AKP ព្រះសីហនុ ថ្ងៃទី១៣ ខែឧសភា ឆ្នាំ២០២៥ -- លោកឧត្តមសេនីយ៍ត្រី នូវ សំអុល មេបញ្ជាការតំបន់ប្រតិបត្តិការសឹករងព្រះសីហនុ នាព្រឹកថ្ងៃទី១៣ ខែឧសភា ឆ្នាំ២០២៥ បានដឹកនាំកម្លាំងតំបន់ប្រតិបត្តិការសឹករងព្រះសីហនុ ចូលរួមដាំដុះកូនឈើក្នុងតំបន់ប្រតិបត្តិការសឹករងព្រះសីហនុ ហើយកូនឈើចំនួន៧ប្រភេទ រួមដូចជា៖ គគីរ ក្ងោក ព្រីង ទៀប ខ្នុរ ស្អំ និងស្វាយកែវចិន ចំនួន៥១០ដើម ដែលជាអំណោយរបស់ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដើម្បីបែងចែកទៅបណ្តាអង្គភាពចំណុះតំបន់ប្រតិបត្តិការសឹករងព្រះសីហនុ ដើម្បីយកទៅធ្វើការដាំដុះនៅតាមអង្គភាពរៀងៗខ្លួន ដើម្បីបង្កើនភាពស្រស់ស្អាត និងភាពបៃតង។

លោកឧត្ដមសេនីយ៍ត្រី នូវ សំអុល បានបញ្ជាក់ឱ្យដឹងថា សម្រាប់តំបន់ប្រតិបត្តិការសឹករងព្រះសីហនុ ធ្វើការដាំកូនឈើប្រភេទ គគីរ ក្ងោក ខ្នុរ និងស្អំ សរុបចំនួន១៥០ដើម អមសងខាងផ្លូវក្នុងទីបញ្ជាការ និងទីធ្លាដីដែលនៅទំនេរ ដើម្បីលើកកម្ពស់សោភ័ណភាពបរិស្ថាននៅក្នុងទីបញ្ជាការតំបន់ប្រតិបត្តិការសឹករងព្រះសីហនុ ដោយឡែកប្រភេទស្អំ ក៏ជាបន្លែសម្រាប់ផ្គត់ផ្គង់ក្នុងអង្គភាពបានថែមទៀតផងដែរ និងដើមឈើផ្សេងទៀតសម្រាប់ហូបផ្លែ។

លោកឧត្ដមសេនីយ៍ត្រី នូវ សំអុល ជំនួសមុខឱ្យនាយទាហាន នាយទាហានរង និងពលទាហានតំបន់ប្រតិបត្តិការសឹករងព្រះសីហនុ បានថ្លែងអំណរគុណឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលតែងបានយកចិត្តទុកដាក់គិតគូរអំពីសុខទុក្ខ សុខុមាលភាព និងជីវភាពរស់នៅរបស់កងកម្លាំងប្រដាប់អាវុធ ជាពិសេសតំបន់ប្រតិបត្តិការសឹករងព្រះសីហនុ និយាយដោយឡែក ឯកឧត្តមតែងតែបានជួយឧបត្ថម្ភនូវអំណោយជាពូជដំណាំ ពូជសត្វចិញ្ចឹម ជីកស្រះចិញ្ចឹមត្រី និងគ្រឿងឧបភោគបរិភោគ ព្រមទាំងសម្ភារប្រើប្រាស់ផ្សេងៗជាច្រើនផ្សេងទៀតបម្រើឱ្យតំបន់ប្រតិបត្តិការសឹករងព្រះសីហនុ ធ្វើឱ្យតំបន់ប្រតិបត្តិការសឹករងមានការអភិវឌ្ឍជាបន្តបន្ទាប់នូវហេដ្ឋារចនាសម្ព័ន្ធក្នុងអង្គភាពកាន់តែមានភាពបៃតង៕

ដោយ ងូ សុមុនី