AKP កំពង់ស្ពឺ ថ្ងៃទី០១ ខែឧសភា ឆ្នាំ២០២៥ -- ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានកិត្តិយសសាខាកាកបាទក្រហមកម្ពុជា ខេត្តកំពង់ស្ពឺ បានអញ្ជើញជាអធិបតីដ៏ខ្ពង់ខ្ពស់ក្នុងពិធី «អបអរខួបលើកទី១៦២ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ២០២៥ ក្រោមមូលបទ «រួមគ្នាស្ម័គ្រចិត្ត ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ» នាព្រឹកថ្ងៃទី០១ ខែឧសភា ឆ្នាំ២០២៥ នៅក្នុងបរិវេណសាលាខេត្តកំពង់ស្ពឺ ដោយមានការនិមន្ត និងអញ្ជើញចូលរួមពីមេគណខេត្តទាំងពីរគណៈ គណៈកិត្តិយសសាខា គណៈកម្មាធិការសាខា សមាជិកព្រឹទ្ធភា រដ្ឋសភា ក្រុមការងារមូលដ្ឋានរាជរដ្ឋាភិបាលចុះជួយខេត្ត ក្រុមប្រឹក្សាខេត្ត អភិបាល អភិបាលរងនៃគណៈអភិបាលខេត្ត ថ្នាក់ដឹកនាំក្រសួងមុខងារសាធារណៈ អនុសាខាក្រុង ស្រុក សប្បុរសជន យុវជន អ្នកស្ម័គ្រចិត្តកាកបាទប្រហម និងលោគ្រូ អ្នកគ្រូសិស្សានុសិស្សប្រមាណ១២៥០នាក់។

ក្នុងសុន្ទរកថាស្វាគមន៍ និងរបាយការណ៍ស្តីពីសកម្មភាពការងាររបស់សាខាកាកបាទក្រហមកម្ពុជា ខេត្តកំពង់ស្ពឺ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ស្ពឺ បានជម្រាបជូនអង្គពិធីថា អស់រយៈកាល៥ឆ្នាំជាប់គ្នានាពេលកន្លងមក (២០២០-២០២៤) ដែលសាខាកាកបាទ ក្រហមកម្ពុជាខេត្ត ខកខានពុំបានប្រារព្ធមីទ្ទីងនេះឡើង ដោយមូលហេតុនៃការរាតត្បាតជម្ងឺកូវីដ-១៩ (គ្រាន់តែធ្វើលិខិតអំពាវនាវ)។ ទើបតែនៅថ្ងៃទី០១ ខែឧសភា ឆ្នាំ២០២៥នេះ  សាខាកាកបាទក្រហមកម្ពុជាខេត្តកំពង់ស្ពឺ បានប្រារព្ធពិធីនេះឡើងវិញ ដើម្បីអំពាវនាវស្វែងរកការជួយគាំទ្រពីសប្បុរសជននានាគ្រប់មជ្ឈដ្ឋាន។ ក្នុងនាមគណៈកម្មាធិការសាខាកាកបាទក្រហមកម្ពុជាខេត្ត ឯកឧត្តមអភិបាលខេត្តបានកោតសរសើរ និងគោរពដឹងគុណជាអនេក ចំពោះទឹកចិត្តប្រកបដោយព្រហ្មវិហារធម៌របស់សប្បុរសជន ដែលបានរួមចំណែកជួយដល់ជនរងគ្រោះ និងងាយរងគ្រោះឱ្យមានភាពកក់ក្តៅតាមរយៈ សាខាកាកបាទក្រហមកម្ពុជាខេត្ត និងបានរួមចំណែកកាត់បន្ថយការលំបាកចំពោះមុខរបស់គ្រួសាររងគ្រោះដែលត្រូវការជំនួយបានមួយកម្រិត។

ជាមួយគ្នានោះ ឯកឧត្តមឧបនាយករដ្ឋមន្ត្រី ហ៊ុន ម៉ានី បានមានប្រសាសន៍ថា អង្គមីទ្ទិញធ្វើឡើងនាពេលនេះ គឺពិតជាមានសារៈសំខាន់ខ្លាំងណាស់ សម្រាប់កាកបាទក្រហមកម្ពុជា ជាពិសេសសម្រាប់សាខាកាកបាទក្រហមខេត្តកំពង់ស្ពឺ អាជ្ញាធរដែនដីគ្រប់លំដាប់ថ្នាក់ និងប្រជាពលរដ្ឋក្នុងខេត្តកំពង់ស្ពឺទាំងមូលតែម្តង ព្រោះការចូលរួមបរិច្ចាគរបស់សប្បុរសជនទាំងអស់នៅថ្ងៃនេះ នឹងជួយឱ្យសាខាកាកបាទក្រហមកម្ពុជាខេត្តកំពង់ស្ពឺ មានលទ្ធភាពក្នុងការបន្តបេសកកម្មរបស់ខ្លួន ក្នុងបុព្វហេតុមនុស្សធម៌ ជាបន្តទៀត។ “ប្រតិបត្តិការផ្តល់ជំនួយសង្រ្គោះ ដោយគ្មានការរើសអើង ដែលបាន និងកំពុងអនុវត្តយ៉ាងសកម្ម គ្រប់ពេលវេលា គ្រប់ទីកន្លែង នៅទូទាំងប្រទេស ជូនប្រជាពលរដ្ឋងាយរងគ្រោះ និងអ្នករងគ្រោះដោយគ្រោះមហន្តរាយផ្សេងៗ គឺជាចំណែកមួយដ៏សំខាន់ក្នុងការចូលរួមជាមួយរាជរដ្ឋាភិបាល ក្នុងការកាត់បន្ថយភាពក្រីក្រ លើកកម្ពស់តម្លៃមនុស្សធម៌ និងសេចក្តីថ្លៃថ្នូររបស់មនុស្សជាតិ ដែលស្របតាមពាក្យស្លោកដែលពោលថា «ទីណាមានទុក្ខលំបាក ទីនោះមានកាកបាទក្រហមកម្ពុជា» ហើយ «កាកបាទក្រហមកម្ពុជា ជាជំនួយការឱ្យអាជ្ញាធរសាធារណៈក្នុងវិស័យមនុស្សធម៌»។

ទន្ទឹមនឹងនេះ ឯកឧត្តមបានបន្ថែមថា ក្នុងនាមប្រធានកិត្តិយសសាខាកាកបាទក្រហមខេត្ត ឯកឧត្តមឧបនាយករដ្ឋមន្ត្រី ហ៊ុន ម៉ានី បានផ្តល់អនុសាសន៍ចំនួន៦ ដល់អាជ្ញាធរពាក់ព័ន្ធ ដើម្បីត្រៀមខ្លួនប្រុងប្រយ័ត្នទុកជាមុន ក្នុងការជួយសង្រ្គោះប្រជាពលរដ្ឋ លើបញ្ហាទាំងអស់នេះ ដែលអាចនឹងកើតឡើងជាយថាហេតុ រួមមាន៖ ទី១. សាខាកាកបាទក្រហមកម្ពុជាខេត្តកំពង់ស្ពឺ និងអនុសាខាកាកបាទក្រហមក្រុង ស្រុកទាំង៩ ត្រូវបង្កើនកិច្ចសហការគ្នាឱ្យបានល្អ ជាមួយអាជ្ញាធរគ្រប់លំដាប់ថ្នាក់ ដើម្បីត្រៀមលក្ខណៈឆ្លើយតបបន្ទាន់ទៅនឹងសេចក្តីត្រូវការរបស់ប្រជាពលរដ្ឋ។ ទី២. ត្រូវបន្តតាមដានជាប្រចាំពីសភាពការណ៍នានា នៅមូលដ្ឋាន និងស្វែងយល់ឱ្យបានស៊ីជម្រៅពីភាពងាយរងគ្រោះ ដើម្បីត្រៀមលក្ខណៈបង្ការ ទប់ស្កាត់ និងមានវិធានការដោះស្រាយផលប៉ះពាល់ទាំងនោះ។ ទី៣. ត្រូវយកចិត្តទុកដាក់សហការ គាំទ្រឱ្យកាន់តែសកម្មថែមទៀត ក្នុងការអប់រំផ្សព្វផ្សាយព័ត៌មានពីការការពារសុខភាព និងការទប់ស្កាត់ការរីករាលដាលនៃជំងឺឆ្លងនានាជូនប្រជាពលរដ្ឋ។ ទី៤. គណៈកម្មាធិការគ្រប់គ្រងគ្រោះមហន្តរាយខេត្ត សាខាកាកបាទក្រហមខេត្ត រួមជា មួយមន្ទីរ អង្គភាពពាក់ព័ន្ធ ត្រូវសហការស្វែងយល់អំពីផលប៉ះពាល់ដែលបណ្តាល  មកពីការប្រែប្រួលអាកាសធាតុដូចជា គ្រោះទឹកជំនន់ គ្រោះរាំងស្ងួត ខ្យល់កន្ត្រាក់ជាដើម ដើម្បីអាចក្តាប់សភាពការណ៍ និងឆ្លើយតប ពីផលប៉ះពាល់ទាំងនោះបានទាន់ពេលវេលា។ ទី៥. ត្រូវបន្តពង្រឹង និងពង្រីកកម្លាំងអ្នកស្ម័គ្រចិត្តយុវជនកាកបាទក្រហម តាមរយៈការបង្កើនចំណេះដឹង និងសមត្ថភាពជំនាញដើម្បីក្លាយជាកម្លាំងដ៏រឹងមាំក្នុងកិច្ចប្រតិបត្តិការមនុស្សធម៌ និងទី៦. សូមចូលរួមជាមួយអាជ្ញាធរមានសមត្ថកិច្ចជំរុញការផ្សព្វផ្សាយច្បាប់ចរាចរណ៍ផ្លូវគោក ដើម្បីកាត់បន្ថយអត្រាស្លាប់និងរបួសដែលបណ្តាលមកពីគ្រោះថ្នាក់ចរាចរណ៍ ស្របតាមពាក្យស្លោករបស់សម្តេចតេជោ អតីតនាយករដ្ឋមន្ត្រីនិងជាប្រធានព្រឹទ្ធសភានៃព្រះរាជាណាចក្រកម្ពុជាដែលមានខ្លឹមសារថា "ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍"៕

ដោយ លឹម សាន្ត