AKP ព្រះវិហារ ថ្ងៃទី០១ ខែឧសភា ឆ្នាំ២០២៥-
ឯកឧត្តម កង សៅគុណ អនុប្រធានទី១ ក្រុមការងារថ្នាក់ខេត្តចុះជួយមូលដ្ឋានស្រុកជ័យសែន ដែលមានកម្លាំងចម្រុះសរុប ១១៨នាក់ (ស្ត្រី ៣៩នាក់) បានរួបរួមសាមគ្គីគ្នាចុះរុះរើផ្ទះសម្បែងជូនប្រជាពលរដ្ឋនៅភូមិស្លែង ឃុំខ្យង ស្រុកជ័យសែន ដែលបានរងផលប៉ះពាល់យ៉ាងធ្ងន់ធ្ងរដោយសារគ្រោះធម្មជាតិខ្យល់កន្ត្រាក់កាលពីល្ងាចថ្ងៃទី២៥ ខែមេសា ឆ្នាំ២០២៥ ។ ការចុះជួយរបស់ក្រុមការងារនេះបានធ្វើឡើងនាព្រឹកថ្ងៃទី០១ ខែឧសភា ឆ្នាំ២០២៥ ។

ក្នុងឱកាសនោះ ឯកឧត្តម កង សៅគុណ បានលើកឡើងពីការយកចិត្តទុកដាក់ខ្ពស់ ក្នុងនាមតំណាង ឯកឧត្តម គីម រិទ្ធី អភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តព្រះវិហារ បាននាំយកអំណោយជាដែកស័ង្កសីចំនួន ២០០ សន្លឹក ជូនដល់ប្រជាពលរដ្ឋ១០គ្រួសារ ដែលរងគ្រោះធម្មជាតិ ស្ថិតនៅក្នុងឃុំខ្យង ចំនួន១០០សន្លឹក និង០៩គ្រួសារទៀត ក្នុងឃុំតស៊ូ ដើម្បីជួយសម្រួលដល់ការសាងសង់ លំនៅឋានរបស់ពួកគាត់ឡើងវិញឱ្យបានឆាប់រហ័ស ។ 

ជាមួយនឹងការចុះជួយរុះរេីនោះដែរ ក្រុមការងារក៏បាននាំយកនូវអំណោយ មួយចំនួនដូចជា ទឹកសុទ្ធ ៣០យួរ ទឹកផ្លែឈេី ០៣កេស និងថវិកា ចំនួន ១ ១២០ ០០០ រៀល ដែលបង្ហាញ យ៉ាងច្បាស់ពីស្មារតីសាមគ្គីភាព និងការយកចិត្តទុកដាក់យ៉ាងកក់ក្តៅពីថ្នាក់ដឹកនាំខេត្ត ព្រមទាំងគ្រប់ស្ថាប័នពាក់ព័ន្ធ ក្នុងការជួយទំនុកបម្រុង និងសម្រាលទុក្ខលំបាករបស់ប្រជាពលរដ្ឋដែលរងគ្រោះដោយសារគ្រោះមហន្តរាយធម្មជាតិនេះ៕

ដោយ៖ រិទ្ធី ប្រភព៖ មន្ទីរព័ត៌មានខេត្តព្រះវិហារ