AKP ភ្នំពេញ ថ្ងៃទី០២ ខែឧសភា ឆ្នាំ២០២៥

ទីភ្នាក់ងារទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំកម្ពុជា បានសហការយ៉ាងជិតស្និទ្ធជាមួយ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ក្រសួងពាណិជ្ជកម្ម និងសមាគមអតីតកម្មសិក្សាការីកម្ពុជា-កូរ៉េ (CAMKAA)បានរៀបចំសិក្ខាសាលាចែករំលែកចំណេះដឹងក្រោមប្រធានបទការលើកម្ពស់វិនិយោគក្នុងប្រទេសកម្ពុជា តាមរយៈកម្មសិទ្ធិបញ្ញា និង កម្មវិធីទទួលស្គាល់ប្រកាសនីយបត្រតក្កកម្ម កាលពីថ្ងៃទី៣០ ខែមេសា ឆ្នាំ២០២៥។

សិក្ខាសាលានេះគឺជាផ្នែកមួយនៃកិច្ចខិតខំប្រឹងប្រែងបន្តរបស់ KOICA ក្នុងការពង្រឹងប្រព័ន្ធកម្មសិទ្ធិបញ្ញារបស់កម្ពុជា និងលើកកម្ពស់ការប្រើប្រាស់កម្មវិធី ទទួលស្គាល់ប្រកាសនីយបត្រតក្កកម្មនៅកម្ពុជា សិក្ខាសាលាបានធ្វើឡើងនៅក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ សិក្ខាសាលានេះ ធ្វើឡើងដោយមានការអញ្ជើញចូលរួមពី ​ ឯកឧត្តម ភោគ សុវណ្ណរិទ្ធ រដ្ឋលេខាធិការនៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង ឯកឧត្តម អ៊ឹម សួរ ប្រធាន សមាគមអតីតកម្មសិក្សាការីកម្ពុជា-កូរ៉េ (CAMKAA) លោកស្រី ឆយ មូន ជុង (Ms. CHOI Moon Jung) នាយិកា ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំប្រទេសកម្ពុជា និងក៏មានការចូលរួមប្រមាណ១០០នាក់ រួមទាំងតំណាងមកពី ទីភ្នាក់ងារទីភ្នាក់ងារសហប្រតិបត្តិការអន្តរជាតិកូរ៉េ ក្រសួងពាណិជ្ជកម្ម​ ក្រុមប្រឹក្សាអភិវឌ្ឍន៍កម្ពុជា សមាគមអតីតកម្មសិក្សាការីកម្ពុជា-កូរ៉េ និងតួអង្គពាក់ព័ន្ធក្នុងវិស័យកម្មសិទ្ធិបញ្ញា ។

ឯកឧត្តម សួន វិជ្ជា ប្រធាននាយកដ្ឋាន​កម្មសិទ្ធិ​បញ្ញា នៃក្រសួងពាណិជ្ជកម្ម និងជាទីប្រឹក្សាក្រសួងពាណិជ្ជកម្ម បានបង្ហាញអំពីបច្ចុប្បន្នភាពយុទ្ធសាស្ត្រកម្មសិទ្ធិបញ្ញា និងការអនុវត្តល្អបំផុតរបស់កម្ពុជាដោយសង្កត់ធ្ងន់លើតួនាទីសំខាន់នៃកម្មសិទ្ធិបញ្ញាក្នុងការអភិវឌ្ឍសេដ្ឋកិច្ច។ ឯកឧត្តមក៏បានណែនាំគម្រោងកយកាជាមួយក្រសួងពាណិជ្ជកម្មដែលជាគម្រោងកំពុងពិចារណា​ដែលមានចំណងជើងថា “មជ្ឈមណ្ឌលគ្រប់គ្រងម៉ាកពាណិជ្ជកម្មជាតិរបស់កម្ពុជា និងការអភិវឌ្ឍប្រព័ន្ធព័ត៌មានអាជីវកម្មកម្មសិទ្ធិបញ្ញា- Cambodia’s National Trademark Management Center (NTMC) and IP-Business Information Platform Development Project” ដែលគ្រោងនឹងចាប់ផ្តើមនៅឆ្នាំ២០២៦ដោយលើកឡើងពីសារៈសំខាន់នៃកិច្ចសហប្រតិបត្តិការបន្តជាមួយកយកា-KOICA ក្នុងវិស័យកម្មសិទ្ធិបញ្ញា។

លោកស្រី ឱ វណ្ណឌីម៉ា​ ប្រធាន​នាយកដ្ឋានកម្មសិទិ្ធឧស្សាហកម្ម និង លោក ស្វាយ រ៉េន អនុប្រធាន នាយកដ្ឋានកម្មសិទិ្ធឧស្សាហកម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចែករំលែកការយល់ដឹងអំពីប្រព័ន្ធកម្មសិទ្ធិបញ្ញា និងកម្មវិធីទទួលស្គាល់ប្រកាសនីយបត្រតក្កកម្មនៅកម្ពុជា។

ជាមួយនឹងការទទួលបានបទពិសោធន៍ដែលតាមរយៈកម្មវិធីបណ្តុះបណ្តាលសមត្ថភាពរបស់ KOICA ឆ្នាំ២០២៣-២០២៤ ដែលមានចំណងជើងថា "កម្មសិទ្ធិបញ្ញា និង កម្មវិធីទទួលស្គាល់ប្រកាសនីយបត្រតក្កកម្មនៅកម្ពុជា" ពួកគាត់បានពិភាក្សាអំពីរបៀបដែលប្រព័ន្ធ កម្មសិទ្ធិបញ្ញា របស់ប្រទេសកូរ៉េបានរួមចំណែកដល់កំណើនសេដ្ឋកិច្ចរបស់ខ្លួន យុទ្ធសាស្ត្រសម្រាប់ការអនុវត្តមេរៀនទាំងនេះចំពោះប្រទេសកម្ពុជា និងផែនការសកម្មភាពដែលបានបង្កើតឡើងបន្ទាប់ពីការបណ្តុះបណ្តាល។ ពួកគាត់ក៏បានផ្តល់ទិដ្ឋភាពទូទៅនៃកម្មវិធីទទួលស្គាល់ប្រកាសនីយបត្រតក្កកម្ម ស្ថិតិចែករំលែកស្ថិតិស្តីអំពីការស្នើសុំ កម្មវិធីទទួលស្គាល់ប្រកាសនីយបត្រតក្កកម្ម ដោយបានពន្យល់ពីនីតិវិធីសម្រាប់ការដាក់ពាក្យតាមអនឡាញ និងបានពិភាក្សាពីបញ្ហាប្រឈម និងសក្តានុពលដំណោះស្រាយ សម្រាប់ដំណើរការសាកល្បងប្រកាសនីយបត្រតក្កកម្មរបស់ប្រទេសកម្ពុជា។

ជាមួយគ្នានេះ ឯកឧត្តម សួន សុផល ​អគ្គលេខាធិការរង គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជាបានបង្ហាញពីយុទ្ធសាស្ត្រសម្រាប់ការទាក់ទាញការវិនិយោគដោយផ្ទាល់ពីបរទេស តាមរយៈការលើកកម្ពស់ការការពារកម្មសិទ្ធិបញ្ញា និងបានសង្កត់ធ្ងន់លើសារៈសំខាន់នៃការកសាងប្រព័ន្ធអេកូឡូស៊ីនៃការវិនិយោគដែលជំរុញដោយកម្មសិទ្ធិបញ្ញា។

សូមជម្រាបជូនថា សិក្ខាសាលានេះ ក៏បានឆ្លុះបញ្ចាំងពីការប្តេជ្ញាចិត្តយ៉ាងទូលំទូលាយរបស់ KOICA ក្នុងការពង្រឹងធនធានមនុស្សនៅកម្ពុជា តាមរយៈគំនិតផ្តួចផ្តើមដូចជាកម្មវិធីពង្រឹងសមត្ថភាព និងវឌ្ឍនភាពសម្រាប់ថ្ងៃស្អែក(កម្មវិធីបណ្តុះបណ្តាលរបស់កយកា)។ កម្មវិធីបណ្តុះបណ្តាល ផ្តោតលើការកសាងសមត្ថភាពរបស់អ្នកបង្កើតគោលនយោបាយ មន្ត្រីសាធារណៈ និងអ្នកជំនាញ ដើម្បីជំរុញការអភិវឌ្ឍន៍សេដ្ឋកិច្ច និងសង្គម។

ចាប់តាំងពីការបើកដំណើរការនៅឆ្នាំ១៩៩៤មក KOICA បានដើរតួនាទីយ៉ាងសំខាន់ក្នុងការលើកកម្ពស់ការផ្លាស់ប្តូរជំនាញ និងបច្ចេកវិទ្យា ដោយផ្តល់អត្ថប្រយោជន៍ដល់មន្ត្រីកម្ពុជាចំនួន៤​ ១៧៩នាក់ ដែលបានបញ្ចប់កម្មវិធីបណ្តុះបណ្តាលនៅប្រទេសកូរ៉េ។ សមាគមអតីតកម្មសិក្សាការីកម្ពុជា-កូរ៉េ (CAMKAA) ដែលមានសមាសភាពជាអតីត កម្មសិក្សាការី និង និស្សិតអាហារូបករណ៍ របស់ KOICA បានរៀបចំសិក្ខាសាលាយ៉ាងខ្ជាប់ខ្ជួន ដើម្បីចែករំលែកចំណេះដឹង និងបទពិសោធន៍ដែលទទួលបានតាមរយៈការបណ្តុះបណ្តាលនៅកូរ៉េ ដេម្បីចូលរួមចំណែកដល់ការផ្សព្វផ្សាយជំនាញក្នុងវិស័យផ្សេងៗនៅក្នុងប្រទេសកម្ពុជា។ KOICA នៅតែប្តេជ្ញាគាំទ្រដល់ការអភិវឌ្ឍសេដ្ឋកិច្ចសង្គមរបស់កម្ពុជា តាមរយៈការប្រើប្រាស់យុទ្ធសាស្ត្រនៃកម្មសិទ្ធិបញ្ញា៕

ដោយ៖ រិទ្ធី, ប្រភព៖ KOICA