AKPកំពង់ធំថ្ងៃទី១៧ខែ ឧសភាឆ្នាំ២០២៥-- 

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈនិងជាប្រធានសហភាពសហព័ន្ធយុវជនកម្ពុជាបានអញ្ជើញជាអធិបតីក្នុងយុទ្ធនាការស្ម័គ្រចិត្តបរិច្ចាគឈាមក្រោមប្រធានបទ"ផ្តល់ឈាម ផ្តល់ជីវិត"និងសម្ពោធអគារសិក្សានៅក្រុមហ៊ុនចម្ការកៅស៊ូទេពី អាក្រូវិនិយោគស្ថិតនៅភូមិអូរត្នោតឃុំងនស្រុកសណ្តាន់ខេត្តកំពង់ធំនិងដោយមានការអញ្ជើញចូលរួមពីសំណាក់ឯកឧត្តម លោកជំទាវ អ្នកឧកញ៉ា លោក លោកស្រីភ្ញៀវជាតិ អន្តរជាតិបងប្អូនប្រជាពលរដ្ឋក្នុងមូលដ្ឋាននិងសិស្សានុសិស្សសរុបប្រមាណជាង៥០០នាក់។

អ្នកឧកញ៉ា លី សុភ័ក្ត ប្រធានក្រុមប្រឹក្សាភិបាលក្រុមហ៊ុន ទេពីអាក្រូវិនិយោគបានសម្តែងនូវគារវៈកិច្ចនិងថ្លែងអំណរគុណយ៉ាងជ្រាលជ្រៅចំពោះវត្តមានដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈនិងជាប្រធានសហភាពសហព័ន្ធយុវជនកម្ពុជាដែលបានចំណាយពេលវេលាអញ្ជើញជាអធិបតីក្នុងយុទ្ធនាការបរិច្ចាគឈាមនិងសម្ពាធអគារសិក្សានាឱកាសនេះ។

ជាមួយគ្នានេះអ្នកឧកញ៉ា បានធ្វើរបាយការណ៍អំពីសមិទ្ធផលអគារសិក្សារបស់ក្រុមហ៊ុន ទេពី អាក្រូ វិនិយោគនិងបានធ្វើការប្តេជ្ញាចិត្តក្នុងការរៀបចំយុទ្ធនាការបរិច្ចាគឈាមប្រចាំឆ្នាំដើម្បីលើកកម្ពស់សុខុមាលភាពបុគ្កលិកគាំទ្រជាមួយប្រព័ន្ធថែទាំសុខភាពជាតិការពង្រឹងការអប់រំការអភិវឌ្ឍបរិស្ថាននិងការវិនិយោគលើហេដ្ឋារចនាសម្ព័ន្ធជាពិសេសកសាងសហគមន៍ប្រកបដោយភាពរស់រវើកសម្រាប់យុវជនជំនាន់ក្រោយ។

ឯកឧត្តមឧបនាយករដ្ឋមន្រ្តីហ៊ុន ម៉ានី បានសម្តែងនូវសេចក្តីសោមស្សរីករាយនិងស្វាគមន៍យ៉ាងកក់ក្តៅចំពោះវត្តមានអ្នកចូលរួមទាំងអស់និងបានកោសរសើរនិងវាយតម្លៃខ្ពស់ចំពោះក្រុមហ៊ុន ទេពី អាក្រូ វិនិយោគនិងមជ្ឈមណ្ឌលជាតិផ្តល់ឈាមក្នុងការរៀបចំផ្តួចផ្តើមយុទ្ធនាការស្ម័គ្រចិត្តបរិច្ចាគឈាមក្រោមប្រធានបទ"ផ្តល់ឈាមផ្តល់ជីវិត"នាឱកាសនេះ។ទន្ទឹមនឹងនេះ ឯកឧត្តម បានចែករំលែកអំពីសកម្មភាពការងារស្ម័គ្រចិត្តលើកដំបូងផ្ទាល់របស់ឯកឧត្តមគឺការបរិច្ចាគឈាមនិងបានលើកទឹកចិត្តឱ្យបងប្អូនប្រជាពលរដ្ឋចូលរួមក្នុងសកម្មភាពដ៏មានអត្ថន័យមួយនេះដើម្បីជួយសង្គ្រោះអាយុជីវិតរបស់បងប្អូនប្រជាពលរដ្ឋខ្មែរយើង៕

ដោយ៖ ស៊ុម វណ្ណា