AKP ភ្នំពេញ ថ្ងៃទី១២ ខែឧសភា ឆ្នាំ២០២៥--ថ្មីៗនេះ លោក ឡេង តុង អ្នករត់ចម្ងាយឆ្ងាយមួយរូបនៅកម្ពុជា បានបង្ហាញខ្លួននៅក្នុងព្រឹត្តិការណ៍រត់ម៉ារ៉ាតុងអន្តរជាតិ Cincinnati Flying Pig Marathon លើកទី២៧ នៅរដ្ឋអូហៃយ៉ូ សហរដ្ឋអាមេរិក ដែលមានអត្តពលិកកីឡាករកីឡាការិនីមកពីជុំវិញពិភពលោកជាង៣ម៉ឺននាក់។

ក្នុងព្រឹត្តិការណ៍ដ៏ធំរៀបចំដោយសហរដ្ឋអាមេរិកនេះមានវិញ្ញាសារត់ចម្ងាយ៣គីឡូម៉ែត្រ ៥គីឡូម៉ែត្រ ១០គីឡូម៉ែត្រ ២១គីឡូម៉ែត្រ និងវិញ្ញាសារត់ចម្ងាច៤២គីឡូម៉ែត្រ។ ក្នុងចំណោមចំនួន៥ខាងលើនេះ លោក ឡេង តុង បានជ្រើសរើសវិញ្ញាសារត់ចម្ងាយ៤២គីឡូម៉ែត្រ ដោយលោកជាប់លេខរៀងទី ១២៤២ ចំណោមអ្នកចូលរួមរត់៥៦២៧នាក់ ប្រើថិរៈវេលារត់ ៣ម៉ោង៥៤នាទី និង២០វិនាទី។

ការបង្ហាញវត្តមានក្នុងព្រឹត្តិការណ៍ដ៏ធំនៅអន្តរជាតិនេះ លោកបានរត់ដោយលើកបង្ហាញទង់ជាតិកម្ពុជា ដែលបានបង្ហាញប្រជាជនលើពិភពលោក អំពីអត្តសញ្ញាណជាតិខ្មែរ។ ជាជំហានបន្ទាប់ទៀត លោក ឡេង តុង គ្រោងនឹងចូលរួមរត់នៅក្នុងព្រឹត្តិការណ៍រត់ម៉ារ៉ាតុងដ៏ធំនៅទីក្រុងបែរឡាំងង ប្រទេសអាល្លឺម៉ង់ ដែលប្រព្រឹត្តិទៅនៅថ្ងៃទី២១ ខែ កញ្ញា អមជាមួយកីឡាករកម្ពុជា៦រូបផ្សេងទៀតផងដែរ។

លោក ឡេង តុង អ្នករត់ដ៏សកម្មនៅកម្ពុជារូបនេះ បានគូសបញ្ជាក់ថា ហេតុផលដែលនាំឱ្យលោកជាជនជាតិខ្មែរ ចុះឈ្មោះចូលរួមរត់នៅក្នុងព្រឹត្តិការណ៍ដ៏ធំនៅសហរដ្ឋអាមេរិនេះ ដោយលោកចង់បង្ហាញពិភពលោកថា នៅកម្ពុជាក៏មានវិស័យកីឡារីកចម្រើន ជាក់ស្តែងដូចជាកីឡារត់នេះជាដើម។ គួរឱ្យដឹងដែរថា លោក ឡេង តុង ជាអ្នកស្រឡាញ់កីឡារត់មួយរូបនៅកម្ពុជា ស្ទើរតែគ្រប់ព្រឹត្តិការណ៍រត់ដើម្បីសប្បុរសធម៌ លោកតែងតែចូលរួមមិនដែលខានឡើយ។ ជាមួយគ្នានោះ ភាគច្រើនលោករត់លើវិញ្ញាសា១០គីឡូម៉ែត្រ ២១គីឡូម៉ែត្រ និងវិញ្ញាសារត់៤២គីឡូម៉ែត្រ ហើយថ្មីៗនេះ លោកក៏បានបំបែកកំណត់ត្រាខ្លួនឯងលើវិញ្ញាសារត់ចម្ងាយ២១ និង៤២កីឡូម៉ែត្រនៅកម្ពុជា៕

ដោយ ហេង ណាលីន