AKP ភ្នំពេញ ថ្ងៃទី០៣ ខែឧសភា ឆ្នាំ២០២៥ -- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីរសៀលថ្ងៃទី០២ ខែឧសភា ឆ្នាំ២០២៥ បានអញ្ជើញជាអធិបតីក្នុងពិធីការពារបញ្ចប់និក្ខេបបទថ្នាក់បណ្ឌិតគ្រប់គ្រងអប់រំក្រោមប្រធានបទ៖ “អភិវឌ្ឍន៍យុទ្ធសាស្ត្រស្ដីពីការដឹកនាំអប់រំឌីជីថលនៅតាមគ្រឹះស្ថានឧត្ដមសិក្សា៖ វិធីសាស្ត្រស្រាវជ្រាវចម្រុះ” ដោយបេក្ខជនបណ្ឌិត ទេព កូលាប ដោយក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ចំពោះការខិតខំប្រឹងប្រែងយកអស់កម្លាំងកាយចិត្ត តស៊ូជម្នះរាល់ការលំបាកជាច្រើន បំពេញគ្រប់លក្ខខណ្ឌក្នុងការសិក្សាស្រាវជ្រាវរបស់បេក្ខជនបណ្ឌិត ទេព កូលាប លើប្រធានបទដ៏មានសារៈសំខាន់នេះអស់រយៈពេលប្រមាណជា ៥ឆ្នាំដើម្បីសរសេរចងក្រងជានិក្ខេបបទដែលមានទាំងទម្រង់  ខ្លឹមសារ បរិមាណ វិស័យ និងគុណវិស័យ។ 

ពាក់ព័ន្ធនឹងប្រធានបទ “អភិវឌ្ឍន៍យុទ្ធសាស្ត្រស្តីពីការដឹកនាំអប់រំឌីជីថលនៅគ្រឹះស្ថានឧត្តមសិក្សា” នេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសរំលេចពីការវិវឌ្ឍយ៉ាងឆាប់រហ័សនៃប្រព័ន្ធឌីជីថល ដែលជំរុញឱ្យការអប់រំឌីជីថលត្រូវបន្តធ្វើបច្ចុប្បន្នភាពមិនឈប់ឈរ ឱ្យឆ្លើយតបទៅនឹងចំណេះដឹងថ្មីៗ នវានុវត្តន៍ ដែលនេះទាមទារនូវការវិនិយោគច្រើន និងយុទ្ធសាស្ត្រប្រកបដោយប្រសិទ្ធភាព និងចក្ខុវិស័យវែងឆ្ងាយ ដោយក្នុងនោះត្រូវផ្សារភ្ជាប់នឹងការរៀនពេញមួយជីវិត ជំនាញឌីជីថល ជំនាញបញ្ញាសិប្បនិម្មិត (AI) និងការគិតបែបស៊ីជម្រៅ និងមិនអាចខ្វះបានឡើយនូវការសិក្សារៀនសូត្រពីឧត្តមានុវត្តន៍នៃការអនុវត្តការអប់រំឌីជីថលរបស់សាកលវិទ្យាល័យទាំងក្នុងប្រទេស និងក្រៅប្រទេស។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានកោតសរសើរ និងចូលរួមអបអរសាទរដល់បេក្ខជនបណ្ឌិតដែលសម្រេចបាននូវក្តីស្រមៃ ដោយគូសបញ្ជាក់នូវការរំពឹងថា ការសិក្សាស្រាវជ្រាវនេះនឹងត្រូវបានបន្តផ្សព្វផ្សាយ និងយកទៅប្រើប្រាស់ឱ្យបានទូលំទូលាយដើម្បីលើកកម្ពស់ការអប់រំឌីជីថលនៅកម្ពុជា ព្រមទាំងបានផ្តល់អនុសាសន៍ឱ្យបន្តចែករំលែកចំណេះដឹង ការសិក្សាស្រាវជ្រាវ និងឧត្តមានុវត្តន៍ ដែលឆ្លុះបញ្ចាំងពីយុទ្ធសាស្ត្រផ្សារភ្ជាប់នឹងការអនុវត្តជាក់ស្តែងនាពេលបច្ចុប្បន្ន និងនិន្នាការការអប់រំឌីជីថលទៅថ្ងៃអនាគតនៅឧត្តមសិក្សាទាំងក្នុងប្រទេស និងនៅបណ្ដាប្រទេសផ្សេងៗទៀត ដោយបានរំលេចថានិក្ខេបបទនេះមានសក្តានុពលប្រែក្លាយទៅជាសៀវភៅមេរៀនដ៏មានតម្លៃសម្រាប់អ្នកសិក្សា លោកគ្រូ អ្នកគ្រូ និងបេក្ខជនថ្នាក់បណ្ឌិតជំនាន់ក្រោយៗទៀតអាចសិក្សារៀនសូត្របន្តបាន៕

ដោយ៖ ចាន់ សុភឿន (ប្រភព៖ ក្រសួងអប់រំ)