AKPកំពង់ធំថ្ងៃទី១៨ ខែឧសភា ឆ្នាំ ២០២៥៖ 

ប្រជាកសិកររស់នៅឃុំច្រនាងស្រុកតាំងគោកខេត្តកំពង់ធំចំនួន១៣គ្រួសារក្រៅពីការប្រកបរបរធ្វើស្រែចំការបាននាំគ្នាងាកមកចិញ្ចឹមចង្រិតនិងកណ្ដូបដើម្បីរកប្រាក់ចំណូលបន្ថែមជួយទ្រទ្រង់ដល់ជីវភាពគ្រួសារបានមួយកំរិតថែមទៀតដោយពួកគាត់អាចរកប្រាក់ចំណូលបានយ៉ាងតិចពីចន្លោះ១លានរៀលទៅ ១លាន២សែនរៀលក្នុង១ខែ។

លោក ហាក់ ម៉ុងហួត អភិបាលស្រុកតាំងគោកកាលពីថ្ងៃទី១៧ខែឧសភាឆ្នាំ២០២៥បានដឹកនាំក្រុមការងារចុះពិនិត្យមើលសកម្មភាពចិញ្ចឹមចង្រិត កណ្ដូបរបស់ប្រជាកសិករនៅឃុំច្រនាងស្រុកតាំងគោកខេត្តកំពង់ធំ។លោកស្រី ឆោម ស្រីរ័ត្ន ប្រជាកសិករនៅភូមិចាន់ឃុំច្រនាងបានរៀបរាប់ប្រាប់លោកអភិបាលស្រុកទាំងទឹកមុខរីករាយថាការចិញ្ចឹមចង្រិតនិងកណ្ដូបនេះមិនមានភាពលំបាកនោះទេឱ្យតែយើងផ្តល់ចំណីឱ្យវាបានគ្រប់គ្រាន់ នោះវានឹងធំធាត់លឿនហើយក៏ឆាប់បានទទួលផលផលដែរ។

លោកស្រីបានរៀបរាប់បន្ថែមថាការចិញ្ចឹមចង្រឹតនិងកណ្តូបនៅតាមផ្ទះលោកស្រីនេះមានតិចតួចតួចមិនច្រើនដូចនៅកសិដ្ឋានគេនោះទេតែយ៉ាងណាចង្រឹតនិងកណ្តូបលោកស្រីចឹញ្ចឹមតាមបែបធម្មជាតិជាលក្ខណគ្រួសារ។ចង្រឹត១គីឡូក្រាម លោកស្រីអាចលក់ឱ្យឈ្មូញបានក្នុងតម្លៃចន្លោះពី ១ម៉ឺនដល់១ម៉ឺន២ពាន់រៀល ហើយកណ្តូប១គីឡូលក់បានចន្លោះ៣ម៉ឺនទៅ៣ម៉ឺន៥ពាន់រៀលហើយជាមធ្យមលោកស្រីអាចរកចំណូលយ៉ាងតិចបានពី១លានរៀល ទៅជាង១លាន២សែនរៀល។

ក្នុងឱកាសនោះដែរ លោក ហាក់ ម៉ុងហួត ក៏បានលើកទឹកចិត្តដល់ប្រជាកសិករទាំងអស់ឱ្យបន្តខិតខំប្រឹងប្រែងពង្រីកការចិញ្ចឹមចង្រិតនិងកណ្តូបនេះបន្ថែមទៀតដើម្បីតម្រូវការទីផ្សារនិងបង្កើនជីវភាពឱ្យកាន់តែល្អ ប្រសើរជាងមុនបន្ថែមទៀត។លោក ហាក់ ម៉ុងហួតក៏បានណែនាំដល់អាជ្ញាធរឃុំចុះសួរសុខទុក្ខនិងតាមដានការចឹញ្ចឹមចង្រិតនិងកណ្តូបរបស់ប្រជាកសិករដើម្បីបានដំណើរការទៅដោយរលូនប្រសិនបើមានបញ្ហាអ្វីមួយកើតឡើងត្រូវផ្ដល់នូវដំណោះស្រាយជូនដល់ពួកគាត់ឱ្យទាន់ពេលវេលាផងដែរ៕

ដោយ៖ ស៊ុម វណ្ណា