះវិហារ ថ្ងៃទី១៨ ខែឧសភា ឆ្នាំ២០២៥-

ឯកឧត្តម គីម រិទ្ធី អភិបាលខេត្តព្រះវិហារបានលើកទឹកចិត្ត ឱ្យបងប្អូនក្នុងមាគមសម្ព័ន្ធសហគមន៍កសិករកម្ពុជា ត្រូវចូលរួមថែរក្សា ការពារតំបន់សហគមន៍ ដែល បានអភិរក្ស ដើម្បីយើងទាំងអស់គ្នា ទុកជាទីតាំង បង្កើនមុខរបរ ដោយទាញយកផលប្រយោជន៍ពី ផលអនុផលព្រៃឈើក្នុងសហគមន៍។ 

ការលើកឡើងបែបនេះ ក្នុងឱកាសទទួលជួបសម្តែងការគួរសមជាមួយសមាគមសម្ព័ន្ធសហគមន៍កសិករកម្ពុជា នារសៀលថ្ងៃទី១៧ ខែឧសភា ឆ្នាំ២០២៥ នៅសាលប្រជុំប្រាសាទព្រះវិហារ អគាររដ្ឋបាលសាលាខេត្តព្រះវិហារ ដែលមានការចូលរួមពីសំណាក់ លោក លោកស្រី ប្រធាន/អនុប្រធាន មន្ទីរអង្គភាពពាក់ព័ន្ធជុំវិញខេត្ត លោក នាយករដ្ឋបាលសាលាខេត្ត និងបងប្អូនប្រជាកសិករមកពី ២៦ សហគមន៍ក្នុងខេត្តព្រះវិហារ។

ក្នុងឱកាសនោះឯកឧត្តម គីម រិទ្ធី បានថ្លែងថា យើងគ្រប់គ្នារស់នៅក្រោមដំបូលរដ្ឋធម្មនុញ្ញតែមួយ គឺគ្មានអ្នកណា អាចប្រព្រឹត្តនិងចៀសផុតពីច្បាប់បានឡើយ។ អាស្រ័យហេតុនេះសូមឱ្យបងប្អូនកុំប្រព្រឹត្តអ្វីដែលល្មើសនិងច្បាប់ ដែលនាំឱ្យមានទោសដល់ខ្លួន។  ឯកឧត្តមអភិបាលខេត្តក៏បានលើកឡើងពីបទល្មើស ធនធានធម្មជាតិ បរបាញ់សត្វព្រៃ និងការទន្ទ្រានយកដីព្រៃរបស់រដ្ឋ ពីសំណាក់ជនខិលខូចមួយចំនួន។

ជាមួយគ្នានេះដែរ ឯកឧត្តមក៏បានលើកទឹកចិត្ត ឱ្យបងប្អូនក្នុងសហគមន៍កសិករកម្ពុជា ត្រូវចូលរួមថែរក្សា ការពារតំបន់សហគមន៍ ដែល បានអភិរក្ស ដើម្បីយើងទាំងអស់គ្នា ទុកជាទីតាំង បង្កើនមុខរបរ ដោយទាញយកផលប្រយោជន៍ពី ផលអនុផលព្រៃឈើដើម្បីបានប្រាក់ចំណូលមកផ្គត់ផ្គង់គ្រួសារ តាមរយៈ ការរកផ្សិត ជៀជ័រ រកឃ្មុំ និង ចិញ្ចឹមសត្វ ព្រមទាំងមុខរបរផ្សេងៗទៀតដែលច្បាប់មិនបានហាមឃាត់។

ឯកឧត្តមអភិបាលខេត្តក៏បានថ្លែងអំណរគុណ ដល់ថ្នាក់ដឹកនាំនៃសម្ព័ន្ធសហគមន៍កសិករកម្ពុជាដែលបានបង្កើតសហគមន៍ និងដឹកនាំគ្រប់គ្រង ចងក្រងបណ្ដាញ កសិកររបស់យើងរហូតមក ដើម្បីលើកស្ទួយនូវវិស័យកសិកម្ម។  ក្នុងឱកាសនោះដែរ ឯកឧត្តម គីម រិទ្ធី បានលើកឡើងទៀតថា ការជួបជុំគ្នាក្នុង ពេលនេះ គឺដើម្បីបង្កើន កិច្ចសហប្រតិបត្តិការឱ្យបានល្អ និងជំរុញឱ្យសកម្មភាពរបស់យើងកាន់តែមានភាពសកម្មបន្ថែមទៀត តែឯកឧត្តមសុំឱ្យសហគមន៍ មានការពិគ្រោះយោបល់ជាមួយជំនាញ និងសហការជាមួយអាជ្ញាធរ ដើម្បីធ្វើអ្វីៗឱ្យស្របទៅតាមច្បាប់៕

ដោយ៖ រិទ្ធី ប្រភព៖ មន្ទីរព័ត៌មានខេត្តព្រះវិហារ